Joven Ataka Malu, Aplika Prizaun Preventiva

(Reportájen Tomas dos Reis/Asistente Editor Jainto Caet)

BAUKAU (Média ONE Timor) – Hafoin joven sira ataka malu iha Suku Afaloikai, Postu Administrativu Uatulari, Munisípiu Vikeke, Tribunál Distrital Baukau (TDB) aplika ona prizaun preventiva ba arguidu na’in lima.

“Horseik primeiru interogatóriu tribunál fó ona medida koasaun ne’ebé maka aplika ba sira na’in lima tama hotu prizaun preventiva. Ameasa sira ho krime ofensan integridade agravadu”, dehan Defensor Públiku, José Delima ba Jornalista iha nia kna’ar fatin Vila-Nova Baukau, Kinta (07/07/2022).

Defensor José Delima esplika, sidadaun ne’ebé komete krime hanesan ameasa ba malu sei kastigu tinan rua ka ualu, ne’ebé previstu ona iha artigu 146 alina E kodigu penál Timor-Leste (TL) nian.

Defensor Públiku ne’e haktuir, akontesimentu atake malu entre joven hosi Suku Afaloikai ho Mataohi, vitima ho inisial V hetan kanek grave provoka indikasaun hosi grupu arte marsiais bainhira hadeer aifunan iha mate uma. Involve hosi kazu ataka malu ne’e detein arguidu na’in lima ho naran inisial, EM, EA, AF, JF, inklui Xefe Aldeia.

Bainhira arguidu na’in lima presta iha audénsia primeiru interogatóriu arguidu EM mak sai autór prinsipál ba prosesu tomak. Tanba, nia rasik konfesa katak nia parte mak tuda iha fatin akontesimentu.

Husi parte seluk arguidu AA hanesan Xefe Aldeia simu telefone hosi Xefe Suku hodi ba fatin akontesementu haree situasaun, ikus xefe aldeia mós involve hotu iha kazu refere.

“Parte defeza sente la-justu, tanba ema ne’ebé autór prinsipál nia rasik konfesa katak nia sala, tuir depoitmentu sira na’in haat, kalan haree mak Xefe Aldeia de’it, sira na’in tolu nia la haree, sira na’in tolu mós konfesa katak sira involve hotu, antes akontese problema ne’e sira ameasa malu tiha ona, kalan ne’e sira mai serang de’it sira mós halo defeza ba sira nia aan akate ba malu no tuda rahun uma”, José hatutan.

Entretantu akontsementu ne’e iha loron 04 Jullu 2022 no halo julgamentu iha TDB iha loron 06 Jullu 2022 prezide hosi Juíza Florensia Freitas, reprezentante Ministéiru Públiku Bartolomeo Araujo, arguido na’in-5 hetan defeza hosi defenzor públiku José Delima. (Asesu Youtube/facebook https://www.facebook.com/Media1Timor Media ONE Timor)