Hamenus Importasaun Foos, Banku Mundial Apoiu Makina Haree 163

Maliana (www.mediaonetimor.co) – Hamenus importasaun fos ne’ebé tinan ba tinan aumenta ba bei-beik mai Timor-Leste (TL), nune’e banku mundial fó apoiu trator no makina produsaun haree nian, hamutuk 163 ba agrikultur sira.

Tuir komunikadu imprensa ne’ebé Redasaun Media ONE Timor simu, Ministru Agrikultura, Pekuaria, Peskas no Florestas (MAPPF), Marcos da Cruz, Representante Banku Mundial, Bernard Harborn, Presidente Autoridade Munisipiu (PAM) Bobonaru Alexandre Pires no ida hosi Groupu Agrikultur Pue Dolen, Antonio Maulelo iha sira nia intervensaun hatete, makina ne’ebé oferese ba agrikultur hirak ne’e sei hasa’e produsaun haree. Nune’e bele hamenus importasaun fos mai TL.

Banku Mundial apoiu Ministeriu Agrikultura, Pekuaria, Peskas no Florestas (MAPPF) liu husi nia programa Sustainable Agrikulture Productivity Improvement Project (SAPIP) ba Munisipiu Bobonaru, Ainaru no Kovalima.

Iha Postu Administrativu Maliana, Munisipiu Bobonaru, Banku Mundial entrega; trator liman unidade 23, makina kuda haree unidade 45 no makina koa haree unidade 11 ba groupu agrikultor na’in 23, iha loron Sesta, 25 Otubru 2024.

Fasilidade hanesan fahe mos fó ba groupu agrikultor iha Munisipiu Ainaru no Kovalima, iha loron rua antes ne’e. Groupu agrikultor Ainaru; simu trator liman unidade 15, makina kuda haree unidade 21 no makina koa haree unidade neen. No agrikultor iha Munisipiu Kovalima simu makina kuda haree unidade 36 no makina koa haree undade neen.

Husi makina produsaun haree hamutuk 163 ne’ebé oferese hosi Banku Mundial ne’e, esplika Ministru MAPPF, Marcos da Cruz hodi rekoñese setór agrikutura iha TL seidauk dezenvolve ho di’ak. Presija esforsu barak. Nune’e nia agradese ba apoiu husi Banku Mundial liu husi programa SAPIP.

Ministru Marcos husu ba groupu agrikultur sira atu uza makina hirak ne’ebé oferese ona husi Banku Mundial ne’e ho didiak. Tanba, makina haree ne’e sei tulun agrikultor ki’ik sira hodi hasa’e sira nia produsaun haree.

Aliende ne’e katak Ministru Marcos, produsaun haree ne’ebé sa’e, otomatikamente sei kontribui hadia ekonomia rai laran. Hanesan; sei produs fos ho volume barak, oferese fos ba tempu naruk ho nutritivu no mos fos sei sufisiente iha merkadu.

“Ita presija kuidadu fasilidade makina haree sira ne’e. Servisu uza makina ho didiak ba. Nune’e, kuandu ita husu tan Banku Mundial sei hakarak atu tulun. Programa SAPIP ne’e hahu ona dezde tinan 2016 to’o agora”, Ministru Marcos dehan hodi hatutan.

Agradese ba Banku Mundial tanba apoiu ona hadiak setor agrikultura iha TL. No ita hein katak servisu hamutuk ne’e sei kontinua nafatin iha tempu tuir mai. Maibé, agrikultur sira mos tenki hatudu rezultadu diak no uza makina hirak ne’ebé apoiu ona ne’e ho diak. Labele uza makina haree nian ne’e, ba fali atividade seluk ne’ebé la-relevante.

Tuir dadus hosi MAPPF nian hatudu katak iha munisipiu Bobonaru deit iha natar kuaze hectares rihun ualu. Bainhira natar hirak ne’e utiliza ho didiak sei bele sustenta fos hodi uza ba konsumu lokál, iha Munisipiu Bobonaru no iha teritoriu TL.

