Feto Potensiál Baucau Prontu Partisipa Dezemvolvimentu

(Reportajen Jornalista Iria Da Cunha)

Baucau (www.mediaonetimor.co⁠) – Preparasaun husi asosiasaun feto potensial sira no apoiu husi governu sentral ne’ebé aumenta husi 2% ba 5% hatudu katak feto sira komesa nakloke an atu partisipa iha dezenvolvimentu Timor-Leste (TL) nian.

Lee Notisia Relevante: “Diskute Desentralizasaun no Preparasaun Poder Lokal 2027,  Secoms Realiza Meet The Press Iha Munisipiu Baucau”

“Progresu ne’e akontese neneik maibé kontinua ba beibeik. No fó esperansa katak feto sira sei iha oportunidade boot liu atu kompete iha futuru. Nune’e, partisipasaun feto iha setór produtivu mos sei aumenta.”

Hatete Prezidente Autoridade Munisipiu (PAM) Baucau, Veneranda Lemos Martins ba jornalista Media ONE Timor no jornalista sira hosi media sira seluk husi Kapitál Dili no mos media hirak ne’ebé hala’o knaar iha Munisipiu Baucau, Viqueque no Lospalos ne’ebé  partisipa iha meet the press, ne’ebé organiza no modera husi Sekretaria komunikasaun sosial (Secoms), Expedito Loro Dias Ximenes ho bainaka espesial Ministru Estatál, Tomás Do Rosario Cabral, iha Munisipiu Baucau, iha semana dahuluk Fulan Abríl 2026.

Maibé relasiona ho desentralizasaun poder lokal PAM Veneranda afirma katak, Munisípiu Baucau prontu tebtebes atu simu mudansa poder lokál. Asosiasaun feto iha Baucau sei servisu hamutuk ho entidade relevante sira hodi prepara kondisaun diak ba feto sira.

Iha parte seluk, PAM Veneranda hateten katak iha Baucau iha ona grupu emprezáriu feto ne’ebé organiza an iha Câmara Komérsiu no Indústria Timor-Leste (CCI-TL) Baucau. Asosiasaun ne’e kompostu husi feto sira deit, ne’ebé hala’o negósiu oioin inklui restorante no atividade produtiva seluk.

PAM Veneranda enfatiza katak, asosiasaun feto emprezáriu ne’e la haree diferensa. Maibé hametin solidariedade atu fó kontribuisaun ba ekonomia lokál. Feto emprezarial sira iha Munisipiu Baucau  sai exemplu ba lideransa no independénsia ekonomika.

Antes remata PAM Veneranda husu ba feto sira atu labele tauk. Maibé prepara an ho didiak no konfiante. Nia enkoraja feto sira atu aprezenta an nu’udar lider potensiál hodi partisipa iha kompetisaun polítika no dezenvolvimentu iha tinan 2027.

“Ba feto maluk sira katak, lalika tauk prepara an ho didiak, aprezenta an nafatin nu’udar feto potensial iha Muisipiu Baucau atu bele tuir kompetisaun ba tinan 2027,” katak PAM Veneranda.(Asesu Youtube-https://www.youtube.com/@Media1Timor/Facebook- https://www.facebook.com/Media1Timor/Iha moos Kursu Jornalizmu no Lian Inglesh)