(Reportajen Jornalista Media ONE Timor Mariquita Freitas)
Dili (www.mediaonetimor.co) – Difisiensia fiziku ne’ebé hetan hafoin halai ba ai laran bainhira remata loron konsulta popular, halo moris feto ran ida ho naran Marciana Ximenes durante tinan 25 nia laran depende de’it ba ninia família.
Ba Jornalista sira ne’ebé hala’o hela atividade media tour kona-ba asaun mudansa klimatika iha Aldeia Vallana, Suku Lore Ida, Postu Administrativu Lore, Munisipiu Lautém, Sesta, (31/05/2024), Justina Ximenes no Carlos Fernandes nu’udar inan aman husi Marciana Ximenes konta, sira nia oan feto ne’e moris ho kondisaun normál.
Haktuir Justina Ximenes ne’ebé nu’udar inan husi Marciana Ximenes ho lian Fataloku husi Munisipiu Lautém katak, sofrementu fiziku ne’e kona hafoin fila husi evakua ba ai laran bainhira remata loron konsulta popular nian.
“Hafoin loron konsulta popular iha loron 30 fulan Agostu tinan 1999, ami hotu halai ba ailaran tanba tauk milisia. Bainhira ami fila mai villa, oan feto ne’e hahú isin manas to’o akontese nia estika an hela de’it”, Justina konta.
Katak Justina, Marciana Ximenes nu’udar oan daruak husi maun nain lima ne’e moris iha loron 03 Marsu 1999. Moris ho kondisaun normál. Marciana halo idade fulan 11, hanesan ema bain-bain nia kumesa lao ona. To’o iha loron konsulta popular remata halai ba ailaran, Marciana nia kondisaun mos sei di’ak hotu.
Maibé hatutan Justina, hafoin situasaun normál iha vila Lospalos laran nian kumesa normál ona maka hotu-hotu fila fali mai. To’o iha vila, Marciana kumesa isin manas. Liu loron ida nune’e isin manas sa’e mak’as. Akompaña ho estika an.
Marciana ne’ebé to’o agora dala ruma sempre estika an hela de’it ne’e katak Justina, família halo tratamentu hodi lori ba hospitál. Baixa iha hospitál, doutor sona no fó aimoruk. Maibé laiha mudansa no osan mos laiha ona. Maka, família desidi lori fila fali mai uma.
“Durante iha hospitál, doutor sira sona nia (Marciana-Red). Maibé nafatin labele bok an. Tamba, liman ain toos tia ona. Maka ami deside lori fila mai uma. To’o agora ami familia maka attende nia”, dehan Justina.
Hatan Jornalista kona-ba moras saida maka doutor sira deteta, hatan Justina hodi hatete, Marciana halo tratamentu durante fulan hitu iha hospital doutor sira dehan nia hetan moras malaria ne’ebé sirkula direta ba iha nia ulun hodi rezulta liman ain toos tia. No ko’alia mos lahatene tiha.
Justina esplika liutan, parte autoridade lokál mai ezizi para trata dokumentu Billete Identidade no kartaun eleitorál. Maibé, tanba Marciana boot ona maka família labele kous nia atu ba halo dokumentu. Ikus mai husik hela de’it iha uma.
Dehan Justina, durante ne’e nu’udar inan aman nia responsabilidade maka esforsu buka osan hodi sosa aimoruk, sosa hahan no sosa hatais nian. Moris defisil liu.
Nune’e Justina perkupa ho autoridade lokál sira atu ezizi sira katak tuir loloos tenki mai identifika no foti dadus hodi fó tulun ba ema kbiit laek sira. Maibé, durante tinan 25 ona Governu seidauk iha atensaun ba ema kbiit laek hanesan Marciana ne’ebé hela area rurál.
“Nu’udar inan tenki pasiensia ho ha’u nia oan feto. Kona-ba ninia karakter ami la hare ba ida ne’e. Maibé hare de’it ba nia oras han dadeer, meudia no kalan. No moos hatais nian. Labele husik hela nia mate hamlaha. Tanba ne’e pekadu ba ita Kristaun”, katak Justina.
Justina ho ninia kaben Carlos, sira moris husi koa tua no faan nu’u maran. Hafoin tua hirak ne’e halibur hamutuk iha masa litru lima nian nakonu ona, fa’an ho folin U$20.00. Osan ne’e la sufisiente, maibé tenki aguenta moris ho zezun ba han nian no hatais.
“Ami nia moris loro-loron koa tua no fa’an nu’u maran hodi aguenta ba nesesidade. Hafoin koa tiha tua, ami halibur hamutuk to’o barak tiha maka fa’an fila fali. Kuandu ema sosa ona maka ami foin sosa hahan ba ami hodi han”, katak Carlos nu’udar aman husi Marciana Ximenes.
Nu’udar Xefi família, Carlos tenki esforsu an koa tua iha tempu bai loron. Hahú fulan Jullu to’o fulan Novembru konsege halibur de’it bidon ida. Maibé, depende mos ba esforsu para halibur tua ne’e.
Carlos hatutan, serbisu seluk hodi aguenta moris maka ku’u nu’u habai halo maran tiha hafoin faan fila Fali ba merkadu. Nuu nia folin kada kilograma U$0,25 sentavus.
Entre koa tua no ku’u nuu maran, Carlos esplika katak koa tua maka kolen liu. Tamba nia prosesu naruk demais. Hahú husi buka eskada ba hatuun tua. Hafoin halibur fali ai maran hodi tein to’o nia sai ona tua maka foin lori ba faan iha merkadu. Senti kolen. Maibé tenki esforsu hodi sustenta família nia moris.
“Hanesan Aman ha’u la bele dudu ses tiha ha’u nia oan Marciana ninia kondisaun ne’e. Ha’u tenki esforsu an serbisu hodi sustenta nia moris. Sakrifisiu ne’ebé halo hodi kalan loron fó han no hatoba nia, nu’udar prezente murak ne’ebé Maromak fó mai ha’u hodi halo karidade ba Nia Illas maka ha’u nia oan rasik, Marciana Ximenes”, Carlos hatete hodi ezizi Governu atu hadia Estrada para bele hafasil sira faan produtu lokál ba merkadu. (Asesu Youtube/Facebook https://www.facebook.com/Media1Timor Media ONE Timor)
Ita nia komentariu konaba post ne'e.