Komunidade La Iha Konsiénsia, Kapitál Dili Nakonu Ho Lixu

(Reportajen Formandu Ceftec; Agusto dos Santos, Adelaide da Cunha, Edigar Magno, Adriana Gomes, Edmundo Ximenes, Luizinha de Jesus)

Dili (Media ONE Timor) – Sentru ba atividade; dezenvolvimentu, negósiu no estudu, halo ema loron ba loron aumenta ba bei-beik iha Kapitál Dili. Atividade iha Dili barak liutan, hodi halo produsaun lixu mós as. Lixu domina Sidade Dili, husi ema hirak ne’ebé seidauk iha konsiensia hodi so’e lixu arbiru.

Inkonsensia husi komunidade sai perkupasaun husi Xefe Departamentu Serviço Municipal de Água, Saneamento e Ambiente (SMASA),  Domingos dos Santos Soriano, Pesoál Saneamentu Dili, António Lopes no reprezentante komunidade iha Bairu Lerindah, Aldeia Badiac Suku Manleuana, Vitória das Neves hodi representa komunidade sira nia perkupasaun.

Lee Notísia Relevante: Resiklázen Hafurak Sidade Hodi Kontribui Pólitika Zero Plástik

Iha nia servisu fatin, iha semana datoluk Fulan Marsu 2023 iha nia servisu fatin Xefe Departamentu SMASA,  Domingos dos Santos Soriano hateten, komunidade mak laiha konsiensia hodi soe lixu tuir nia fatin.

“Governu prepara ona lixeira (lixu fatin-Red) iha kada bairu. Determina ona oráriu soe lixu, hahú tuku haat to’o tuku hitu dadeer kada loron. Maibé komunidade seidauk iha konsiénsia atu soe foer tuir fatin no tempu. Ne’e maka halo foer namkari domina Dili laran”, esplika Xefe Domingos.

Nia hateten, SMASA koolabora ona ho lider komunitáriu sira iha kada suku. Halo esforsu oin-oin hodi minimiza lixu ne’ebé mak dezorganizadu. Halo sosializasaun tuir programa anuál ne’ebé mak iha ona. Enkontru beibeik ho  xefe suku no xefe aldeia sira hodi fó aviza ba komunidade  hodi soe lixu tuir fatin no tempu.

“Ami mós fó ona kompeténsia ba autoridade komunitária sira atu kontrola. No fó hanoin beibeik ona iha enkontru entre bairu, aldeia no suku. Maibé iha prátika, komunidade balun laduun tau atensaun” Xefe Domingos hatete.

Xefe departamentu ne’e explika liu tan katak iha ona dekreitu Lei N^o 33/2008 ne’ebé regula kona-ba soe lixu. Maibé, seidauk implementa ho rigór iha baze. Tanba lei seluk la fó dalan atu aplika sansaun ruma bazeia ba lei refere.

Governu buka maneira oi-oin atu rezolve problema lixu ne’ebé mak nia volume aumenta kada tinan. Iha tinan 2011 Governu iha kareta ualu atu raut foer kada loron iha sidade Dili. Maibé iha tinan 2023 Governu iha ona kareta 70 husi kompañia lima ne’ebé mak governu kontratu atu transporta lixu husi Dili ba Tibar.

Xefe Domingos dehan, haree ba lixu ne’ebé kada loron aumenta ba beibeik, Governu kontrata  ona kompañia lima.  Mak hanesan; kompañia GSH hala’o nia servisu iha área Postu Dom Aleixo Lot A. Kompañia Nelces hala’o raut fo’er iha Postu Dom Aleixo Lot B. Kompañia Felipra responzabiliza iha Postu Vera Cruz. Kompañia Jacrilo hala’o nia servisu iha Postu Nain Feto. No kompañia Labilay hala’o nia servisu iha Postu Cristo Rei. Kada loron kareta ida tenki raut foer kamioneta tolu hodi transporta lixu ne’e ba iha Tibar.

Xefe Departamentu ne’e haklean liutan, iha loron 10 Marsu 2023, Governu halo ona lansamentu ba lixu fatin iha Tibar. Lansamentu ne’e hanesan pasu dahuluk atu maneza lixu ho sistema ida ne’ebé modernu liu iha Dili laran no Tibar.  Kompañia ne’ebé toma konta ba projetu ne’e husi Kompañia  China Harbour Timor.

Iha parte seluk Pesoál Saneamentu Dili, António Lopes informa ba Media ONE Timor, loron-loron sira raut foer dala tolu. Iha oras, entre tuku 05:00 madrugada to’o tuku 12:00 meiudia kada loron, tuir ida-idak nia rute ne’ebé termina ona iha kontratu. Foer iha rute ne’e tenke raut hotu iha loron ida nia laran. Maibé dalaruma la tuir tempu. Depende ba volume foer.

