Formandu Ceftec Vizita CI , Jornalista Tenki Iha Kapasidade

(Reportajen formandu Ceftec 2023; Adelaide da Cunha,  Gigelda Soares,  Edmundo Ximenes, Edigar Magno no Francisco Robinson)

Dili (mediaonetimor.co) –  Atu hatene liután kona-ba servisu Konsellu Imprensa (CI sigla Portugues) nian,  formandu Centro de Formação em Técnica e Comunicação (Ceftec sigla Portugues), Unidade Hakerek Imprensa hala’o vizita ba eskritóriu iha Kintál Boot.

Vizita formandu Ceftec  ne’ebé akompaña hosi Formadora Suzana Cardoso no asistente formadora Celice Gusmão ne’e, simu direta hosi estrutura CI nian iha sala  plenária, Sesta,   (16/06/2023).

Konselleiru CI Expedito Dias Ximenes iha ninia intervensaun bemvindu hatete, CI nu’udar orgaun Estadu ida independente ne’ebé tau matan ba produtu jornalizmu nian ba orgaun komunikasaun sosiál iha Timor-Leste (TL).

“Bemvindu mai iha Konsellu Imprensa. Hanesan Ita Boot sira hatene Konsellu Imprensa nu’udar orgaun Estadu ida ne’ebé independente no tau matan ba iha produtu jornalizmu no orgaun hosi meius komunikasaun sosiál iha Timor-Leste”, esplika Konselleiru Expedito.

Aliende ne’e, iha ninia explikasaun hodi fó resposta ba pergunta formandu sira, Konselleiru Expedito hatete, relasiona ho produtu jornalista ne’ebé públika la tuir estandarte no kodigu etika, CI sei hato’o karta notifikasaun ba media refere.

Katak Konselleiru Expedito, bainhira media sira la halo tuir notifikasaun ne’ebé hato’o, CI sei dada hikas sira nia karteira professional. Nune’e, maka atu sai jornalista ne’ebé professional tenki iha kapasidade intelektual, kapasidade professional  no kapasidade tékniku.

Hatan kona-ba live streaming SMNews nian ne’ebé ema balun perkupa, Konselleiru Expedito hatete, haree hosi atualidade notisia, bele konsidera. Maibé, haree hosi ninia konteudu dala ruma bele fó influensia ba ema seluk. No bele moos provoka kontinuasaun violensia entre grupu sira. Maka jornalista tenki iha kapasidade atu termina anglu ho professional iha live streaming.

Antes ne’e Diretor Interinu CI, Antonio Dias atuál Diretor Rekursu Humanus esplika, CI nu’udár instituisaun independente ida ne’ebé hamrik ho ninia natureza servisu rasik. CI nia kompeténsia no papél importante maka; tau matan ba obra jornalista sira nian.  Promove no dezenvolve kualidade informasaun ho demokrasia. CI moos halo monitorizasaun ba produtu ne’ebé jornalista sira públika. No distribui karteira professionál ba jornalista sira. Inklui, oferese prémiu.

“Bazeia ba lei komunikasaun sosiál númeru 5/2014 artigu 44 alinea ‘J’ ko’alia kona-ba kompetensia CI nian maka , apoia organizasaun Jornalista sira nian ba iha dezemvolvimentu kompetensia profesional, téknika no intelektuál jornalista sira nian”, dehan Antonio Dias.

Nune’e katak Antonio Dias, CI iha ninia ezekusaun servisu para tulun jornalista sira hakruk ba lei Nú. 5/2014 kona-ba Lei Komunikasaun Sosiál no garantia katak obra jornalista nian públika bazeia ba kodigu etika jornalista sira nian.

Aliende ne’e formandu sira moos hetan esplikasaun hosi Diretór Rejistu no Apoiu Jurídiku,  Zenilton Zeneves katak, direitu ba ratifikasaun mak sala iha públikasaun notísia presiza hadia no públika fila fali notísia ho kompletu no iha pajina ne’ebé hanesan, iha públikasaun antes nian.

Kona-ba direitu ba resposta Zenilton deklara, media tenki públika fila fali  públikasaun iha tempu tuir mai bainhira hakerek notísia sala no bele fó rajaun ba fonte nia resposta karik la kondis ho notísia nian.

Maibé hatutan Zenilton, bainhira media la fó resposta tuir fonte nia ezizensia, maka fonte iha direitu atu lori ba tribunál hodi prosesa tuir dalan legál.

