Ministeriu Agrikultur La-iha Resposta, Mudansa Klimatika Estraga Agrikultor Nia Plantasaun

(Reportajen Jornalista Media ONE Timor-Mariquita Freitas)

Dili (www.mediaonetimor.co) – Mudansa klimatika halo udan monu rai la tuir nia tempu. Nune’e, fó impaktu ba agrikultor hirak ne’ebe kuda batar no aihan sira seluk hetan estraga hotu.

Ba Jornalista hirak ne’ebé hala’o hela atividade Media Tour iha Suku Lore I, Lospalos, Lautein, ne’ebé hetan apoiu husi Oxfam Timor-Leste (TL) no realiza husi Asosiasaun Jornalista Timor Lorosa’e (AJTL), Xefi Suku Lore I, Abilio Amaral no ida husi Komunidade Lore I, Jelia Fernandes hatete, aihan hirak ne’ebé hetan ona estraga husi lakataru ne’e halo ami kole saugate de’it.

Tos batar besik hektsres haat ne’ebé hetan estragus husi lakataru no mate hotu tanba mudansa klimatika ne’ebé akontese iha Suku Lore I. (Foto MOT/Mariquita Freitas)

Maske agrikultor sira esforsu atu hasa’e produsaun iha tempu mudansa klimatika, maibé esplika Xefi Suku Lore I, Abilio Amaral katak, tanba udan mai la tuir nia tempu maka animál lakataru estraga totál.

“Bainhira udan mai tuir nia tempu maka animál lakataro ne’e sei mate hotu. Maibé, kuandu udan mai tiha depois para fila fali to’o semana ida ka rua, animál lakataru mai han estraga tiha komunidade sira nia batar”, Xefi Suku Abilio dehan.

Nia hatutan, problema lakataru estraga hotu agrikultor nia plantasan ne’e hato’o ona ba Ministeriu Agrikutura hodi husu aimoruk hamate lakataru. Maibé, Ministeriu Agrikultura to’o ohin loron la-iha resposta.

Nune’e hatete Xefi Suku Abilio katak, Organizasaun Não Govermental (ONG) Food and Agricultor Organisation (FAO) mak mai halo promosaun kona-ba aimoruk hamate ular lakataru husi aihan hirak ne’ebé kuda ona ne’e.

Mudansa Klimatika halo batar mate hotu no duut maka nakonu iha tos laran.

Lee Notísia Relevante : Konsulta Popular Lori Marciana Ba Sofrementu Fiziku

Lee Notísia Relevante: Maioria Inan Isin Rua Partus Iha Uma, Komunidade Perkupa Estrada At

Iha parte seluk ida husi toos na’in, Jelia Fernandes ba Jornalista sira konfesa katak, kuandu udan monu rai ona komunidade kuda batar no aihan sira seluk. Hafoin moris buras, derepente udan para tiha. Maka animál lakataru sei han hotu tiha iha tempu udan para ne’e.

“Kuandu seidauk to’o tempu maka udan mai ona, komunidade Lore I senti triste. Tanba sei fó impaktu ba agrikultor hirak ne’ebé kuda batar no ai han sira seluk. Mudansa klimatika mundiál ne’e halo udan mai tiha para derepente. No derepente mai fali”, Zelia hatete.

Nia esplika liutan, mudansa klimatika ne’ebé fó impaktu ba udan monu rai no para derepente ne’e sei loke oportunidade ba animál lakataru han mohu aihan iha plantasaun laran. Liu-liu batar hirak ne’ebé buras los ona.

“Triste tebes lakataru estraga hotu ami nia sakrafisiu ne’ebé halo ona durante tinan tomak. Ami serbisu kolen rejultadu laiha”, dehan Jelia hodi hatutan, udan mai la tuir nia tempu. Agrikultor sira nia aihan iha toos laran hetan estraga hotu. Liu-liu batar hektares ba hekatares, lakataru estraga hotu.

Jelia konta katak, iha Suku Lore I kria ona groupu agrikultor konservasaun kuda batar. Objetivu harii groupu ne’e atu hatene maneja kuda aihan iha toos laran. Hanesan, kuda batar tenki kuda mos ho fore rai. Hatene atu fó buras ba batar.

Nune’e Jelia dehan, nia hamutuk ho kolega nain 13 seluk halibur an iha groupu agrikultor konservasaun kuda batar iha tinan 2012. Dezde tinan 2012 udan mai tuir nia tempu, iha fulan Novembru. Batar nia rezultadu di’ak los. Dala ruma koilleta to’o bidon boot 10 ba leten.

“Mudansa klimatika seidauk akontese, ami senti kontente. Tanba, rejultadu halo toos di’ak. Silu batar to’o bidon 10 ba leten. Maibé, hafoin akontese mudansa klimatika, udan mai la tuir ona nia tempu. Nune’e rejultadu ba ami nia kolen laiha”, dehan Jelia ho intonasaun triste.

Jelia dehan, batar ne’ebé sira kuda uza ba; han, fó han manu no balun seluk lori ba fa’an iha merkadu. Katak, maioria komunidade Suku Loren I nia moris depende ba iha batar. Maibé, atu aumentatan rendementu maka komunidade sira ba koa tua no fa’an nu’u maran.

Haktuir Jelia, hahú iha tinan 2022 to’o tinan 2023 batar ne’ebé kuda nia rezultadu la di’ak. Mudansa klimatika halo udan mai sedu iha entre fulan Marsu ka Maiu. Udan mai para-mai para. Udan la tuir nia tempu.

Jelia hatutan, iha tinan 2023 udan mai to’o iha fulan Dezembu para tiha. No tama iha fulan Marsu tinan 2024, udan kumesa fali ona. Udan mai para-mai para nune’e halo batar balun mate no balun seluk konsege moris. Maibé nia rejultadu ituan de’it.

“Iha tinan 2024 ami kontinua kuda batar. Maibé, udan kumesa para tiha iha fulan Abríl 2024 to’o de’it agora. Maka, animal lakataru kumesa moris hodi han estraga tiha batar tahan. Maibé kuandu udan kontinua to’o batar folin ona maka lakataru seo mate hotu”, Jelia esplika.

Nune’e Jelia lori groupu agrikultor konservasaun kuda batar nia naran husu ba autoridade lokál, NGO FAO no moos Ministeriu Agrikultura atu mai hare diretamente no lori moos aimoruk hodi bele hamate tiha lakataru ne’e no buka moos alternativa seluk.(Asesu Youtube/Facebook https://www.facebook.com/Media1Timor Media ONE Timor)