(Reportájem Angelo da Costa/ Editora Suzana Cardoso)
DILI (Media ONE Timor) – Atu utiliza internet saudavel, kuidadu no seguru hodi kombate hoax ko’alia bosok no situs negativas sira iha Timor-Leste (TL) mak Sekretariu Estadu no Komunikasaun Sosial (SECOMS sigla portuges) hala’o sensibilizasaun literasia dijital ba estudante sira husi Eskola Tékniku Vikasional Becora, Dili, Segunda, (11/07/2022).
“Ohin kampaña ne’e ba dala tolu ona. Objetivu, atu desamiña informasaun ba estudante atu oinsa bele utiliza internet ho saudavel, kuidadu hodi kontribui ba kombate hoax ko’alia bosok no sitius negativus sira iha ita nia rain.”
Lia hirak ne’e hato’o husi SECOMS, Mericio Juvinal Acara ba Jornalista hafoin remata sensibilizasaun litetasia dizital ba estudante sira husi ESTV Becora Dili, Segunda (11/07/2022).
Mericio Acara, afirma Governu mós preokupa ba situasaun atual tamba iha era dizitalizasaun ida agora ne’e ema hotu-hotu livre hodi asesu ba sistema dizitalizasaun. Maibe informasaun barak ne’ebe tama iha tama SECOMS katak sidadaun barak utiliza media hodi trata malu, hatun malu no halo mos diskriminasaun ba malu.
Tamba ne’e edukasaun ba sidadaun sira ne’e importante. Liliu ba foin sa’e sira atu habelar sira nia koñesimentu konaba atu utiliza plataforma dizital sira. Tamba tuir dadus ne’ebé iha hatudu katak joven mak uza mídia sosial barak, liu ho nia plataforma sira hanesan Facebok, Yotube, Instagram, Watshapp, Tik Tok no sira seluk tan.
Nune’e husi parte Governu mós la bandu foin sa’e sira atu utiliza plataforma hirak ne’e. Maibe atu partila deit informasaun konaba oinsa atu utiliza sasan sira ne’e ho matenek no responsabilidade moral.
“Ha’u mós esplika ba estudante sira katak sira presiza iha kapasidade atu husu tuir konaba informasaun no situs ne’ebé sai iha plataforma dijital sira ne’e, mai husi fontes ne’ebé kredivel. No presiza husu konteudu ne’e importante ka lae. Sekarik informasaun ne’e la los no la fó benifisiu “lalika Like no Fahe tutan”. Meius ida ne’e deit ita bele kombate hoax ka lia bosok sira”, Mericio esplika.
Governante ne’e hatutan, informasaun hoax perigu ba ema nia moris. Tamba bele sobu ema nia unidade no konfiansa ba malu. No halo mós sidadaun sira nia moris la hakmatek hanesan hatuun malu. Enkuantu ho problema hirak ne’e Governu mós preokupa tamba informasaun ne’ebé sai barak liu mak bosok. Tamba ne’e viola direitu prinsipál sidadaun sira nian.
“Viola direitu prinsipál mak iha direitu atu asesu ba informasaun ne’ebe no kredivel. Ne’e direitu fundamental sidadaun sira nian i se ema hahu uza media sosial hodi fahe informasaun ne’ebe mak la loos ne’e violasaun grave ba direitu prinsipal ida ne’e”, dehan Mericio.
Ho problema sira ne’e husi parte SECOMS sei servisu hamutuk ho estrutura eskola sira evolve mos husi parte igreja hodi hare prespetiva moral ninian, evolve mos ministeriu relevante sira hanesan Sekretariu Estadu Igualidade Jeneru nomos Sekretariu Estadu Juventude no Desportu (SEJD) atu nafatin sensibiliza informasaun ne’e ba sidadaun hotu.
Iha sorin seluk Diretor Eskola Sekundariu Tekniku Vokasional Becora (ESTV Becora), Francisco Guterres, apresia ho atividade ida ne’e tamba ba dala-uluk husi parte SECOMS ho ekipa marka prezensa iha ESTV Becora hodi dezamina informasaun hanesan ne’e ba ninia estudante ligadu ho era dizitalizasaun.
“Ida ne’e nudar meius ida atu estudante sira bele prevene an husi informasaun bosok ne’ebe mosu iha media sosial”, nia akresenta.
Francisco Guterres argumenta katak ho senbilizasaun ne’e bele aumenta tan estudante sira nia koñesimentu konaba oinsa utilizasaun rede internet ho saudavel hodi kombate lia bosok iha plataforma dijital nian. (Asesu Youtube/Facebook https://www.facebook.com/Media1Timor Media ONE Timor)
https://mediaonetimor.co/wp-admin/post-new.php
Ita nia komentariu konaba post ne'e.