(Reportajem Jornalista Estajiada Media ONE Timor-Ermelinda Colo)
Oekusi (www.mediaonetimor.co) – Fasilita estudante finalista hirak ne’ebé maka hakarak atu tuir teste tama Universidade Nasionál Timor-Lorosa’e (UNTL) servisu hamutuk ho Instituto Nacional de Formação de docentes e Professionais da Educação de Timor-Leste (Infordepe-Sigla Portugues) no Ministeriu Ensinu Superior, hamutuk fahe bulletin no fó informasaun kona-ba rejistrasaun estudante ba anu letivu tinan 2025 nian.
Tuir Xefe Departamentu Infordepe, Damião da Costa no reprezentante husi UNTL, Sebastião Pereira iha fatin hanesan ba Jornalista esplika katak, informasaun ne’e hato’o liu husi enkontru dezaminasaun prosidementu formatu bulletin UNTL nian ba profesor eskola Secundariu sira iha Oe-Cusse ne’e realiza tanba iha tinan hirak liuba akontese faillansu barak.
Enkontru ne’ebé hala’o iha Rejiau Administrativa Espesial Oe-Cusse Ambenu (RAEOA), loron 18 fulan Setembru tinan 2024 ne’e, tuir Xefe Departamentu Infordepe, Damião da Costa katak, enkontru dezaminasaun informasaun prosedimentu formatu UNTL ne’e, realiza hodi minimiza faillansu sira.
“Tamba akontese failansu barak iha tinan hirak liu ba, alunus finalista balun la dun komprende kona-ba prosedimentu formatu rejistrasaun UNTL nian. Nune’e, presija dezimina informasaun ho klean. Liu-liu ba professores sira iha ida-idak nia eskola hodi fó orientasaun di’ak ba alunus sira”, Damião dehan.
Maibé Damião hatutan tan, prosesu rejistrasaun ne’e sei realiza bainhira estudante sira remata ona sira nia ezame final anu letivu tinan 2024 nian. No estudante sira la presiza hein valor, sira bele ona priense formulariu hirak ne’e.
Hanesan públika ona katak, iha RAEOA iha eskola sekundariu hitu, ne’ebé fahe ba eskola sekundariu jeral haat. No eskola tékniku ofisial tolu.
“Ho informasaun ne’ebé esplika ona ne’e, espera estudante sira bele implementa ho di’ak, bainhira sira remata ezame finalista tinan 2024 nian, bele priense kedas formatu ne’ebe mak UNTL entrega tiha ona ba kada eskola sekundariu”, Damião dehan.
Lia fuan hanesan mos hato’o husi reprezentante UNTL, Sebastiao Pereira. Nia hatete, bulletin ne’ebé fahe no informasaun ne’ebé fó ona ne’e atu estudante sekundaria ne’ebé finalista ona bele asessu informasaun antes.
“Ami sei ba iha kada eskola sekundaria hodi fahe buletin. Nomos fahe informasaun kona-ba oinsa atu priense formulariu. Ami sei esplika klaru kona-ba priense formulariu hodi estudante hirak ne’ebé iha interese tama UNTL bele hatene ho klean”, Sebastião deklara.
Iha parte seluk Ajuntu Direitor Ensinu Baziku, Baqui José Antonio Abi hatete, ho informasaun ne’ebé fahe ona husi UNTL ba estudante finalista sira iha RAEOA ne’e bele sai hanesan matadalan para sira kontinua sira nia estudu ba UNTL.
“Ha’u haksolok tebes ba informasaun ne’ebé fahe ona husi UNTL mai estudante finalista iha RAEOA. No fó oportunidade tomak ba estudante sekundariu finalista sira atu bele asesu informasaun antes ezame final nian, hotu-hotu bele priense formatu husi UNTL nian hodi kontinua sira nia estudu”, Sebastião dehan hodi hatutan.
Informasaun ne’ebé fahe ona ne’e bele fó informasaun ne’ebé naton ba estudante sira hodi kumpriende kona-ba presidementu formatu tama iha UNTL, ba hirak ne’ebé atu tuir teste ba Universidade refere. (Asesu Youtube/Facebook https://www.facebook.com/Media1Timor Media ONE Timor)
Ita nia komentariu konaba post ne'e.