Kestiona Kapasidade Lú Olo-Marii Alkatiri, Militante Fretilin Hato’o Petisaun

(Reportajen Jornalista Media ONE Timor Adelina Fátima)

Díli (www.mediaonetimor.co) –  Fuan moras ba derota iha eleisaun presidensiál no eleisaun parlamentar tinan 2023 liuba, maka militante no kuadru sira kestiona kapasidade Prezidente Partidu Frente Revolusionáriu  Timor-Leste Independente (Fretilin-sigla português), Francisco Guterres Lú Olo no Sekretáriu Jerál Mari Bin Amude Alkatiri ne’ebé lidera durante tinan 20 laiha kapasidade.

“Kuandu iha partidu ida nia laran maka lideransa sira la kumpri deveres, obrigasoens tenki kestiona sira nia kapasidade. Tanba ne’e maka ohin ami entrega ona petisaun ba iha sede komite sentral Fretilin nian para atu hadia asuntu ne’e.”

Lia fuan ne’e hato’o husi porta voz militante no kuadru Partidu Fretilin, José Agustino Sequeira ‘Somotxo’ liu husi konferensia imprensa ne’ebé hala’o iha Sede Komité Sentral Fretilin, Comoro, Kuarta, (31/01/2024).

Katak Somotxo, militante no kuadru barak maka fuan moras. Lakon esperansa ho lideransa atuál Prezidente Partidu Fretilin Francisco Guterres Lu Olo no Sekretariu Jerál Partidu Fretilin, Marii Bin Amude Alkatiri nia kapasidade para hetan vitoria iha eleisaun tuir mai.

Hatete Somotxo, Fretilin partidu masa. Hamri’ik nu’udar kolektivu ida. Maka, hotu-hotu presiza desizaun kolektiva. Laos ba de’it asuntu balun, no orgaun kolektivu sira hanesan komite sentral. Maibé, presiza mós transparansia, iha opsaun politika estratéjika, distribuisaun rekursu finanseiru no mós materiais ba estrutura baze hodi exekuta.

“Dala barak unipessoalmente la tau iha konsiderasaun. Realidade konjuntura polítika Timor-Leste nian iha nível munisipiu no postu administrativu la tau konsiderasaun. Maka derota iha eleisaun ne’e akontese”, Somotxo dehan hodi hatutan.

Tenki fortifika iha tátiku oprasionál partidu nian iha nivel baze. No haforsa opsoens estratéjika no distribuisaun rekursu ne’ebé lider partidu nian determina ona. Maibé, durante ne’e la hala’o tuir opsaun ne’e.

Nune’e maka nu’udar militante no kuadru Partidu Fretilin hato’o petisaun ba Prezidente Partidu Fretilin Lu-Olo, Sekretariu Jerál Marí Bin Amude Alkatiri no membru komité sentral Fretilin ho konteúdu sira hanesan tuir mai:

1. Ho ne’on hakra’ik an no laran susar, ami lamenta tebes ho rezultadu eleisaun parlamentar ne’ebé hala’o iha loron 21 Maiu 2023, ne’ebé hatudu katak Fretilin lakon. Ho lia fuan seluk katak hetan derotasaun. At liu iha ístoria pos-restaurasaun independênsia ne’ebé halo militante no kuadru barak nia fuan moras.
2. Husi ne’e maka ami nota katak, votus ho 57,37% (55 kadeiras iha assembleia konstituente) ne’ebé Fretilin hetan iha eleisaun tinan 2001, tanba meritu ístoriku husi prosesu libertasaun pátria. Iha sorin seluk, maske númeru eleitór iha TL aumenta ba 99,2% husi tinan 2001 to’o 2023. Lideransa Prezidente Partidu Lu Olo no Sekretariu Jeral Marí Alkatiri, Fretilin nia votus tu’un hela de’it durante mandatu tinan 20 nia laran. Nunka rekupera fali hanesan iha tinan 2001. At liu tan tu’un to’o 25,75% ka ekivalente de’it ho kadeira 19 iha eleisaun loron 21 Maiu
3. Iha sorin seluk, Prezidente Partidu, Kamarada Lu Olo no Sekretariu Jeral Marí Alkatiri, wainhira Fretilin manan mos la ukun. Maske ukun tiha mos, adversáriu polítiku sira hamonu hikas hanesan iha eleisaun 2007 no eleisaun 2017. Maibé nafatin halo insidensia parlamentar no viabiliza hanesan iha eleisaun 2012 no eleisaun 2018. Hafoin viabiliza tiha mos eleisaun Fretilin lakon at liu tan, hanesan iha eleisaun parlamentar 2023.
4. At liu tan Munisipiu Baukau, Lautem no Vikeke ne’ebé tradisionalmente Fretilin sempre manan mínimu 50%. Maibé iha eleisaun 21 Maiu 2023 hetan Votus entre 8% to’o 16% kompara ho rezultadu eleisaun antisipada tinan 2018.

Aliende ne’e, militante no kuadru partidu argumenta, liu husi petisaun ida ne’e ba Fransisco Guterres Lu Olo no Marí Bin Amude Alkatiri atu asume responsabilidade ba derota hirak ne’ebé akontese.

“Atu evita Fretilin ninia derota definitiva iha eleisaun sira tuir mai, maka tenke halo renovasaun ba Partidu Fretilin hodi prepara vitória ba eleisaun. Petisaun tenke kestiona lider atuál kamarada Lu-Olo no kamarada Marí Alkatiri”, Somotxo salienta.

Entertantu figura importante ne’ebé hamri’ik hodi entrega petisaun ne’e hamutuk na’in 15. Hanesan; Jose Agustino Sequeira ‘Somotxo’, Rui Maria de Araújo, Osório Florindo da Costa, Alex Tilman, Inácio F.Morreira, Edmundo Ximenes de Sá, Aurélio Sérgio Guterres, Domingos M. Sarmento,  Maria José de Carvalho Soares, João Antônio Lobo Ferreira, Fidélio Pires Pereira, Flávio Simões, João Ximenes, Afonso Aleixo, Adalgisa M.S. Ximenes. Inklui petisioner na’in 2.500 ne’ebé mai husi munisipiu no RAEOA. (Asesu Youtube/Facebook https://www.facebook.com/Media1Timor Media ONE Timor)