Boa Viagem Aman Taekwondo Timor-Leste

(Reportajen Editor Suzana Cardoso)

DILI (Media ONE Timor) – Dedika aan iha vida taekwondo durante liu tinan 34, transforma Matebian Master Taekwondo Luís de Jesus Lemos sai pesoál ne’ebé ho karakter terminasaun aas, dixiplina, integridade no honestu. Maibé, domin na’in bainhira lidera nia atleta sira no moos sai xefi família.

Tuir profil ne’ebé tabloid Media ONE Timor públika iha edisaun semana datoluk Fulan Maiu Tinan 2017 ho titlu; “Taekwondo Desizaun Moris” hateten, Matebian Master Taekwondo Luís de Jesus Lemos kuñese taekwondo dezde tinan 1988 iha Dojan Xionál no agora kuñesidu ho edifisiu Sekretariu Estadu Joventude no Desportu (SEJD).

.“Hau kuñese Taekwondo iha tinan 1988, bainhira tu’ur iha SDK (Sekolah Dasar Katolik-Indonezia) Balide iha klase VI. To’o Timor-Leste (TL) ukun a’an sei nafatin dedika a’an hodi fó treinu foin sa’e sira”, hateten oan mane boot hosi maun alin na’in 13 iha momentu ne’ebá bainhira Media ONE Timor halo intervista iha nia Sekretariadu Dojan Koni.

Matebian Master Taekwondo Luís moris iha Dili, 4 Marsu 1973, oan husi Aman Matebian Afonso Correia de Lemos no Inan Esmeralda de Jesus,  hela iha Suku  Mascarenhas, Postu Adminitrativu Cristo Rei, Dili.

Durante Aman husi oan na’in 5 nu’udar rezultadu hosi forma uma kain iha tinan 1999 hamutuk ho feen kaben Carmen Souza Bucar Cortereal, nia moris sempre hakonu ho atividade taekwondo. Iha tempu okupasaun Indonezia prestasaun barak maka Matebian Master Taekwondo Luís halibur ona. Hafoin ukun aan, dezemvolve hodi haburas taekwondo iha TL.

Katak Matebian Master Taekwondo Luís, hafoin ukun aan atleta taekwondo husi tempu okupasaun Indonezia bolu no halibur malu hodi organiza Federasaun Taekwondo para partisipa kompetisaun iha Olimpiade Sydney, Australia.

Tuir alumni STMN (Sekolah Teknik Menengah Negeri-Indonezia) Becora iha tinan 1994 ne’e, fila husi Sydney taekwondo nia naran kumesa morin to’o agora. Hosi partisipasaun federasaun taekwondo iha kompetisaun internasionál barak ona maka Bandeira TL hasa’e lemo-lemo iha mundu.

Senti kontribuisaun seidauk kompletu, Matebian Master Taekwondo Luís, kontinua nia estudu iha UNTL. Termina ho Bacharelado (S1) iha tinan 2019, Fakuldade Edukasaun Arte no Humanidade, Departamentu edukasaun fiziku desportu. Ho titlu monografia ‘Importansia exersisiu, flexibilidade ba dominasaun tékniku tebe (Dolyo Chagi) husi atleta taekwondo ho kategoria tinan 10 to’o 15 iha Dojan ka klubu Koni, TL.

Hosi dedikasaun nia aan tomak ba dezemvolvimentu Federasaun Taekwondo Timor-Leste (FTTL) maka rezulta prestasaun karriera professional hanesan:

1. Fundador prinsipál taekwondo TL, hamutuk ho atleta taekwondo na’in sia sira seluk.
2. Treinador no responsavel jerál ba Dojan ka klubu Koni hahú iha tinan 2000 to’o hakotu iis.
3. Hosi tinan 2002 to’o tinan 2006 sai nu’udar prezidente dahuluk ba FTTL.
4. Iha tinan 2006 to’o tinan 2010 Matebian Master Taekwondo Luís husik hela família hodi ba buka srvisu iha Inglatera.
5. Iha tinan 2010 to’o tinan 2015, hafoin fila husi Inglatera, Matebian Master Luís re-elitu fila fali nu’udar Prezidente FTTL.
6. Aliende hanesan Prezidente FTTL, Matebian Master Luís moos hala’o nia knaar nu’udar Xefe lojistiku iha Confederação Desportu Timor-Leste (CDTL).
7. To’o hakotu iis, Matebian Master Taekwondo Luís, kontinua ho nia komitmentu atu dezemvolve iha area desportu nu’udar funsionariu iha CDTL, kumesa iha tinan 2015.

Prestasaun nu’udar atleta taekwondo:   

1. Tinan 1992 Matebian Master Taekwondo Luís hetan terseiru lugar ho medalla preta iha Kampionatu Kejurda Timor-Timur iha Batam, Indonezia.
2. Tinan 1994 Matebian Master Taekwondo Luís sai hanesan terseiru lugar ho medalla preta iha Kampionatu Kejurnas Taekwondo no kelas Bantan Señior mane.
3. Tinan 1994 sai primeiru lugar hodi hetan medalla osan mean iha kelas Bantan señior mane.
4. Tinan 1997 sai hanesan primeiru lugar hodi hetan medalla osan mean iha kejuaraan Taekwondo Timor-Timur klase Bantan señior iha Indonezia.

Matebian Master Taekwondo Luís Gradua ba Nivel Sintu metan hanesan  Treinador Taekwondo iha tinan 1994 to’o hakotu iis ho prestasaun treinador maka hanesan:

1. Iha tinan 2002 treinador ASEAN Games University iha Korea do Sol.
2. Tinan 2004 sai hanesan treinador nivel kampionatu internasionál iha Yogyakarta, Indonezia.
3. Tinan 2005 treinador kampionatu CPLP iha Macau
4. Tinan 2011 nu’udar treinador ba ekipa nasionál taekwondo ba eventu Sea Games rezultadu medulla Bronze ida hosi atleta femenina hosi Jakarta, Indonezia.
5. Tinan 2013 sai nu’udar treinador ba ekipa ASEAN University Games Taekwondo iha Laos no nia rejultadu hetan medalla bronze tolu.

Maibé prestasaun hirak ne’e hela hanesan memoria de’it ona. Hafoin selebra loron moris ba-49 iha tinan 2022 ne’e, Luís de Jesus Lemos tenke hakotu nia luta ba dezemvolvimentu Taekwondo Timor-Leste nian.

Hafoin baixa iha Hospitál Nasionál Guido Valadares (HNGV) tanba moras komplikadu durante semana ida,  iha loron finadu 2 Novembru 2022 Luis de Jesus Lemos ne’ebé simu nivel aas liu iha Desportu Taekwondo nian hanesan Master iha tinan 2019 tenke hakotu nia jornada moris.

Hosi Matebian Master Taekwondo Luís nia sakrifisiu no dedikasaun ne’e, nia konsege hahoris atleta atus ba atus iha Timor-Leste liu husi Dojan Koni ne’ebé nia rasik maka funda. Inklui, membru F-FDTL no nia oan sira sai atleta taekwondo hotu. Boa Viagem Aman ba Taekwondo Timor-Leste. Orasaun akompaña ba moris rohan laek, Amen. (Asesu Youtube/Facebook https://www.facebook.com/Media1Timor Media ONE Timor)