MEDIAONETIMOR– Partidu Politika Conselho Nasional Rekonstrusaun Timorense (CNRT) reitera posisaun liu husi kongresu hodi mantein oposisaun no Partidu Demokratiku (PD) prontu atu reabiliza.
Lia tun ba jornalista Prezidente CPN-CDN, Deonísio Babo Soares hafoin remata sorumutu hó Prezidente Repúblika (PR), Francisco Guterres Lú Olo iha Palasiu Prezidensial, (29/08/2017 hateten, iha sorumutu ne’e esplika konaba prosesu ne’ebé CNRT iha reitira posisaun.
“Ami apenas reitera posisaun liu husi konferensia mantein iha oposisaun,” katak Deonisio hodi dehan tan, “CNRT nia hanoin sobre prosesu ne’ebé lao daudaun, ami apenas reitera posisaun ne’ebe mak hola tiha ona.”
Esplika Deonísio, husi posisaun CNRT nian ne’e deskuti ona ho Sekretariu Jeral Fretilin, Mari Bin Amude Alkatiri nian ho nia ekipa katak CNRT nia posisaun liu husi konferensia nasional Mantein iha oposisaun.
Maibé katak Deonisio, iha kestaun ne’ebé mak relasiona ho soberania estabilidade paz iha TL CNRT sei ko’opera. Katak, iha governsaun ida ne’e nian respeita nafatin ligasaun ne’ebé mak daun-daun ne’e nia diskusaun lao hela. Sei apoia nafatin sira nia posisaun hotu.
Deonísio esplika, CNRT oposisaun laos ho karakter komfrontativu. Maibé, oposisaun sei koopera forma parseria no apoiu mos prosesu governasaun tomak iha diskusaun ne’ebé mak akontese iha parlamentu.
“Iha kestoes ne’ebé mak karik iha governu foun atu diskuti diak liutan, CNRT prontu atu apoiu. Importante mak tenke iha rejultadu ne’ebé mak diak para bele asegura estabilidade governasaun hodi halo dezemvolvimentu ba ita nia povu. Liu-liu iha tinan hirak mai,” tenik Deonísio.
Aliende ne’e iha kestoes ne’ebé mak relasaun ho soberania relasaun ho paz, estabilidade dehan Doenísio, CNRT apoiu nafatin governu koligasaun mai ne’e. Maibé kestoes governasaun sei deskuti antes hetan apoiu.
Katak Deonísio, hafoin deskusaun CNRT sei fo apoiu ho insidensia parlamentar iha programas iha kestaun relasaun ho estabilidade governativa. Tamba Nasaun TL foun. Foin tinan 15. Sei iha faze konstrusaun estadu. Hanesan ema barak dehan sei frazil hela.
“Ita lakohi povu TL iha eleisaun hotu tiha tenke sofre prosesu dezemvolvimentu lao ladiak, tan deit iha parlamentu labele konkorda malu. CNRT sei halo unital forma, atu nune’e apoiu governu koligasaun ne’e mak mai halo nia programa ho diak liu tan,” tenik Deonísio hodi hatutan.
Klaru sira ne’ebé intende atu husu substituisaun temporaria nia numeru ne’ebé mak tuir sei okupa kedas sae mai. Kona-ba lideransa iha bankada ne’e sei deskuti.
PD Prontu Reabiliza
Iha parte seluk Prezidente PD, Mariano Sabina Asanami hafoin remata hasoru malu ho PR Lú Olo ba jornalista hateten, husi inisiu PD deklara tiha ona ba estadu no kuadrus hanesan maubere oan prontu atu servi kualker posisaun.
“Ami hasoru malu ho PR Lú Olo atu hato’o progresu ba dialogu dala tolu ona konaba formasaun VII governu nian. No karta husi Fretilin ho PD ba-mai ona. Enkontru ho PR ne’e atu haré saida mak halo tiha ona,” katak Asanami.
Nia hanoin, iha tempu badak prosesu sei lao diak hafoin forma Parlamentu Nasional no forma VII guvernu. Forma para asegura estabilidade. No prosesu dezenvolvimentu ne’ebé mak diak liu mai rai Timor-Leste.
Hateten Asanami, iha tempu badak sei aplika ba públiku kona-ba akordu ne’ebé maka halo entre PD ho Fretilin. Prosesu sei hahú semana oin mai. No PD prontu atu reabiliza. Laiha kondisaun atu servi ita nia rai.
“Ida ne’e PD nia prinsipiu husi inisiu. Katak, “Ba o Timor ami prontu servi”. Laiha kondisaun. Laiha prezerva. Ami prontu ba ita nia rai. No ami prontu atu servi kualker tipu guvernu,” tenik Asanami. (Reportejen Aderito Ximenes/Mario Lobo)
Ita nia komentariu konaba post ne'e.