“Trek ida ami na’in tolu mak tuir hodi raut foer. Loron ida, trek tula foer husi Dili ba Tibar dala tolu. Ami iha parte Caicoli nian dalaruma foer barak. Tanba ne’e ami raut la tuir tempu ne’ebé mak kompañia hakarak. Dalaruma ami raut husi dadeer to’o loro-kraik”, António hatete.

Komunidade balun la kumpri oráriu soe foer nian. Balun soe foer arbiru la tuir nia fatin. No foer balun animal dada dook husi lixeiru. Ida ne’e mós difikulta pesoál saneamentu atu raut hotu foer tuir tempu determinadu.

“Lixu ne’ebé la soe iha nia fatin no la tuir tempu soe foer nian, ami la-bele raut ona. Dala barak komunidade sira mai soe namkari deit. Balun mai soe iha liur. Balun asu sira dada dook husi lixeiru. Maka foer hirak ne’e dala barak ami husik hela de’it”, tenik Pesoál António.

Nune’e pesoál saneamentu ne’e husu ba komunidade sira atu soe lixu tuir tempu. Tuir nia fatin, para  fasíl atu raut. Komunidade maka soe foer arbiru deit, foer sira ne’e animal sei dada dook. Anin sei hú namkari iha sidade laran, hodi Dili nakonu de’it ho lixu.

Iha sorin seluk reprezentante komunidade iha Bairu Lerindah, Aldeia Badiac, Suku Manleuana, Vitória das Neves rekoñese problema lixu iha Dili laran, tanba la iha konsiénsia husi komunidade.

“Governu prepara ona tanki hodi tau lixu iha kada bairu. Maibé komunidade la uza ho didi’ak. Iha bairu Lerindah ne’e Governu prepara tanki rua. Maibé, ami balun la soe lixu tama ba tanki laran. Dala-barak soe iha liur de’it.  Asu mai dada lixu hirak ne’e hodi lekar arbiru. Liu-liu labarik sira nia popok”, tenik Vitória.

Komunidade Bairu Lerindah ne’e akresenta, tanki lixu ne’ebé prepara ona ne’e la’os komunidade bairu Lerindah de’it mak uza ba soe lixu. Komunidade husi bairu seluk mós mai soe lixu iha tanki ne’e, maka kada loron sempre aumenta. Lixu hirak ne’ebé komunidade soe la separa hosi lixu bokon, maran, botir, plástiku no ai-sanak mistura de’it.

“Lixu ne’ebé soe mistura. La tau iha fatin. Dala-barak asu dada hodi lekar arbiru. No wainhira udan, bee lori lixu hirak ne’e namkari iha bairu laran. Ne’e fó impaktu saúde ba komunidade liu-liu moras diarea, isin katar inklui ispa”, Komunidade Vitória dehan.

Nune’e Komunidade Vitória reprezentante komunidade sira suzere ba Governu no komunidade bairu ida-idak atu halo jestaun ne’ebé di’ak hodi kontrola lixu iha Dili laran. Halo Dili sai sidade ne’ebé mak furak.

“Ami suzere ba Governu atu prepara lixu fatin sufisiente ba bairu hotu-hotu. Koloka kareta ida ba bairu ida. Nune’e komunidade bairu bele soe lixu kualker tempu. No husu ba komunidade bairu atu soe foer tuir fatin. No tuir tempu ne’ebé mak definidu ona,” katak Komunidade Vitória.

Lixu Kapitál Dili ne’ebé nunka hotu transporta hotu ba Tibar, hetan atensaun maximu husi komunidade Tibar, Munisipiu Liquisa. Iha dada lia ho Media ONE Timor, Komunidade ne’ebé mak bai-bain hili foer iha Tibar informa, kompañia China Harbour Timor rekolla ona sira nia kartaun eleitoral, hodi sai traballadór permanente iha lixeiru Tibar ne’ebé mak iha tempu badak sei halo renovasaun ba fatin foer nian ne’e. No sei maneja ho sistema modernu.

“Ami hatama hotu ona kartaun eleitoral. Ami mós tuir ona treinamentu kona-ba hili no hatene haketak foer. Agora ami hein atu kompañia China ne’e mai halo kontratu ho ami, para sai traballadór permanente. Ami aseita ho sistema ne’e. Tanba bele halo ami nia servisu tuir tempu no ami bele hetan osan hanesan”, tenik Marquita ho antujiazmu.

(Asesu Youtube/Facebook https://www.facebook.com/Media1Timor Media ONE Timor)