(Reportajem Angelo da Costa/Asisten Editor Marcelino Tamae)
DILI (Media One Timor) — Antisipa udan been nalihun no udan boot hanesan kalamidade iha loron 4 Abril 2020 hodi halo edifisiu Radio Televizaun Timor-Leste, Empreza Públiku (RTTL,EP) hetan estragus, maka tenke harii edifisiu temporariu hodi hein edifisiu foun.
“Akontesimentu inundasaun iha tinan kotuk RTTL rasik bee nalihun maka’as iha area laran. Hau tuun diretamente hodi mai koalia ho Prezidente RTTL, E.P foun (José António Belo alias Taraleu) para halo proposta konkreta ida hodi hato’o ba Mapkoms”.
Hateten Ministru ba Asuntu Parlamentar no Komunikasaun Sosial (MAPKOMS), Francisco Jeronimo Pereira, Tersa, (28/06/2022) iha ninia deskursu bainhira ofisialmente hala’o asina akordu ho Diretor Kompañia Banin Lemar, Domingos Sequeira ba kontrusaun Studiu RTTL.EP ho nia tipu provizoriu.
Konstrusaun temporariu ba edifisiu RTTL,EP halo hosi governu liu hosi Mapkoms ne’ebé prevee ona orsamentu jerál (OJE) 2022 nian iha fundu infraestrutra ho montante Juta ida-resin hodi halo Studiu foun no temporariu.
Mapkoms Jeronimo esplika liutan, objetivu hosi proposta konkreta ne’e atu harii edifisiu liliu studiu provizoriu ida. La’ós permanente, hodi fó kondisaun ne’ebé di’ak ba Mídia RTTL,EP, hala’o sira nia knaar.
Tuir Mapkoms Jeronimo, RTTL.EP hamrik dezde TL hetan ukun aan to’o ohin loron seidauk iha studiu ne’ebé diak, kompara ho Radiu Televizaun privadu nian ne’ebé hamrik ikus di’ak liu fali Governu nian.
Hosi preokupasaun ne’e maka Mapkoms Jeronimo luta hodi hetan projeitu ne’ebé mak bele asina ona ninia akordu. La fasil. “Tanba ne’e mak ohin hau tenke lansa asina akordu ida ne’e. Se kleur fali ema balu deskonfia Mapkoms lakohi atu asina ho intensaun pesoal ne’ebé ruma karik,” tenik nia.
Ministru ne’e hatete, Governu mós hahú ona halo estudu viabilidade ba iha area ai-mutin ne’ebé sei sai futuru harii edifisiu RTTL.EP no Tatoli.IP. Posibilidade sei halo lansamentu fatuk dahuluk iha tinan oin.
“No ida ne’e mak Mapkoms nia luta para bele fo satisfasaun hotu. Maibé uituan-uituan hodi fo kondisoens dahuluk ba RTTL,EP. Nune’e husu ba Kompañia Banin Lemar para aselera lalais kontrusaun temporariu ne’e,” ejiji Mapkoms Jeronimo.
Entertantu edifisiu temporariu ba RTTL,EP nia konstrusaun ho total osan Juta ida USD ho nia medidas; naruk metru 30. No luan metru 15. Ho nia andar tolu. Projeitu ne’e manan hosi Kompañia Banin Lemar, Unipesoal, Lda ne’ebé sai nain maka Domingos Sequeira. Kontrusaun Studiu RTTL.EP ofisialmente hala’o asina akordu ho nia tipu provizoriu ho durasaun servisu fulan neen.
Mapkoms Jeronimo husu ba Kompañia Banin Lemar atu servisu maka’as no lalais. Nune’e to’o Fulan Dezembru tinan ne’e tenke remata ona. Atu nune’e iha fulan Janeiru tinan 2023 sai hanesan prezente ida ba RTTL.E,P hodi hala’o servisu iha edifisiu provizoriu ne’e.
Maske material fiziku transporta hotu hosi rai viziñu Indonézia, maibé Diretór Kompañia Banin Lemar, Domingos Sequeira, garante sei remata konstrusaun ne’e tuir tempu ne’ebé determina durante fulan neen.
“Molok atu selebra asina kontratu ne’e, buat hotu-hotu kompletu ona. No komesa aban ba oin, ami hahú ona hala’o servisu. Sei harii ami nia gudang (armajen) iha ne’e ona. Tanba ne’e ha’u garante fulan neen tenke hotu”, nia hatete.
Konstrusaun ho andar tolu no sei han osan Juta Ida USD ne’e ne’e nu’udar edifisiu temporariu hodi garantia servisu. Maibé konstrusaun permanente sei hala’o tempu besik, iha area Aimutin.(Asesu Youtube/www.facebook.com/Media ONE Timor)
Ita nia komentariu konaba post ne'e.