OPINIAUN: Funsaun no Tékniku Auditoria

(Hakerek Nain Formadu Hakerek Imprensa Ceftec Julio Ximenes Belo)

Auditoria nu’udar atividade evaluasaun ba organizasaun, kompaña no instituisaun ida, hahú hosi sistema, prosesu to’o ninia produtu. Auditoria mós hanesan termu ida ne’ebé uza hodi halo prosesu ezaminasaun ka teste. Signifika, auditoria ne’e baibain iha relasaun ho ezame ba aprezentasaun relatóriu finanseira iha; empreza, organizasaun no instituisaun.

Tuir sentista Sukrisno Agoes katak auditoria hanesan ezaminasaun ne’ebé realiza hosi parte independente ho forma krítika no sistematika ba relatóriu finanseira, rejistu finanseira, inklui evidénsia suporta sira ne’ebé prepara hosi ajente administrasaun empreza relasaun ho opiniaun sobre viabilidade relatóriu finanseiru. Auditoria hanesan prosesu atu halo evaluasaun ba organizasaun, sistema, operasaun ka produtu (F.A. Suryono, 2013). The economic Times hateten, auditoria hanesan ezaminasaun ba livru to’o investigasaun fiziku atu garante katak departamentu iha organizasaun laran ka empreza ne’ebé hala’o tuir sistema rejistu dokumentadu.

Hosi definisaun iha leten, bele sumariza auditoria hanesan prosesu sistematika ne’ebé utiliza hodi halo teste ba viabilidade relatóriu finanseira inklui prosesu administrasaun no finanseira iha organizasaun ka intituisaun relevante, hodi nune’e bele garante no hala’o tuir nafatin padraun kontabilidade iha prosesu ezekusaun orsamentu.

Funsaun auditoria atu garante sistema kontabilidade inklui melloramentu empreza atu proteze kontra distorsaun ou fraude. Auditoria signifika funsiona atu garante presizaun relatóriu finanseiru ne’ebé aprezenta hosi organizasaun ou empreza. Ema ne’ebé halo auditoria konsidera hanesan auditor.

Atualmente, auditoria nia funsaun komesa habelar no ezerse mós nia funsaun hanesan fiskalizasaun. Tanba ne’e mak auditor bele halo auditoria ba operasionál. Auditoria ba planezamentu stratejia. No auditoria sistema eletroniku, inklui Informasaun no Téknolojia (IT). Tanba funsaun auditoria halo prevensaun ba infrasaun ka kontra no fraude ka bosok sira ne’ebé akontese.

Enzeral, auditoria hanesan avaliasaun formal ba relatóriu finanseira ne’ebé produz hosi individuál, negósiu ka organizasaun. Implementasaun auditoria iha série prosesu no mós espasu atu apoiu prosesu ne’e. Bai-bain hanaran prosesu auditoria. Auditoria ne’e rasik iha tipu rua, mak hanesan:

Auditoria interna: auditoria interna baibain hala’o hosi funsionáriu interna ne’ebé halao knaar iha organizasaun ka empreza ida. Auditoria internal ne’e nia objetivu atu hadia no halo prevensaun ba mal administrasaun hodi kontribui ba bom jestaun finanseira.

Funsaun hosi auditoria interna maka halo kontrolu no halo indentifikasaun ba atividade hotu-hotu ne’ebé jestor/direzente ba labele kobre hotu hodi foti desizaun nune’e mos bele apoiu iha área tékniku ruma hanesan halo relatóriu. Tuir matenek nain Sawyer’s (2005) hateten funsaun auditoria interna mak, halo indentifikasaun, apoio no ajuda jestaun iha area tékniku, halo reporting (pelaporan) no ajuda prosesu desizaun.

Auditoria externa mak prosesu audotoria ne’ebé realiza hosi parte externa hanesan Tribunal De Contas, mak hanaran auditor indepedente. Enzeral, relatóriu auditoria externa ne’e konten opiniaun sobre viabilidade relatóriu finanseira. Nune’e mós rekomendasaun ne’ebé iha ligasaun ho infrasaun no fraude ne’ebé komete, hodi nune’e iha futuru bele hadia no sei la akontense tan.

Iha espasu espesifiku 6 iha prosesu auditoria ne’ebé tenki halo tuir hodi nune’e lao ho susesu, mak hanesan tuir mai ne’e:

1. Husu dokumentus ne’ebé presiza.

Kuandu halo ona konfirmasaun, auditor sei tun ba hala’o      auditoria. Auditor sei husu dokumentus ne’ebé relasiona ho nesesidade auditoria. Baibain auditor prepara cheklist ba nia kliente. Fatin ne’ebé atu halo auditoria. No dokumentus saida mak auditor sira presija. Dokumentus sira ne’ebé presija, hanesan resivu relatória anterior, estratu banku, resivu finanseira, livru rejistu (cash book) no estrutura organizasaun. Inklui lista kosellu diretivu ne’ebé iha relasaun.

2. Prepara planu auditoria.

Auditor sei halo avaliasaun ba informasaun ne’ebé rekolla, hodi sei halo planu preparasaun ba prosesu auditoria. Auditor hotu-hotu iha jestu audit ne’ebé diferente. Maibé tenki lao tuir nafatin regulamentu no prinsipiu kode étika auditoria nian. Workshop risku sei hala’o hosi ekipa auditoria hodi halo indetifikasaun. No posibilidade sei mosu problema durante prosesu auditoria ne’e lao. Alende ne’e auditor planeia estratejia hodi responde ba problema ka diskusaun ne’ebé ekipa auditoria hala’o ona.

