(Reportajen Estajiadu Media ONE Timor-Simão dos Santos)
Dili (www.mediaonetimor.co) – Mudansa klimatika ne’ebé dala barak fó impaktu ba vuneravel sira, hafanu Oxfam Hong Kong hodi fó apoiu fundus liu husi Oxfam Timor-Leste (TL) ba Asosiasaun Jornalista Timor-Lorosa’e (AJTL) hodi realiza atividade jornalistiku ba komunidade hirak ne’ebé hela iha área rurál.
Tuir Prezidente AJTL, Zevonia Vieira no jestor programa advokasia no influensia iha Oxfam TL, Adilson da Costa iha sira nia deskursu, Segunda, (23/09/2024) iha edifisiu Oxfam TL katak, atividade jurnalistiku hirak ne’e maka hanesan media tour no kompetisaun fotografia kona-ba impaktu mudansa klimatika.
Prezidente AJTL, Zevonia Vieira hatete, impaktu husi mudansa klimatika dala barak akontese ba grupu vuneravel sira. Hanesan; feto, labarik, katuas, ferik sira nomos ema ho difisiensia sira.
Nune’e maka hatutan Zevonia, grupu vuneravel hirak ne’e dala barak sai alvu ba imapktu mudansa klimatika. Sira maka dala barak hasoru difikuldade ba buka bee moos ho distansia dok husi uma. No oinsa mak setor produtivu sira nia produsaun tun, tanba impaktu husi mudansa klimatika.
“Hakarak agradese ba Oxfam Timor-Leste ho Oxfam Hong Kong nian, ne’ebé mak fó fiar ba AJTL hodi lidera projetu kona-ba hala’o media tour ba asaun justisa klimatika iha Timor-Leste durante tinan ida nia laran. No kompetisaun fotografia nian”, Zevonia dehan.
Katak Zevonia, Oxfam nia kunfiansa ba AJTL maka hala’o kompetisaun fotografia kona-ba mudansa klimatika no halo advokasia liga ho justisa klimatika iha Timor-Leste. Tanba, impaktu husi mudansa klimatika mak’as los ba grupu vuneravel sira no komunidade hirak ne’ebé hela iha area rurál iha TL.
Kompetisaun fotografia Zevonia dehan, nakloke ba públiku ho idade ne’ebé mak Oxfam desidi, hahú husi tinan 17 to’o tinan 35. Kompetisaun ne’e mos la’os ba membru AJTL de’it. Maibé, ba ema sira ne’ebé mak iha esperensia profisonál iha fotografia. Liu-liu ba joven sira.
“Kompetisaun fotografia ne’e atu motiva joventude sira nia an hodi hasai imajen, istoria sira ne’ebé mak liga ho ema nia moris. Liga ho mudansa klimatika. No imajen ne’e bele muda ema nia hanoin. Muda ema nia hahalok. Muda mos ema nia attitude”, Zevonia hatete ho lia fuan korajen atu joven sira prontu kompete iha kompetisaun oin-oin no organizasaun oin-oin.
Atividade kompetisaun fotografia ne’e, AJTL ho Oxfam anunsia manan na’in ba ema na’in tolu. Maibé ba manan na’in dahuluk sei reprezenta TL ba iha Nasaun Viji hodi tuir expozisaun fotografia liga ho mudansa klimatika.
Hatete Zevonia, manan na’in sei reprezenta TL hodi esplika impaktu husi mudansa klimatika ba grupu vuneravel sira iha TL. Grupu vuneravel hirak ne’e maka hanesan; feto, labarik, katuas, ferik nomos ema ho difisiesia. No setor produtivu sira nia produsaun tun, tanba impaktu husi mudansa klimatika.
Iha parte seluk jestor programa advokasia no influensia iha Oxfam TL, Adilson da Costa hatete, kolaborasaun servisu entre Oxfam TL ho Oxfam Hong Kong hala’o liu husi apoiu fundus ne’ebé oferese husi Oxfam Hong Kong mai TL. Nune’e maka programa kompetisaun expozisaun fotografia ne’e bele realiza, hafoin servisu hamutuk ho AJTL.
“Manan na’in primeiru ba kompetisaun fotografia, sei reprezenta joven Timor-Leste ba Viji. Manan na’in ne’e sei aprezenta rezultadu fotografia ne’ebé mak nia hasai ne’e. No sei esplika imajen hirak ne’e nia kontextu, liga ho mudansa klimatika ne’ebé akontese iha Fulan Outubru no Novembru nia laran”, Adilson reafirma.
Katak Adilson, iha tinan 2024 ne’e Oxfam TL fó ba AJTL hala’o programa hanesan; atividade kompetisaun fotografia no programa média tour. Liu husi lori jornalista sira ba area rurál hodi halo kobertura kona-ba impaktu mudansa klimatika ba agrikultor sira nia produtu.
Aliende ne’e, lori mos jornalista sira ba halo kobertura kona-ba bee matan hirak ne’ebé mak hetan impaktu husi mudansa klimatika. Liu-liu ba komunidade hirak ne’ebé hela iha area rumotas. Ba sira, oinsa maka bele responde sira nia nesesidade baziku iha mudansa klimatika ne’e
“Oxfam Timor-Leste nafatin fiar katak, ba oin ita sei buka oportunidade atu servisu hamutuk nafatin ho Oxfam Hong Kong. Nune’e bele promove liu tan joven sira nia talentu iha area fotografia nian”, promote Adilson. (Asesu Youtube/Facebook https://www.facebook.com/Media1Timor Media ONE Timor)
Ita nia komentariu konaba post ne'e.