Atambua (www.mediaonetimor.co) – Primeiru Ministru (PM), Kay Rala Xanana Gusmão nia vizita servisu bá RAEOA (Rejiaun Administrativu Espesiál Oekuse Ambeno) liu husi fronteira Mota-ain, simu direta husi Komandante Resort Militár (Danrem) 161 Wira Sakti Kupang, Brigadeiru Jenerál (Brigjen) Tentara Nasionál Indonsia (TNI), João Xavier Barreto Nunes.
Tuir komunikadu imprensa ne’ebé Media ONE Timor asesu husi Média-Gabinete Primeiru Ministru (Média-GPM) esplika katak, PM Xanana nia vizita servisu ne’e hakat liu fronteira Mota-ain, Silawan, Tasifeto parte Timur, Nusa Tenggara Timur (NTT), Indonezia nian ne’e iha loron 17 Fevereiru 2025.
Antes atu liu bá RAEOA, iha fronteira Mota-ain PM Xanana simu direta hosi Danrem Kupang, 161 Wira Sakti Kupang, Brigjen TNI, João ne’ebé hetan akompaña hosi Xefe Postu Integradu fronteira Indonézia nian.
Sei husi komunikadu Média-GPM nian ne’e katak, PM Xanana hetan konvite hodi kafé hamutuk ho Danrem João iha Postu Integradu Fronteira Mota-ain. Durante minutu maizu menus 40 nia laran, sira hala’o konversa ho amigável molok hakat liu bá RAEOA.
Iha kafé hamutuk ne’e, ko’alia mós kona-bá oinsá planu estabelesimentu kooperasaun no liña koordenasaun defeza ho Seguransa iha Fronteira, entre nasaun Republika Indonezia (RI) no Nasaun Timor-Leste nia fronteira iha futuru.
Brigjen João garante bá PM, Xanana katak, situasaun no liña koordenasaun defeza no seguransa iha fronteira sei kontinua di’ak liu-tán. Tanba misaun hosi servisu seguransa nian iha fronteira atu lori dame no moris hakmatek bá povu iha país rua ne’e nian. (Asesu Youtube/Facebook https://www.facebook.com/Media1Timor Media ONE Timor)
Ita nia komentariu konaba post ne'e.