Fretilin-CNRT La Koalisi, Khunto Barometru

Opiniaun ida Konaba Hafuhu Malu Forma Governu

Hakerek nain SUZANA CARDOSO

ELEISAUN tinan 2017 lao hó demokrasia. Tantu iha Eleisaun Prezidensial no eleisaun Parlamentar. Ne’e, tanba prosesu kampaña mai to’o prosesu apuramentu lao transparansia, liu hosi profesionalizmu CNE no STAE, observasaun hosi observador nasional no internasional mai to’o Orgaun komunikasaun Sosial, inklui komunikasaun Internet nian.

Hó prezensa Televizaun privada ne’ebé kumesa barak, jornais sira, radio, website no facebook, ida-idak ajuda timoroan sira hodi kuñese programa ne’ebé aprezenta hosi lideransa no partidu sira. Hotu-hotu liu ona Eleisaun Prezidensial hó diak. Hó deit primeiru ronde ne’ebé manan hosi Prezidente Partidu Fretilin, Francisco Guterres Lu-Olo hó apoiu masimu hosi Partidu CNRT.

Iha Elpar 2017 hahu hó 21 partidu politiku (Parpol), inklui Bloku. Parpol ida-idak hato’o nia programa hó halo kurijim ba buat hirak ne’ebé lao seidauk diak durante Fretilin, CNRT no PD nia ukun. Aliende kampaña nakloke, debate iha Televizaun sai interesante ba públiku atu akompaña. Balun seluk akompaña liu hosi jornais sira. Laos ne’e deit, iha website no facebook ida-idak halo kurijim hodi fó atensaun ba timoroan wainhira atu investe votus.

Progresu CNRT ne’ebé lidera governu durante tinan 10 sai sasukat ba programa partidu sira seluk hodi halo kampaña, inklui Partidu Fretilin nia politika kampaña. PD ne’ebé sempre koalisi hó CNRT mós lases hosi protesta partidu sira seluk.

Liu hosi slogan ne’ebé hakerek iha spanduk, hotu-hotu fase PD no liu-liu Partidu CNRT. Maibé, CNRT fiar a’an hó militante atus ba atus ne’ebé mai tuir kampaña iha fatin-fatin hodi haluha tiha protesta ne’ebé partidu sira seluk foti iha kampaña.

Iha parte seluk, Partidu Fretilin uza oportunidade ne’ebé Xanana fó hodi manan kunfiansa timoroan. Hanesan Projetu ZEEMS no restu tinan 2 ho balun ne’ebé Parpol CNRT fó ba fatin stratejiku iha; Primeiru Ministru, Agrikultura, Ekonomia, Telekomunikasoens no Negosiu Estranjeiru.

Maske antes ne’e hetan protesta barak, maibé Fretilin uza Projetu ZEEMS no tempu remodelasaun ne’ebé fó ba membru Comite Central Fretilin (CCF) nain 4; Rui Maria de Araújo, Estanislao da Silva, Hernani Colho no Inaçio Morreira iha fatin estratéjiku sira hodi sai hanesan material importante ba kampaña.

Hosi kampaña ema ne’ebé nadodon ba nadodon mai, laos garantia ba votus. Afinal. timoroan matenek ona atu hili semaka merese ba sira atu investe sira nia votus. Evidensia, hatudu iha rezultadu Elpar 2017. Katak, laos tempu ona atu konta historia. Timoroan hakerek asaun konkretu. Investimentu votus ne’e osan mean. Laos investe tiha fó ba malu hanesan prezente laek ida.

Evidensia hosi investimentu Elpar 2017 kompara hó 2012 (Katak investimentu votus laos   prezente atu fo ba malu tuir ida-idak nia gostu);

• CNRT Elpar 2012 hetan kadeira 30——-Elpar 2017 hetan kadeira 22 (lakon kadeira 8)
• Fretilin Elpar 2012 hetan kadeira 25—–Elpar 2017 hetan kadeira 23 (lakon kadeira 2)
• PD Elpar 2012 hetan kadeira 8 ——-Elpar 2017 hetan kadeira 7 (lakon kadeira 1)
• Foin partisipa Elpar 2017, PLP hetan kedas kadeira 8
• Hanesan mós Khunto foin partisipa Elpar 2017 hetan kedas kadeira 5 hodi dudu ses tiha Frente-Mudansa nia kadeira Elpar 2012 ne’ebé hetan rua deit.

Ne’e atu hateten katak PLP no Khunto nia protesta no nia programa sai barometru ba Governu VII tuir mai. Tanba hosi hakerek nain nia observasaun nota katak, votus ne’ebé fó ba Fretilin ne’e tanba naran historiku. No votus ne’ebé fo ba CNRT tanba Resistensia Xanana Gusmão. Maka to’o ba ne’e deit responsabilidade timoroan nian.

