(Reportájem Atanasio Ascenção no Maria Luiza)
DILI (Media ONE Timor) – Orientasaun tinan akademika 2021 no 2022 ba estudante Universidade Nasional Timor-Lorosa’e (UNTL) Departementu Edukasaun la simu manual orientasaun tuir osan dollar haat ne’ebé hatama ona. Nune’e, sira halo demonstrasaun hodi ezizi atu fó fali sira nia osan.
“Ami estudante ezije ami nia direitu ne’ebé maka UNTL rasik seidauk responde ba atividade ne’ebé liu ona. Liu-liu, manual orientasaun estudante nian ne’ebé mak entrega osan dolar haat, maibé to’o orientasaun ne’e realiza laiha manual.”
Lia fuan ne’e hato’o hosi Lazáro Boavida ba Media ONE Timor iha Kampus Sentral UNTL, Kuarta (08/06/2022) bainhira remata hato’o ninia ejijensia hodi hakilar ba Kampus UNTL laran.
Nia esplika liutan, osan dollar haat ne’e estudante hotu-hotu hatama bainhira hala’o re-rejistu. Osan ne’e dehan atu produs manual orientasaun. Maibé, iha tempu orientasaun estudante sira la simu manual ne’e.
Nune’e katak Lazário, husu ba UNTL atu fó fila fali estudante nia osan dollar haat ne’e. Tanba hosi dollar haat ne’e kada ema ida tau hamutuk ho estudante maka besik 500 karik, osan maizu menus besik U$20,000.00. Nune’e maka husu atu fó fila ami nia osan.
Aleinde ne’e estudante Fakuldade Edukasaun ne’e moos kestiona kona-ba sertifikadu orientasaun nian ba estudante anu letivu 2021 no 2022 to’o agora seidauk entrega.
“Liu tiha orientasaun, husi parte universidade distribui manual orientasaun ne’e ba estudante. Momentu ne’eba kedas fakuldade edukasaun rejeita. Tanba manual orientasaun ninia tempu atu distribui ba estudante sira iha momentu orientasaun. Maibé liu tiha ona orientasaun labele simu ona. Tamba nia tempu liu ona. No atu uza ba halo saida tan,” haktuir Lazáro.
Estudante UNTL Departementu Edukasaun emestre V no semestre III, moos hasoru problema seidauk simu kazaku almamater. Aliende ne’e, estudante sira moos menus fasilidade eskola nian; hanesan salaun aula no kondisaun haris fatin ladún di’ak.
To’o notísia ne’e hatuun Media ONE Timor tenta atu konfirma ba parte administrasaun no Dekanu, maibé sira laiha fatin.(Asesu You Tibe/Facebook Media ONE Timor)
Ita nia komentariu konaba post ne'e.