(Reportajen Angelo da Costa/Editora Suzana Cardoso)
DILI (Media ONE Timor) – Nu’udar dalan ida diak liu hodi dokumenta no rezista memoria sira iha pasadu no rezista memoria sira iha pasadu, maka Centro Nasional Chega (CNC) lansa tan livru istoriku rua.
“Ho lansamentu livru rua ne’e centru chega la’o hamutuk ona ho nai ulun sira, hahú hosi prezidente Nicolau Labato, Francisco Xavier no ita nia kombatente balun. No ohin iha livru nebe mak atu lansa tan iha centru chega hanesan dalan ida diak liu atu dokumenta no rezista memoria sira iha pasadu.”
Lia fuan hirak ne’e hato’o hosi Diretor Ezekutivu CNC, Hugo Maria Fernandes iha serimonia lansamentu livru ne’ebé hala’o iha salaun CNC, Kinta (09/06/2022).
Nia hateten, liu hosi lansamentu livru, “Ha’u nia dalan ba libertasaun no Aminha Memoria,” ne’ebé hakerek hosi Veterana, Aurora Asuncao Sarmento Quintao alias Keu-Nahak ho nia kaben Saudozu Alberto da Costa alias Bua, CNC sempre onradu hodi hola parte ba iha luta na’in sira nia esforsu to’o hetan indepedensia.
Aproveita lansamentu ne’e, CNC rekomenda ba Estadu atu tenke halo esforsu atu fo biban ba ema sira ne’ebé mak kontribui ba luta ukun rasik aan. Tanba, ne’e nu’udar responsabilidade centru chega nian ne’ebé mak Estadu harii atu halo buat ne’ebé mak rekomenda hosi relatoriu Chega.
“Iha tinan ida ne’e mos ami sei lansa tan livru ida hosi Maun boot Xanana nian ne’ebe hakerek tiha ona ho lian portuges, Ingles no tradus ba tetun, hodi fasilita Timoroan sira ne’ebé prefere atu lee iha lian tetun no sei lansa iha fulan ida ne’e”, Hugo dehan.
Tuir nia katak livru rua ne’e hanesan muzeu ida ba centru chega. Tanba konteudu hosi livru refere la’os koalia deit kona-ba autor ne’ebé hakerek livru ne’e. Maibe livru ne’e rasik koalia kona-ba ema ne’ebé maka fahe vizaun ba ukun rasik aan no vizaun ba defende direitu auto determinasaun. Nune’e livru rua ne’e rasik sai importante ba CNC, Komite Orientador 25 (CO25), CCLN, MEJD no AMRT atu nune’e bele sai fonte referensia.
“Maibe Centru Chega importante mak memoria ne’ebé nu’udar ema nia rezistu pessoal, ema nia dezafius no ema nia lalaok sira tomak ne’ebe mak ema nia dokumentu sira la hakerek sentimentu ema nian”, tenik nia.
Enkuantu Centru Chega mos agradese ba hakerek-na’in tanba ho sabedoria, pasensia hodi hakerek livru historiku rua refere to’o remata no ikus halo lansamentu.
Iha fatin hanesan Autora ba livru isoriku ne’e, Veterana Aurora Asuncao Sarmento Quintao (Keu-Nahak) agradese no orgulu tebes ba parte hotu-hotu nomos Centru Chega atu halo lansamentu ba livru ne’e.
Nune’e nia mos husu ba heroi/heroina sira no sira ne’ebe maka luta bai rai ne’e to’o hetan indepedensia atu hakerek ida-idak ninia istoria, atu nune’e hosi parte relevante sira atu hetan dadus konkretu hodi konta istoria ba jerasaun foun sira.(Asesu Youtube/Facebook Media ONE Timor)
Ita nia komentariu konaba post ne'e.