MEDIAONETIMOR-Maske lakohi komenta maibé Prezidente Parlamentu Nasional (PN), Aniceto Longuinhos Guterres Lopes argumenta, iha rai demokratiku hotu-hotu iha direitu atu hasai opiniaun ka kritika lider politiku sira.
“Hau lakohi komenta ida ne’e. Maibe iha rai demokratiku hotu-hotu iha direitu atu hasai opiniaun ka kritika lider politiku sira,” hatan Prezidente PN, Aniceto ba jornalista hafoin remata enkontru ho Prezidente Repúblika (PR), