(Reportájen Jacinto Caet/Editora Suzana Cardoso)
DILI (Média ONE Timor) – Iha seremonia komemorativu loron mundiál ba Oceanos, Prezidente Repúblika (PR) Demokratika Timor-Lesta, José Manuel Ramos Horta husu ba sidadaun hotu-hotu atu labele soe foer no tesi ai-arbiru. Tenke proteze ai-horis sira.
“Enjeralmente natureza sempre di’ak. Sei bele konsensializa ita nia sosiedade rasik para rai ki’ik ida ne’e salva ita nia aan no salva ita nia natureza. Nomoos kontribui ba meiu ambiente iha mundu,” hateten PR Ramos Horta ba Jornalista hafoin remata seremonia loron mundiál meiu ambiente Oceanos iha resintu UNTL Hera, Dili, Kuarta (08/06/2022).
Tanba, esplika PR Ramos Horta iha parte rai-maran no tasi tenke proteze floresta. Labele tesi ai-arbiru. Labele soe lixu iha mota laran. No labele soe foer iha tasi ibun. Ema hotu-hotu tenke iha konsiensia ba ida ne’e.
Tuir PR Ramos Horta, atu sidade moos maka sosiedade tenke iha konsensializa. Labele so’e foer. Tanba kada semana funsionariu no estudante sira hamoos iha fatin publiku. Liu-liu iha tasi-ibun.
“Ita ba hamoos, aban fo’er nafatin. Entaun povu la edukadu sosiedade. La edukadu estudante kuaze 40 mill. Sira barak konsensializa no mobiliza povu, nune’e Timor sai modelu di’ak”, dehan PR Ramos Horta.
Xefe Estadu ne’e husu ba liderasan nasional sira tenke halo kampaña konsistensia liuhusi média sosial. No autoridade lokal sira. Tenke ko’alia ho xefe suku, aldeia fo insentivu ka multa ba sira.
Katak PR Ramos Horta, bainhira xefe suku no xefe aldeia la partisipa tenke hetan multa. Tanba la kumpre programa governu nian, liuliu meiu ambiente. Xefe suku no aldeia mesak matenek no hadomi komunidade. Nune’e tenke insentivu. Tanba autoridade lokal maka mata-dalan ba públiku.
“Ha’u kontente tebes atual governu hola desizaun aumenta vensimentu ba xefe suku sira. Uluk kedas ha’u defende ida ne’e”, katak PR Ramos Horta hodi husu kolaborasaun ativu hosi autoridade lokal sir aba ambiente ne’ebé moos.
Iha sorin seluk reitor UNTL, Joao Soares Martins hateten, objetivu halo semenariu ne’e hodi sidadaun hotu-hotu hatene sira nia riku-soin tasi nian. Tanba, Timor-Leste (TL) nia tasi boot liu rai-maran.
“Ita hatene TL nia tasi boot liu rai-maran. Tanba ne’e ita presiza investe maka’as ba tasi para bele hetan reseita mai ita nia nasaun. Fatin turismu tasi nia seidauk aproveita masimu. Liuhusi semenariu ne’e para motiva sidadaun hotu konsentra esforsu tomak hodi dezenvolve riku-soin tasi nian”, dehan nia.
Seremonia komemorativu loron mundiál ba Oceanos ne’e hetan partisipasaun hosi; Prezidente Repúblika Jose Manuel Ramos Horta, Reitor Universidade Nasional Timor Lorosa’e (UNTL) Joao Soares Martins, dosente sira no moos estudante hosi departamentu agrikultor no peskas.(Asesu You Tube/Facebook Media ONE Timor)
Ita nia komentariu konaba post ne'e.