Hadia Sistema Bee, BTL.EP Asina Kontratu ho Kompañia Rua

(Reportajen Guilhermino Ramos/Editora Suzana Cardoso)

DILI (Media ONE Timor) – Atu hadia sistema kanalizasaun bee moos iha suku Melihu,  Postu Administrativu Kailaku, Munisipiu Bobonaro no Postu Administrativu Fohorem Munisipiu Kovalima, Bee Timor-leste, Empreza Públika (BTL, E.P), asina kontratu ho kompañia  implementador Roman Junior, Unip. Lda no Soreira, Unip.Lda.

“Espera semana ida tan bele implementa ona projetu ne’e. Hadia sistema operasaun bee moos iha  Postu Administrativu Kailaku, Suku Melihu, Munisipiu Bobonaro no Postu Administrativu Fohorem Munisipiu Kovalima hodi bele kontinua funsiona di’ak. No lori bee moos ba komunidade.”

Hateten Prezidente BTL,E.P, Carlos Peloi Dos Reis ba Jornalista iha nia knaar fatin Kaikoli, Segunda, (07/11/2022). Nia hateten, orsamentu ba projeitu rua ne’e hamutuk osan mill 800-resin USD. Ne’ebé fahe ba projeitu Fohorem osan mill 489-resin USD. Ba Suku Melihu osan mill 446-resin USD.

Esplika Carlos, iha Fohorem sei dada bee moos ba uma kain 210-resin ho populasaun na’in 1.200-resin. No iha Kailaku nia uma kain 325-resin ho populasaun na’in 1.900-resin. Komunidade iha munisipiu 12 maioria asesu ona bee moos.

Maibé Carlos dehan, sistema bee moos hirak ne’e dala ruma di’ak no ladi’ak. Nune’e, tenke halo manutensaun para lori bee moos ba to’o komunidade nia hela fatin. Inklui, komunidade RAEOA. No Atauro tinan ne’e sai ona munisipiu, presiza atensaun diferente kompara ho tinan antes.

“Projeitu melloramentu bee moos ne’ebé dau-daun ne’e hala’o hela maka iha nivel munisipiu hamutuk 12. Iha kapitál postu administrativu hamutuk 22. No iha prosesu levantamentu dadus hamutuk projeitu 14 maka sei implementa iha kapotál postu administrativu seluktan”, Carlos hatete.

Lia fuan hanesan hato’o husi reprezentante kompañia Roman Junior, Unip. Lda, José Amaral. Nia hatete, projeitu melloramentu bee mos iha Suku Fohoren, Postu Administrativu Suai sei serbisu tuir akordu ne’ebé hakotu ona ho BTL. E.P, hodi lori bee moos ba komunidade sira ne’ebé seidauk asesu.

“Ami nia kompañia husi Suai. Konserteza ami sei halo responsabilidade ne’ebé sei la ses husi BOQ ho dezeñu ne’ebé iha ona. Importante mak kolaborasaun di’ak husi komunidade atu kontribui. Tamba, normalmente projetu ne’e hahu ema hotu enkoraja kompañia”, José esplika.

Diretór kompañia ne’e promote, sei kumpri tuir orariu ne’ebé konkorda ona. No garantia sei finaliza iha fulan neen nia laran. Problema ho komunidade nia rai no plantasaun, responsabilidade iha autoridade lokál sira.

“Ohin infelizmente serimonia asina kontratu ida ne’e autoridade lokal mos iha hotu. Entaun sira rona rasik autorizasaun husi Presidente BTL,E.P. Katak, buat ruma akontese iha terenu ami sei koordena ho sira. No sira mak sei halibur lideransa suku sira para bele rezolve problema ruma karik akontese”, dehan José. (Asesu Youtube/Facebook https://www.facebook.com/Media1Timor Media ONE Timor)