(Reportagen Estajiadu Deometro Amaral Ramos)
Dili (Media ONE Timor) – Laiha justifikasaun ofisiál hosi Partidu KHUNTO (Kmanek Haburas Unidade Nasionál Timor Oan) kona-ba deklarasaun tezoreira Maria Soi nia esplikasaun ba prosesu transasaun osan partidu nian ne’ebé virál iha mídia sosiál ne’e informasaun ‘bosok’.
“Deklarasaun ne’ebé tezoreira nasionál Partidu KHUNTO Maria Soi fó sai ba públiku ne’ebé virál iha mídia sosiais ne’e informasaun falsu. ‘Bosok’. Antes ne’e ha’u halo ona konfirmasaun ho nia dehan, ne’e illegál. Tanba laiha justifikasaun formál hosi partidu.”
Lia fuan hirak ne’e hato’o hosi Vice Prezidente Partidu Khunto atuál Vise Segundu Parlamentu Nasionál (PN), Luís Roberto da Silva ba Media ONE Timor iha resintu PN, semana daruak Fevereiru 2023.
Hanesan virál ona iha mídia sosiais katak, rezoureira nasionál Partidu KHUNTO Maria Soi públika deklarasaun ne’ebé esplika detallu kona-ba reseita partidu nian hahú tinan 2012 hodi hetan kadeira 5 iha Parlamentu Nasionál to’o ohin loron.
Iha deklarasaun Maria Soi nian ne’ebé Media ONE Timor asesu, Segunda, (20/02/2023) katak, durante Partidu KHUNTO hetan asentu iha PN no moos hola parte ba iha Governasaun reseita barak mak tama husi kontribuisaun sira mak hanesan:
- Membru PN Partidu KHUNTO nian kada fulan 2,000.00 USD
- Ministru sira kada fulan tenke intrega osan 1,500.00 USD
- Vice Ministru kada fulan 1,000.00 USD
- Sekretariu Estadu kada fulan 700.00 USD
- Xefe Gabinete sira tenke hatama kada fulan 150.00 USD
- Apointamentu no Asesores ne’ebé hetan kargu xefia kada fulan 10%
Nune’e Prezidente Bankada Luís esplika, nia kontatu ona ho Maria Soi katak ne’e illegal. Informasaun falsu ne’e lansa hosi ema hirak ne’ebé atu destroi unidade nasionál partidu nian. Tamba laiha justifikasaun formál hosi partidu.
Deputadu Luís esplika, Partidu KHUNTO iha orientasaun. Iha estatuta politika para hakesi no regula nia membru partidu sira hodi lao tuir idelojia no filosofia politika partidu nian. Tane o rain, tane o lisan no tane o ema, ne’ebé hakesi metin unidade nasional apoiante, simpatizante no membru Partidu KHUNTO nian. Hosi estrutura nasional to’o suku no aldeia.
Aproveita intervista ho Media ONE Timor, Vice II PN ne’e fó avizu ba membru Partidu KHUNTO atu nafatin hametin estabilidade paz hodi hasoru elisaun parlamentar tinan 2023 ne’ebé sei realiza iha fulan Marsu nia laran.
“Maske iha informasaun falsu atu hamonu Ita nia partidu, maibé nafatin iha esperansa katak KHUNTO sei manan iha eleisaun parlamentar”, realsa Vice Presidente Partidu Khuto Luis. .(Asesu Youtube/Facebook https://www.facebook.com/Media1Timor Media ONE Timor)
Ita nia komentariu konaba post ne'e.