“Hanesan hakerek ona iha lei komunikasaun sosiál númeru 5/2014, artigu 38 kona-ba forma responsabilidade nian. Katak autor sira sei hatan ba atu lezivu sira ho interese no valor sira ne’ebé maka lei proteje, sivil no kriminál ne’ebé sira halo liu husi imprensa”, dehan Zenilton.

Iha parte seluk Zenilton moos esplika kona-ba, kriteria hetan karteira professional Jornalista no pesoál ne’ebé iha kompetensia atu asesu ba profisaun jornalista nian maka Timoroan ne’ebé ho idade 17 ba leten. Maibé laos funsionariu públiku.

Aliende idade katak Zenilton, kriteira seluk para hetan karteira professionál maka jornalista sira tenki hala’o estajiu professional iha media sira ne’ebé rejistadu iha CI. Estajiu ne’e bazeia ba nivel edukasaun. Durasaun estajiu,  durante fulan neen ba lisensiatura iha area komunikasaun sosiál. Estajiu to’o fulan 12 ba lisensiatura iha area seluk. No fulan 18 ba finalista sekundariu sira.

Diretór Relasaun Institusionál no Kooperasaun, Altino Freitas moos haklean liutan kona-ba CI nia programa hirak ne’ebé durante implementa maka hanesan; programa liberdade imprensa, komemorasaun loron liberdade imprensa, seminar kona-ba Dili Internasionál forum no forum editoriál.

Esplika Altino, CI moos eziste diresaun;  apoiu juridiku, diresaun analiza no dezemvolvimentu media, diresaun relasaun instituisionál no informasaun, diresaun rekursu humanu no moos iha diresaun finansas.

Husi diresaun hirak ne’e katak Altino, diresaun relasaun institiuisionál no informasaun nia servisu maka fó mediasaun  ba media ka jornalista sira ne’ebé infrenta problema durante hala’o sira nia profisaun liga ho baze legál.

“Jornalista ida kontra kodigu etika jornalizmu nian, bainhira ema atu lori ba tribunál,  diresaun relasaun institiuisionál no informasaun  sei bolu mai atu fasilita mediasaun. Ezemplu; kazu RTTL,E.P ho Burger King ne’ebé la konsege lori ba to’o tribunál. Maibé resolve de’it iha CI. No kazu seluk maka entre estudante sira iha fronteira ne’ebé maka iha problema ho jornalista RTTL.E.P,” konta Altino.

Tuir formadora Unidade Hakerek Imprensa nian, Suzana Cardoso, objetivu husi vijita ida ne’e atu hakle’an liután formandu sira nia kuñesimentu iha mundu jornalizmu, relasiona ho produtu sira ne’ebé formandu sira sei produz.

Katak Suzana, ema hotu-hotu ne’ebé públika informasaun ba públiku hanesan moos halo komunikasaun ho públiku. Maka, tenki kuidadu ho atetude sira ne’ebé liga ho morál ema nian. Iha mundu jornalizmu nian maka hatuur ona iha kodegu etika Jornalista TL ne’ebé hetan esplikasaun iha Nivel III iha formasaun Ceftec nian.

“Ha’u nia esperansa atu formandu sira iha futuru atu sai hakerek nain ne’ebé matenek no professional. Labele hakanek ema seluk nia fuan, ho produtu sira tanba de’it laiha check and balance. Tanba, tantu jornalista no citizen jornalizmu tenki iha misaun, maka hanesan,  relata intrepretasaun ba faktus. Laos relata de’it faktus”, sujere Jornalista senior ne’e.

Lia fuan hanesan hatete husi formanda Ceftec tinan 2023, hosi unidade hakerek imprensa, Adriana Maria Gomes. Nia senti kontenti ho vizita ne’e. Tanba bele kompriende kona-ba prosesu servisu CI nian. Liu-liu liga ho Kode Étika Jornalizmu no Lei Komunikasaun Sosiál.

“Relasiona ho CI nia esplikasaun, liu-liu kona-ba regulamentu no Lei Komunikasaun Sosiál, ha’u sujere atu iha futuru, tenki prepara lei ruma ba media hotu-hotu. Tantu media konvensionál no media online sira. Nune’e bele tau atensaun no regula wainhira halo públikasaun ba notisia ka produtu jornalizmu nian”, tenik Adriana.

Formandu sira antuziasmu durante vizita ne’e tamba sira bele hato’o preukupasaun hotu ne’ebé sira senti relasiona ho servisu jornalizmu nian. Inklui apresenta erru hirak ne’ebé sira nota relasiona ho produtu jornalizmu ne’ebé publika tiha ona durante ne’e.(Asesu Youtube/Facebook https://www.facebook.com/Media1Timor Media ONE Timor)