Dili (www.mediaonetimor.co) – Hadia sistema nutrisaun no hametin siguransa ai-han Timoroan nian maka Estadus Unidus liu husi USAID fó tulun osan Juta U$15 ba Governu Timor-Leste (TL). Osan ne’e sei uza durante tinan lima, ba projeitu ho naran Avansa sistema ai-han no nutrisaun (Avansa San).
Projeitu Avansa San ne’ebé nia objetivu atu hametin sistema no seguransa ai-han, no mós hadia sistema nutrisaun ne’e lansa husi Prezidente Repúblika (PR), Ramos Horta iha loron Tersa, (20/03/2024). No sei foku liu iha Munisipiu Dili, Aileu, Ainaru no Ermera.
Hafoin remata serimonia lansamentu, ba Jornalista sira PR Ramos Horta no Embaxador Estadus Unidus iha TL, Marc Weinstock hatete, liu husi projeitu Avansa San ne’e, liu-liu ba feto no labarik sira iha disponibilidade asesu, asesibilidade, no konveniensia hodi konsumu hahan nutritivu ne’ebé saudável no seguru ho diversifikadu.
Haktuir PR Ramos Horta, Embaxada Estadus Unidus ba Timor Leste liu husi USAID, kontribui ona osan hamutuk Juta U$92 entre tinan 2021 no tinan 2025. Kontribuisaun osan ne’e hodi hadia ekonomia TL no promove Governasaun di’ak.
“Dezde restaurasaun Independensia Timor-Leste nian, USAID kontribui ona osan ho valor millões (Juta) U$323-resin hodi promove dezenvolvimentu inkluzivu pasifiku atu nasaun ne’e prosperu, saudável no autosufisiente”, PR Ramos Horta fo hanoin.
Perkupa PR Ramos Horta katak, durante tinan 22 nia laran Governu no Estadu fó prioridade liu ba konstrui infrastrutura estrada rurál, bee moos, edukasaun, no infrastrutura saúde.
Maibé hatutan PR Ramos Horta, Estadu no Governu minimiza tiha hodi kria fali faillansu boot iha setór agrikultura. Tuir loloos tau prioridade ba setór agrikultura. Tanba, setór ne’e maka hametin seguransa alimentar no ai-han.
Dehan PR Ramos Horta, husi faillansu boot iha agrikultura ne’e maka mosu problema boot ho naran estanti. Problema estanti ne’e maka hamate tiha sub nutrisaun kosok oan sira nia inan nia susu been no hahan nutritivu ba bebé sira bainhira tama ba idade fulan neen.
Nune’e dehan PR Ramos Horta, lansamentu projeitu Avansa San husi USAID ne’e, bele dezenvolve agrikultura rurál sira hodi hetan autosufisiensia ba igualidade hahán. Tanba, sei minimiza problema estanti iha sub nutrisaun ba kosok oan sira, hodi garante kualidade rekursu humanu iha futuru.
“Programa USAID ida ne’e, ha’u senti kontente tebes. Tanba, programa ne’e la’o ho nia komitmentu. Espera Leader ship sira sei implementa programa ne’e ho di’ak no kualidade”, PR Ramos Horta espresa nia esperansa.
Iha parte seluk Embaxadór Estadus Unidus iha TL, Marc Weinstock hatete, instrumentu ba kontribuisaun iha projeitu sira durante ne’e maka relasaun bilaterál. Durante tinan 22 TL no Estadus Unidus harii ona parseria hodi hametin relasaun bilateral ne’e.
“Hanesan Presidente Republika Ramos Horta dehan, saida mak ita presija atu hametin no reforsa mak seitór agrikultura. Seitór ida ne’e mak objetivu prinsipál husi lansamentu projeitu Avansa San”, Marc dehan.
Katak Marc, iha Estadus Unidus mós kuandu ko’alia kona-ba agrikultura, signifika hotu-hotu hakarak atu hametin seguransa alimentar no siguransa ai-han. Tanba ne’e mak hamosu projetu ne’ebé hetan ona lansamentu ne’e.
Marc hatete, projeitu Avansa San ne’e nu’udar enkuadra politika aumenta seguransa ai-han iha TL. Nune’e, bele hadia ema nia nutrisaun. No mós atu apoiu seitór agrikultura ne’ebé bele adapta ba mudansa klimatika.
“Husi adaptasaun ba mudansa klimatika ne’e maka sei produs produtu agrikultura hirak ne’ebé bele uza ba komersializa iha nivel komersiu internasionál nian. Ne’e mak objetivu husi lansamentu projetu ida ohin ne’ebé mak USAID halo”, Marc esplika.
Entertantu lansamentu ne’e hala’o liu husi baku tambor husi PR Ramos Horta ne’ebé akompaña husi Embaxador Estadus Unidus iha TL, Marc Weinstock no bainaka importante sira seluk.(Asesu Youtube/Facebook https://www.facebook.com/Media1Timor Media ONE Timor)
Ita nia komentariu konaba post ne'e.