(Reportajem Estajiada Media ONE Timor Teotonia ho Mariquita)
Dili (www.mediaonetimor.co) – Dezastre naturais ne’ebé akontese durante semana ida nia laran iha Fulan Agostu 2023, haterus komunidade sira ne’ebé hela iha munisipiu hitu. Maka hanesan; Ainaro, Bobonaro, Baucau, Covalima, Manatutu, Lauten no Viqueque.
“Hosi Autoridade Protesaun sivil (APC sigla portugues), rejista tan munisipiu hitu maka hetan dezastre naturais iha teritoriu tomak. Hosi dezastre ne’e, komunidade afeitadu balun lakon uma no balun seluk lakon sasan uma laran nian. Maibé dezastre naturais ne’e lahakanek ema.”
Informasaun ne’e esplika husi Diretur Gabinete relasaun externál no komunikasaun, Anacleto Caetano ba Jornalista sira liu husi konferensia imprensa iha salaun APC iha Caicoli Dili, iha loron Segunda, (21/08/2023).
Nia esplika liutan, dezastre naturais ne’ebé maka akontese iha munisipiu hitu ne’e akontese iha loron 15 to’o loron 21 fulan Agostu tinan 2023. Dezastre ne’ebé maka akontese ne’e, mai husi tipu dezastre; rai halai, anin boot hodi sobu komunidade nia uma. No ahi han komunidade nia uma.
Katak Anacleto, kada munisipiu Ainaro, Bobonaro, Baucau, Covalima, Manatutu, Lauten no Munisipiu Viqueque ida-idak ho ninia tipu dezastre naturais ne’ebé diferente. Iha Munisipiu Ainaro akontese rai halai hodi afeita ba uma ualu hetan estragus. No fatuk hanehan vitima ida hodi hetan kanek iha parte liman.
Aliende ne’e, hatutan Anacleto rai halai moos akontese iha munisipiu Covalima hodi estraga komunidade nia uma rua. Maibé iha Munisipiu Baucau diferente. Tipu dezastre iha Baucau, maka anin boot hodi sobu komunidade nia uma tolu.
Dehan Anacleto, iha Munisipiu Bobonaro uma rua maka hetan estragus tanba anin boot. No anin boot moos akontese iha Munisipiu Viqueque hodi afeita ba komunidade nia uma rua maka hetan estragus. Maibé iha Munisipiu Lautem maka akontese ahi han komunidade ida nia uma. Hanesan moos iha Munisipiu Manatuto ahi han komunidade ida nia uma.
“Husi tipu dezastre hirak ne’e, ami husi Autoridade Protesaun Sivil rezista uma kain hamutuk 18 maka hetan afetada husi dezastre naturais. Maibé Autoridade Protesaun Sivil hamutuk ho parseiru sira fó ona apoiu emerjensia”, dehan Anacleto hodi hatutan.
Hasoru dezastre naturais ne’ebé akontese bei-beik, maka husu ba komunidade sira atu ho ida-idak nia konsensia rasik para muda husi fatin risku ba fali fatin ne’ebé maka seguru hodi nune’e bele asegura Ita nia familia no sasan sira. (Asesu Youtube/Facebook https://www.facebook.com/Media1Timor Media ONE Timor)
Ita nia komentariu konaba post ne'e.