Agora atu forma governu hodi kaer ukun, ne’e lideransa politiku sira nia responsabilidade ona. Maibé tanba saida maka Fretilin atu forma governu tenki hafuhu ba Xanana Gusmão.

Tuir hakerek nain nia haré, karik tanba Fretilin deve moral ba fó ZEEMS, VI governu iha remodelasaun no suporta Prezidente Fretilin ba Prezidente Repúblika. Katak, suseisu Fretilin tanba Xanana kahur nia liman iha laran? Ne’e maka sai dilemma ba Fretilin atu bolu PLP, PD no Khunto hodi halo koaligasaun?

Ba CNRT laiha deve moral (hutang budi) ba partidu sedeit. Maibé, relasaun emosional antes ne’e maka sai kestaun. Hó PD diversiu hó CNRT hodi forma VI governu remodelasaun, hó PLP sadik malu hó lia fuan liu hosi orgaun komunikasaun sosial. Hó Khunto maka seidauk kaer hetan problema hó CNRT no Fretilin.

Maibé, kuandu CNRT hó Fretilin lakohi halo koaligasaun tanba Fretilin mai hó formasaun kadeira governasaun tenki Fretilin desidi. Katak, kadeira ne’ebé CNRT atu tu’ur tenki bazeia ba desizaun Fretilin nian. CNRT hakarak simukah?

Se lakohi simu maka Khunto sei sai barometru. Haré ba ligasaun Taur Matan Ruak hó Marí Alkatiri ladun harmonia, maka iha posibilidade ki’ik ba Fretilin hó PLP atu halo koaligasaun. Fretilin iha posibilidade bo’ot atu halo kalogasaun ho deit PD no tenki hó Khunto maka foin forma governu.

Ho Formula 23 + 7 + 5 = 35

Ba CNRT atu halo koaligasaun hó PD, maibé antes ne’e sira diversiu tiha ona iha remodelasaun forma VI governu. Nomos iha esperensia lao hamutuk hetan protestu barak ona. Nune’e iha posibilidade ki’ik. Maske antes ne’e, Mariano deklara katak soldadu prontu ba Komandante Rezinstensia, Xanana Gusmão.

Hó PLP maske relasaun ladun diak hó Taur Matan Ruak, maibé tuir hakerek nain nia observa durante kampaña Taur Matan Ruak sei nafatin konsidera Xanana Gusmão nu’udar komandante rezistensia. Partidu Khunto laiha problema. Nune’e, PLP no Khunto iha posibilidade bo’ot atu halo koalisigasaun hó CNRT.

Ho Formula 22 + 8 + 5 = 35

Maibé; se akontese Fretilin lidera governu, maka total oposisaun CNRT no PLP hamutuk 30 no kuandu akontese CNRT maka forma governu maka Fretilin hó PD nia total oposisaun 30. Numeru ne’ebé fantastiku. Maibé bele kah lae reprezenta foti desizaun kuandu diferente votus 5 deit hó oposizaun.

Maibé kuandu iha ikus mai maka tenki foti desizaun katak Fretilin no CNRT maka halo koaligasaun ho total forma governu hamutuk 45. Hó kadeira Primeiru Ministru iha Fretilin nu’udar primeiru lugar Elpar 2017. Maka kompleta, Prezdente Repúblika hosi Fretilin no Governu hosi Fretilin. Dezijaun sei labalansu. Maske Lu-Olo Prezidente Repúblika ba povu laos ba partidu. Deskonfia sei nafatin iha.

Signifika katak, Eleisaun Parlamentar 2017 ne’e timoroan sira investe hodi koko lideransa sira nia laran luak hodi fahe poder ho didiak. Hotu-hotu laespera atu akontese numeru hanesan ne’e. Kuandu lainklui hó planu Maromak nian. Katak tempu to’o ona atu timoroan sira labele subar liman fuan inan hodi halimar fali liman fuan sanak 8 sira seluk.

Maromak sei hatudu dalan netral, kuandu lideransa sira fó neon no laran duni atu dezemvolve rai ida ne’e. Milagre maka hatudu dau-daun ona iha rezultadu Elpar 2017 ne’e. Suseisu timoroan iha tinan 5 mai, iha Partidu Fretilin, CNRT, PLP, PD no Khunto nia liman. No keta haluhan mós katak, Negosiasaun Tasi Timor no Timor atu tama ASEAN iha ona odamatan. Ami nia susesiu iha imi nia liman.(Hakerek nain Suzana Cardoso/sefi redasaun Media One Timor)