3. Orariu reuniaun aberta (enkontru nakloke).

Auditor presiza konvoka enkontru hodi konvida superior hirarkia ka jestor sira no funsionáriu responsavel ne’ebé iha ligasaun ho auditoria hodi aprezenta lala’ok auditoria durante durasaun tempu auditoria. Inklui problema seluk ne’ebé presiza deskuti relasiona ho auditoria. Aliende ne’e husu atu apoiu hodi nune’e auditoria ne’e lao ho di’ak. Tanba iha posibilidade halo entervista ho auditor.

4. Komesa hala’o atividade iha terenu.

Auditor hahú rekolla informasaun hosi reuniaun aberta ka nakloke hodi utiliza sai planu ba auditoria. Depois de realizasaun planu servisu ka atividade komunika ho elementu funsionáriu responsavel no sei halo revizaun ba prosedimentu no prosesu auditoria. Auditor sei koko onestidade ka obediédia ba funsionáriu ka kliente sira nian sobre rejistu. No relatóriu finanseira tuir duni akuntabilidade finanseira nian ka lae. Evaluasaun ba kontrolu interna ida ne’e atu garante katak ezekusaun orsamentu/atividade tuir duni forma konfiabel no adekuadu (memadai). Auditor sei halo diskusaun ho kliente ka funsionáriu responsavel kona-ba akontesimentu ka difesensia no sei fó opotunidade ba sira atu fó feedback.

5. Kompilla relatóriu (menyusun laporan).

Auditor sei prepara relatóriu sobre auditoria ne’ebé hala’o ho nia konteudu ne’ebé detallu inklui deskobrementu sira durante prosesu auditoria. Relatóriu ne’e sumariza hosi erru ka sala matematika, deskobrementu materiais no imateriais no deskobrementu seluk-seluk tan. Auditor sei hakerek komentariu relasaun ho deskobertu auditoria no fó rekomendasaun hodi solusiona difesensia ka irregularidade hodi nune’e iha futuru labele akontese tan.

6. Prepara reuniaun enseramnetu (taka enkontru).

Auditor husu feedback no aprovasaun ba kliente ne’ebé relasaun ho problemas no deskobrementu ba relatóriu auditoria ba reuniaun eseramentu. No auditor mós sei lahaluha atu esplika deskrisaun planu asaun jestaun atu solusiona problema. Deskobrementu ne’e inklui data solusaun konkordansia nian. Reuniaun enseramentu ne’e ba parte hotu-hotu ne’ebé involve iha diskusaun relatóriu auditoria no resposta jeresiamentu ho maduru. Se kuandu iha problema ruma imediatamente rejolve no buka solusaun iha reuniaun enseramentu.

Maibé bainhira atu halo auditoria ruma, utiliza metódu no téknika bazika auditotia nian. Metódu auditoria mak hanesan; rekolla evidensia no dokumentus suporta, verifika no avalia viabilidade ba evidensia, halo entervista no klarifikasaun, halo inspesaun físiku no realiza enkontru.

Enkuantu téknika bazika mak hanesan:

1. Preparasaun

• Ekipa inspesaun no auditoria tenke prepara planu ba entervista, objetivu ba entrevista, perguntas prinsipais ne’ebé atu responde hosi entervistadu;
• Prepara linguajem adekuada hodi aborda durante entervista;
• Prepara trajeta ka hatais apropriadu;

2. Hahu entevista

• Molok hahu entervista, ekipa auditoria tenke buka estabelese relasaun kooperasaun no konfiansa ho ema entervistadu hodi kria ambiente amijavel durante entervista;
• Aprezenta ekipa auditoria;
• Aprezenta ba intervistadu kona-ba objetivu entervista, tipu informasaun ne’ebé sei husu;

3. Dezenvolvimentu

• Auditoria tenke oferese perguntas ka kestionáriu ho di’ak para bele hetan informasuan relevante;
• Auditoria tenke tau atensaun ba objetivu entervista. Evita atu labele destroi ka halai fali ba pergunta seluk. No dezvia asuntu ne’ebé diskute hela;
• Durante entrevista iha prosesu auditoria tenke evita monopoliu koalia. Tenke rona moos entervistadu no labele interompe;
• Karik mosu dezviu ruma, auditoria tenke avalia informasaun foun. Hafoin deside kontinua ka fila fali ba assuntu inisiál;
• Tenke arkiva fotografia durante entervista.

4. Papel servisu

• Papel servisu nu’udar dokumentu ida ne’ebé formula kona-ba evidensia, informasaun hodi bele fo forsa ba konkluzaun no rezultadu inspesaun nian;
• Papel servisu ne’e elabora ho forma manual ka forma eletronika, hafoin tau hamutuk ho dokumentu sira ne’ebé examina no evidensia.

Atu konklui katak auditoria hanesan funsaun avalisaun, verifikasaun ba dokumentu hotu-hotu. No mós atividade sira ne’ebé hala’o hosi empreza, organizasaun no instituisaun ruma hodi nune’e bele prevene erru ka difesensia no irregularidade ruma ne’ebé mak akontese. Auditoria nia objetivu prinsipál mak evita mál administrasaun no finanseira hodi kontribui ba boa jestaun.

Referensia

Agoes, Sukrisno. 2004, Auditing (Pemeriksaan Akntan) oleh Kantor Akuntan

2013. A. Suryono, 2013. “Perancangan Perangkat Audit Keamanan Informasi: Studi Kasus Pusat Komunikasi Kementerian Luar Negeri,” Universitas Indonesia, Depok.

Lawrence B. Sawyer, Mortimer A. Dittenhofer, James H. Scheiner (2005). Internal Auditing audit internal. Terbitan salemba empat. Asesu Youtube/Facebook https://www.facebook.com/Media1Timor Media ONE Timor)