(Reportajen Maria Sandrawati/Editora Suzana Cardoso)
Dili (Media ONE Timor) – Hasa’e kapasidade feto foinsa’e iha area emprezaria nian, Estados Unidos Amerika (EUA) liu husi ninia embaxada iha Timor-Leste (TL) hamutuk ho Camara Comersio do Industria de Timor Leste (CCI-TL) fó apoiu orsamentu 40,000.00 USD hodi fornese formasaun emprendedorizmu.
“Ohin ita halo kontinuasaun etapa daruak. Hafoin etape dahuluk iha tinan 2021. Treinamentu emprendedorizmu ba Joven feto sira iha Timor-Leste na’in 20. Ho orsamentu ne’ebé apoiu husi EUA ba formasaun ne’e hamutuk 40,000.00 USD.”
Hatete Embaixador EUA Tom Darlay ba Jornalista hafoin remata loke formasaun emprendedorizmu iha edifisiu CCI-TL Akait, Kuarta, (23/11/2022).
Nia esplika liutan, orsamentu ne’e mos sei uza halo formasaun ba partisipante sira ne’ebé maka tuir formasaun. Liu hosi fó osan fini nian ba feto foinsa’e sira nia negosiu ne’ebé sira forma ona hodi sai emprezaria ne’ebé iha ninia sustentabilidade iha tempu naruk.
Embaxador Tom hatete, EUA nafatin iha komitmentu fó apoiu ba Governu TL ba iha ninia ekonomia. Espesialmente hafoin hasoru pandemia Covid-19 foin dadauk ne’e. Mezmu formasaun ida ne’e akontese iha Dili de’it, maibé sei iha espasu atu loke ba to’o munisipiu.
Iha oportunidade hanesan Prezidente CCI-TL Jorge Manuel Serrano hato’o agradese ba EUA ne’ebé fó ona apoiu tomak mai povu TL. Dezde inisiu to’o ohin loron marka tan ona iha CCI-TL kompromisiu bo’ot ne’ebé mak foin ukun aan iha tinan 20 nia laran.
“Honra boot mai ha’u hodi bele halo lansamentu iha formasaun etapa segundu nian. Ho komprimisiu bo’ot hamutuk ho Embaixador EUA fó nafatin formasaun ba iha area hot-hotu. Liu-liu iha emprendedorizmu ba foinsa’e feto sira”, dehan Jorge.
Nia esplika liutan, rekursu umanus sai problema bo’ot iha TL. Nune’e presiza formasaun barak liutan. Liu-liu iha CCI-TL. Nune’e husu atu aproveita ho didiak formasaun ne’ebé hala’o durante semana ida ne’e. Mantein nafatin servisu hamutuk ne’ebé iha ona sai di’ak liutan.
Iha ninia mandatu, Jorge promete sei monta baze dadus iha TL laran tomak. Nune’e bele fasilita informasaun hosi setor privadu sira hotu. Hahú hosi nasionál mai to’o munisipiu. Liu-liu partisipasaun feto nian. Maka, estrutura CCI-TL tenke partisipa ho maximu iha formasaun ne’e.
“Ba alin sira ne’ebé mak tuir formasaun presiza konsistente. Aprende no presiza vizaun. Labele hanoin katak ohin hau iha formasaun ida ne’e, aban hasoru difikuldade ba fali formasaun ida ne’eá. Sai emprezaria, sei hasoru dezafiu barak. Maibé, fiar katak sei enkoraja malu hodi la’o ba oin”, afirma Jorge.
Lia fuan hanesan hato’o hosi Diretora Kompañia Cado Oce Unipesoal, Lda, Agusta da Silva. Nia hateten, formasaun ne’e la’os de’it hanorin atu halo negosiu. Maibé, kapasita mos ema atu dezemvolve negosiu la’o ba oin.
“Husi fundus ne’ebé EUA ajuda ona, dadauk ne’e dezenvolve ona ami nia negosiu produsaun kafé. No liu hosi programa ne’e, ha’u loke ona kafetaria,” hateten alumni formasaun etapa dahuluk nian ne’ebé realiza ona iha tinan 2021.
Hatutan Agusta, formasaun ne’e remata sei iha kompetisaun. No iha tinan 2021, Kompañia Cado Oce Unipesoal, Lda maka manan iha pozisaun daruak. Hetan osan hamutuk 1,500.00 USD. Osan ne’e uza hodi aumenta negosiu sai boot it’oan.(Asesu Youtube/Facebook https://www.facebook.com/Media1Timor Media ONE Timor)
Ita nia komentariu konaba post ne'e.