(Reportajen Jornalista Media ONE Timor-Mariquita Freitas)
Ermera (www.mediaonetimor.co) – Mudansa klimatika halo Timor-Leste (TL) hasoru bain loron naruk. Maibé komunidade área rurál, iha Aldeia Leubasa, Suku Lauana, Postu Administrativu Letefoho, Munsipiu Ermera, la defisil ba bee, hafoin Organizasaun Não Govermentais (ONG), Tilofe realiza programa konservasaun bee.
Haktuir Xefi Aldeia Leubasa, Alfredo Maia Pires, reprezentante komunidade, Ana Rosa Maria Pereira, no reprezentante Juventude Tilofe, Abrão Maia ba Jornalista hirak ne’ebé hala’o hela Media Tour, ne’ebé organiza hosi Asosiasaun Jornalista Timor Lorosa’e (AJTL) no hetan apoiu hosi Oxfam Timor-Leste (TL), ne’ebé hala’o hosi loron 21 to’o 22 Novembru 2024 katak, agradese tebes ba Tilofe nia programa konservasaun bee.
Xefi Aldeia Leubasa, Alfredo Pires Maia esplika, iha tempu bailoron naruk komunidade sira sempre defisil atu asesu bee hodi uza ba nesesidade loron-loron nian. Sira sempre halerik bee. Senti defisil atu nafatin hetan bee moos.
“Antes ne’e komunidade sempre susar los atu asesu bee moos. Sira tenke kuru bee ho distansia ne’ebé dook para uza ba nesesidade loron-loron nian. Maibé, agora kontenti ona tanba bee la maran ona, maske bain loron naruk,” Alfredo dehan.
Katak Alfredo, tinan-tinan tama ona fulan Agostu to’o Setembru sempre akontese bee maran iha fatin-fatin. Maibé iha tinan 2024 ne’e, to’o besik ona tama ba fulan Dezembru udan seidauk tun rai mos bee la-maran.
Tanba hatutan Alfredo, ONG Tilofe realiza ona programa halo konservasaun hodi halibur udan been iha debu laran. Hafoin bee hirak ne’e inflitra ba rai laran, sei fó susu hodi fó moris fali bee matan sira seluk. Bee matan hirak ne’e maka sustenta komunidade iha aldeia haat nia moris iha Suku Lauana.
“Programa konservasaun bee ka kuda bee ne’ebé iha ona halo komunidade sira kontente tebes. Bee debu ne’ebé halo ona ho ense bee udan ne’e, bele ajuda komunidade to’o besik tama ona ba Fulan Dezembru, maibé bee matan sira la maran. Obrigada Tilofe”, Alfredo tenik.
Iha parte seluk Xefe juventude movimentu konservasaun bee iha Suku Lauana, Abrão Maia hatete, programa konservasaun bee ne’e hetan formasaun hosi ONG Permatil servisu hamutuk hoTilofe. Nune’e iha 2021, inisia atividade konservasaun bee ne’e.
“Objetivu husi konservasaun bee ne’e, atu halo prevensaun husi risku degradasaun erosaun. Inklui inundasaun sira. Vantajen seluk maka hodi hamoris fali bee matan sira seluk. Nune’e komunidade sira bele uza be’e to’o tempu bailoron naruk”, Abrão dehan.
Katak Abrão, juventude movimentu konservasaun bee kompostu husi ema na’in 17. Ema hirak ne’e mak konserva ka kolleita udan been. Iha baze hidrolojika maka; debu natural, tasi no atmosfera.
Abrão esplika, kona-ba debu natural nian prosesu maka kapta udan been hosi foho lolon, halo konserva ka koilleta udan been. Udan been foho lolon hafoin sei infiltra tama ba debu laran hodi bele fó moris fali ba bee matan sira iha okos ka iha rai laran.
Hamutuk ho Tilofe hatete Abrão iha Suku Lauana konserva ona debu natural hamutuk sia, kria debu foun arte visiál nian hamutuk 74 total no debu hamutuk 88. Aliende ne’e, hala’o mós programa kuda aikakeu, no kuda ai hali.
Abrão dehan, iha sira nia mandatu konsege konserva ona bee matan sia mak hanesan bee matan Saren, Aipun, Tuhuguan, Kolimauhahi, Biguru Haehbehan, no Rehein Mapnian bee matan hirak ne’e fó moris husi bee matan Alosai.
Entretanto Komunidade husi Suku Lauana Aldeia Leu-Bassa, Postu Administrativo Letefoho Munisipiu Ermera, kompostu husi Uma-Kain hamutuk 116, habitantes 468, kompostu husi mane 250 no feto 218.
Tanba ne’e, AJTL servisu hamutuk ho Oxfam Timor Leste no hetan apoiu orsamentu husi Oxfam Hong Kong liuhusi atividade Media Tour iha Municupio Ermera Postu-Administrativu Letefoho Suku Leubasa. AJTL Parseiria Servisu ho OXFAM kontinua halo Media Tour Hodi Luta ba Justisa Klimátika.(Asesu Youtube/Facebook https://www.facebook.com/Media1Timor Media ONE Timor)
Ita nia komentariu konaba post ne'e.