Maioria Inan Isin Rua Partus Iha Uma, Komunidade Lamenta Estrada Aat

(Reportajen Jornalista Media ONE Timor-Mariquita Freitas)

Dili (www.mediaonetimor.co) –  Estrada ne’ebé liga ba Suku Lore I, Postu Administrativu Lospalos, Munisipiu Lautein nia kondisaun grave, difikulta komunidade asesu ba merkadu, eskola no sentru saúde.

Xefi Suku Lore I, Abilio Amaral  no ida husi Inan isin rua, Flora da Silva ba Jornalista sira ne’ebé halo hela atividade Media Tour, ne’ebé hetan apoiu husi Oxfam Timor-Leste (TL) no realiza husi Asosiasaun Jornalista Timor-Lorosa’e (AJTL), iha loron ikus Fulan Maiu 2024, lamentavel tebes ho estrada besik kilometru 32 nia kondisaun ne’ebé grave tebes.

Lee Notísia Relevante: Konsulta Popular Lori Marciana Ba Sofrementu Fiziku

Xefi Suku Lore I, Abilio Amaral  hatete,  luta ba TL nia ukun an sura moos ho komunidade sira husi Lore I nia kontribuisaun. Maibé, hafoin  ukun an iha tinan 22 ona, komunidade hirak ne’e seidauk senti ukun an nia midar ba sira nia moris.

“Tinan 22 ona Timor-Leste ukun an. Maibé, ami nia komunidade Suku Lore I la-senti. Tanba, estrada ne’ebé hatutan ami nia moris at los. Defisil atu ba faan ka sosa produtu sira iha merkadu. Oan sira atu ba eskola maibé dook los. Moras emerjensia ruma labele atende ho lalais”, dehan Abilio.

Problema estrada ne’ebé at, nu’udar autoridade lokál katak Xefi Suku Lore I, tinan-tinan sempre submete proposta ba munisipiu. Inklui, iha enkontru entre autoridade lokál ho Prezidente Autoridade Munisipiu. Maibé, la-iha resposta positivu.

Konta Xefi Suku Abilio, iha tempu udan estrada nakfila ba tahu. Aliende tahu dodok, be’e mos nalihun iha estrada hirak ne’ebé ko’ak. Hanesan moos iha tempu bai loron, rai uut sa’e mak’as. Estarada at ne’e maka difikulta komunidade Lore I atu ba merkadu, eskola, sentru saúde no atu ba hospital sira susar tebes.

“Estrada husi Lospalos villa mai to’o iha Lore I ho kilo metru (KM) maizu menus 20,  ne’ebé konstrui husi Governu Indonezia nia durasaun besik tinan 46 ona. Maka, merese atu at duni ona. Nune’e Governu Timor-Leste, tuir loloos identifika hodi hadia dau-daun ona,” Abilio dehan.

Distansia KM 20 ne’e fó sentimentu tristeza ba Inan Isin rua, Flora da Silva. Nia hatete, tinan barak ona TL ukun an. Maibé, komunidade la-asesu ba saúde. Tanba, sentru saúde dook. Kondisaun estrada at, difikulta viajen ba inan isin rua sira.

“Tinan barak ona ita ukun an. Maibé Govenu nunka tau matan ba estrada liga mai Suku Lore I nian. Nune’e, transporte laiha hodi transporta pesoál saúde sira mai Suku Lore I. Maka, maioria inan isin rua sira la-hetan vasinasaun. No maioria moos partus de’it iha uma”, Flore deklara ho mata ben nakonu.

Sentru saúde sukat husi Flora nia uma, maizu menus kilo metro hitu. Bainhira ba konsulta isin rua nian katak Flora, lao ain ba to’o sentru saúde tenki hein doutor no parteira sira. Maka sira laiha ona ka kontatu dehan sira labele mai, obrigatoriu tenki fila mai uma ona.

Tuir informasaun ne’ebé Media ONE Timor asesu iha terenu hatete, iha tinan 2019 Institutu Jestaun Ekipamentu mai sukat ona estrada ne’e hodi ateru to’o deit iha fronteira Suku Lore I, iha Aldeia Tchai. Sorin rohan de’it. No husik abandona deit to’o tinan 2024 ne’e.

Suku Lore I hatuur an iha Postu Administrativu Lospalos, Munisipiu Lautein ho ninia aldeia maka hanesan;  Horolata, Maluro, Otcho-Tchau, Tchai, Titilari no Aldeia Vailana. Suku Lore I ho nia luan hamutuk Área 133,77 km².

Espera Governu Konstitusionál da IX bele tau matan ba Suku Lore I no Suku Lore II ne’ebé nia distansia sukat husi Lospalos villa maizu menus kilo metro 32. No suku rua ne’e nia totál populasaun besik rihun 16. Kondisaun estrada grave ne’e, konsege halo kareta taka fila hodi rezulta nain lima mate. No nain tolu seluk kanek todan. (Asesu Youtube/Facebook https://www.facebook.com/Media1Timor Media ONE Timor)