Dignifika Povu Nia Moris, PD Inisia Kampaña Elpar 2023

(Reportajen Estaziada Adelina Fatima, Marquita Freitas/ Editor Marcelino Tomae)

Dili (Media ONE Timor)  – Dignifika povu  nia moris husi mukit, Partidu Demokrátiku (PD) insia Kampañia eleisaun parlamentár (elpar) tinan 2023, hodi vizita  uluk jardin herois   sira.

Deklarasaun ne’e hato’o husi Prezidente Partidu Demokrátiku (PD) Mariano Asanami Sabino Lopes ho ninia Sekretáriu Jerál, António da Conceição alias Kalohan liu-husi deskursu bainhira abertura Kampaña  elpar iha Sede Nasionál PD, Kolmera Dili, Kuarta, (19/04/2023).

Tuir Prezidente PD, Mariano Asanami Sabino Lopes,  konsidera eleisaun parlamentar tinan 2023 hanesan situasaun ne’ebé vitál tebes ba estadu. Tanba hasoru festa demokrasia ne’ebé determinadu tebes ba povu Timor-Leste (TL).

“Festa demokrasia ne’ebé vitál no krusiál tebes ba estadu. Ita la’os halo festa baibain.  Maibé festa determinante ba povu Timor-Leste. Depois de tinan 24 iha luta ba libertasaun povu husi 1999 to’o 2023, PD hamriik atu hatutan espíritu funu nain sira hodi konstroi estadu de direitu no demokrátiku”, hatete  Prezidente PD  Asanami.

Katak Asanami, Partidu PD nia prezensa atu hametin ukun rasik an. Kaer metin ukun rasik an ho valor repúblikanu no demokrátiku ne’ebé tenke sai lisan ba moris no lisan ba ukun. Ema hotu ne’ebé iha PD, iha nia ran no ruin tenki metin ho prinsipiu; huun ida, abut ida, povu ida no rai timor ida de’it.

“Ita kebetulan  de’it moris husi munisípiu no fatin diferente. Maibé Ita moris  hakilar nu’udar Timorense atu defende no dignifika Timor nu’udar huun ida, abut ida, povu ida, rai Timor ida de’it. Ita la’ós kualker partidu ida. La-hamriik hodi kompete ho partidu seluk atu kaer Primeiru Ministru”, katak Asanami.

Maibé  Asanami informa, PD hamriik hodi konkista no liberta povu. Nune’e   husu ba heroi sira turuk ninia ran no espíritu heroiku iha  isin lolon hotu-hotu kontinua esperansa povu nian no hatuur estadu maubere ba maubere oan sira.

Asanami fundamenta PD la’o naruk hamutuk ho CNRT no FRETILIN ne’ebe kuiñese di’ak prosesu ukun ida ne’e liu husi halo ona diagnosa ba ukun ne’e, maibé komfiansa ne’e sei kiik nafatin tanba ne’e nia husu ba estrutura no militantes sira hodi hakraik an husi uma ida ba uma ida hodi husu apoia ba partidu hotu-hotu nia apoiu ba PD hodi hatuur Timor ida ne’ebe forte, unidu, faternu, sólidu

“Ita tenki hatuur Timor ida ne’ebé  forte, unidu, sólidu no fraternu, laiha diskriminasaun atu halo servisu saida deit, kria kampu servisu ba joven sira, nasaun ne’e tenki sai nasaun joven ne’ebé produtivu hodi kompete ho nasaun seluk, partidu bele manan no la manan maibe sidadaun labele lakon ninia direitu sidadania hodi kontribui ba desenvolvimentu”,  dehan Asanami hodi informa liután.

Labele sura kolen ba rai ida ne’e, hotu-hotu  tenke dignifika veteranu sira, oan kiak sira, jerasaun patriota sira no dignifika Timor oan hotu ho hanesan.  Tanba la’ós Timor oan nia sala sai milisia, otonomista, sai falintil no sai traidor, odiu malu remata oan, tempu para  hamutuk rai ida ne’e tanba  hotu-hotu  lutador ba demokrasia,  tenke liberta povu husi kiak no mukit, laiha povu ida iha kotuk.

Entretantu tuir sekretáriu jerál Partidu (PD) António da Conceição  “Kalohan” katak, abertura kampaña iha dadersan ba halo vizita Jardin erois ho hanoin katak, espiritu heroi sira nian maka bele tane nafatin RDTL no senti sentidu independensia ne’ebé heroi sira rasik fó isin, ran no família lubuk hodi konkista independensia.

“Ohin vizita Jardin erois hodi komprimenta heroi nasaun nian. Hahú husi Fransisco Xavier do Amaral no heroi sira ne’ebé maka to’o agora seidauk hetan. Ita tenke fó komprimentu moos ba Saudozu Nicolau Lobato, Nino Conis Santana no halo orasaun ba Matebian sira hotu atu fó Jornada kampaña nian durante fulan ida”, dehan Kalohan.

Katak Kalohan, PD moos fó referensia ba saudozu Fernando Lasama hanesan Prezidente Partidu PD hodi hamahon espiritu no klamar hamri’ik iha sira nia kabas atu hateke ba Timor oin mai, hodi husik ístoria moruk harii Timor foun.

Vizita ba jardim heroi nian iha Metinaro ne’e para atu husu matak malirin ba estrutura no militante Partidu Demokrátika nian, antes hala’o Kampañia iha territóriu laran. Tuir orariu Partidu Demokrátiku sei hala’o nia kampaña dahuluk nian iha Postu Administrativu Atabae, Munisipiu Bobonaro, iha loron Sexta, (21/04/2023).(Asesu Youtube/Facebook https://www.facebook.com/Media1Timor Media ONE Timor)