MEDIAONETIMOR-Tanba hetan lamentasoins husi partidu balun katak jornalista iha Mídia Komunikasaun Sosial (komsos) online balun halo notisia bazeia deit ba imajinasaun maka Konsellu Imprensa (KI) husu ba jornalista sira atu tenki kaer metin kode etika jornalista.
“KI simu preukupasaun pesoal balun husi partidu politiku (Parpol) sira nomos husi entidade sira seluk konaba fake news ka hoax durante periodu kampaña ne’ebé media oline hanesan; politika timor, BlogSpot no com publican ne’ebe ativu tebes hatun notisia barak liu iha tendensia atu soran lider partidu politiku sira.”
Lia fuan hirak ne’e fó sai husi Prezidente KI, Virgilio Guterres iha konferensia imprensa ne’ebé hala’o iha Quintal Boot, Tersa, (04/07/2017). Akompaña iha konferensia imprensa ne’e membru KI; Jose Ximenes no Hugo Fernandes.
Virgilio rekoñese, bainhira le’e notisia iha blog hirak ne’e nota katak ema ne’ebé hakerek iha koñesementu no esperensia sufisiente kona-ba jornalistika nian. Maibé, notisia la baseia ba faktus real. Fontes sira ne’ebé blog ne’e foti mesak imaginative. Katak, ema sira ne’ebé mosu iha notisia ne’e la halo deklarasaun hanesan hakerek iha notisia ne’e.
Jornalista foti fali informasaun imaginative ne’e sai fali referensia hodi halo pergunta ba fontes durante kampaña. Nune’e Virgilio husu ba jornalista atu uza sira nia data no faktus rasik hodi kestiona ka litik lider parpol sira. Labele fo informasaun ba públiku baseia ba fontes ne’ebe falsu
“Hau apela ba jornalista iha TL para hotu-hotu nafatin kumpri kode etika jornalistika hodi transmiti produtu jornalistiku ida ne’ebé garanti indepedensia editorial no respeita direitu públiku nian atu hetan inormasaun ne’ebé lo’os no momo’os,” tenik Virgilio.(Estajiada Dulce Ximenes/Sandra Soares)
Discussion about this post