(Reportajen Asistente Editor Marcelino Tomae/Editora Suzana Cardoso)
Dili (Media ONE Timor) — Elektrisidade ne’ebé mate lakan, liliu iha Kapitál Dili, signifika politikamente Eletrisidade Timor-Leste, Empreza Públiku (EDTL,E.P) la merese hamrik mesak. Tenke iha Ministériu Obras Públiku (MOP) nia okos hodi tau atensaun maximu ba kapasidade tékniku nian.
“Haree husi nia ístoria antes sai ajensia autonomia hodi hamrik mesak, EDTL,E.P transforma husi Ministériu Obras Públiku ho ninia Sistema ne’ebé di’ak. Maibé hamrik tiha, ahi mate lakan fali. Ne’e kapasidade maka sei menus. Tuir loloos nia sombra iha obras públika nia mahon. Seidauk merese atu hamriik mesak hanesan agora.”
Preokupasaun ne’e hato’o husi Bankada Kongresu Nasionál Rekonstrusaun Timorense (CNRT), Deputadu Domingos Carvalho ba Jornalista iha resintu uma fukun Parlamentu Nasionál (PN) Kuarta, (14/12/2022) no reforsa tan hosi Bankada Partidu Uniaun Demokatika Timorense (UDT), Deputadu Francisco David.
Bankada CNRT Deputadu Domingos de Carvalho esplika liutan, iha tinan 2021 EDTL sei iha MOP nia mahon funsionariu hirak ne’ebé iha ona esperensia tinan barak maka servisu iha ne’ebá. Maibé, hafoin sai ajensia autonomia ekipa professional hirak ne’e naksobu tiha, hodi fó impatu ba eletrisidade mate lakan.
Haktuir Deputadu Domingos, bainhira sai ona anjensia autonomia funsionariu EDTL.Ep tuir lolos servisu ho professional liutan, hosi antes sei hamutuk ho MOP. Tanba, sira nia salariu boot tebtebes.
“Uluk sira atu hamriik ketak ona. Ami dehan prontu sei imi hakarak hamriik mesak ona ida ne’e hanesan buat ida karik la’o mesak ba para Ita haree imi nia servisu. Maibé tenke submete nafatin ba iha ministériu obras públikas”, hatete Deputadu Domingos hodi hatutan.
Funsionariu EDTL,E.P nia salariu boot. Hanesan Prezidente EDTL,E.P maizu menus 6,500.00 USD kada fulan. No Vice Prezidente EDTL,E.P manan salariu 5,000.00 USD. Kompara ho deputadu sira kada fulan manan salariu maizu menus 2,000.00 USD, inklui ona ho subsidiu.
“Ba ami deputadu sira 2,000.00 USD-resin, konta ho ami nia subsidiu oan ne’e maka hanesan ne’e. Enkuantu funsionariu EDTL,E.P ho salariu boot nune’e maka Ita la menta tebtebes. Tanba, servisu la professional,” tenik Deputadu Domingos.
Deputadu Domingos rekuñese iha tempu CNRT nia governasaun eletrisidade iha Kapitál Dili mate lakan. Maibé, antes eletrsidade atu mate fó ona avizu hodi ema hothotu prepara sira nia jerador ka lilin no moos halo antisipasaun ba sasan eletronika sira labele hetan estragus.
“Ita halo komparasaun agora ho naran EDTL,E.P eletrisidade mate derepente de’it. Komunidade nia sasan eletronika barak maka hetan estragus. Ho uluk hanaran EDTL sei di’ak liu ida uluk. Tanba submete ba iha ministériu obras públiku no hetan kontrolu ne’ebé maximu,” katak Deputadu CNRT ne’e.
Maibé tuir Deputadu Bankada Partidu Uniaun Demokratiku, Deputadu Francisco David nia observasaun, eletrisidade mate lakan beibeik kestaun tékniku ona. Deskonfia populasaun iha Kapitál Dili ne’ebé loron ba loron aumenta ba beibeik fó impatu ba eletrisidade ne’ebé mate lakan.
“Teknikamente haree husi trafol. Kuandu populasun aumenta, entaun kapasidade trafol mós tenke ser aumenta para bele fornese ba ema hotu-hotu nia nesesidade,” sujere Deputadu Francisco. (Asesu Youtube/Facebook https://www.facebook.com/Media1Timor Media ONE Timor)
Ita nia komentariu konaba post ne'e.