Mensajen hanesan hato’o mos hosi Representante Banku Mundial Bernard Harborn nian, ne’ebé lee husi nia Secretaria Etelvina de Jesus afirma, apresiasaun klean ba agrikultor sira nia espíritu, dedikasaun no komitmentu ba setór agrikultura.

“Timor-Leste depende mak’as ba importasaun foos husi nasaun seluk. Ita espera katak iha tempu badak ho mákina hirak ne’e sei ajuda ita-nia agrikultór sira badinas liu tan. Sira bele haluan tan natar no haluan tos boot liu-tan. Aumenta volume agrikultur sira nia produsaun haree”, Bernard dehan.

Esplika Bernard, durante ne’e agrikultór sira serbisu mak’as. Maibé dala barak utiliza meius manuál deit hodi prodús haree no produtu lokál sira. Nune’e, banku mundiál fó ajuda ekipamentu hirak ne’e hodi bele tulun agrikultor sira hamenus sira nia enerjia no tempu ne’ebé soe barak liu, bainhira halo natar ho manuál.

Katak Bernard, dadus Banku Mundial nian hatudu TL iha malnutrisaun 4%. Relatoriu Globál Hunger Index 2024 mos hatudu TL nia index hamlaha iha kategoria ne’ebé sériu. Ho apoiu ne’e bele aumenta produs ai-han lokál no mós bele servisu ho efisiensia hadi’a aihan ne’ebé nutritivu.

Iha parte seluk tuir Presidente Autoridade Munisipiu (PAM) Bobonaru ne’ebe mos nu’udar Presidente Komite Jestaun Groupu Agrikultor, Alexandre Pires katak merkadu existe. Maka, agrikultur sira presiza matenek atu observa no aproveita. Ema agora preokupa ba sira nia saúde. No prefere atu han hahan ne’ebé organiku.

“Ema barak hakarak han hahan organiku, ne’e oportunidade merkadu ida. Munisipiu Bobonaru iha ona politika katak, funsonariu sira tenki konsumu fós lokal. Ne’e mos oportunidade ida ba agrikultur kuda haree”, Alexandre sujere.

Aliende ne’e iha mos oportunidade seluk katak, PAM Alexandre maka hanesan merenda eskolar. Osan TL nian, barak mak sai ba badiu iha liur. Tanba Timor-oan sira la aproveita hodi oferese sasan iha merkadu. Ita ko’alia merkadu, maka merkadu nia oportunidade ne’e mak; ema hakarak han fos arganiku, merenda eskolar no mos obrigatoriu ba funsionariu sira atu konsumu fos organiku.

Maibé tuir Xefi Groupu Agrikultura Pue Dolen, Antonio Maulelo ne’ebé halo vida agrikutur kuaze tinan 50 ona ne’e ho fiar an promete, ho fasilidade ne’ebé oferese husi Banku Mundial ne’e, sira nia groupu prontu atu servisu hodi fó rezultadu diak liu tan.

“Tinan ida ami kuda haree dala ida deit. Ami hasai osan barak hodi aluga trator no selu ema kuda no mos ko’a haree. Maibé ho trator no makina ne’ebé iha ona ne’e, ami bele kuda dala rua iha tinan ida. No ami mos bele kuda batar no modo”, Antonio dehan hodi hatutan.

Atu produsaun haree iha Munisipiu Bobonaru bele asesu ho diak iha merkadu, maka Xefi Groupu Agrikultura Pue Dolen ne’e sei ko’alia ho edukasaun ba programa merenda esklar para lalika sosa ona aihan husi mota sorin (Atambua, Indonezia-Red). Tanba agrikultur Bobonaro oan bele ona oferese.

“Fasilidade hirak ne’ebé ami agrikultur sira simu ne’e sei apoiu hodi hasa’e produtividade no hamenus kolleta ne’ebé bele estraga. Tanba koa ho liman. No mos hafasil ligasaun ba merkadoria hodi hadia economia gamilia nian”, dehan Antonio. (Asesu Youtube/Facebook https://www.facebook.com/Media1Timor Media ONE Timor)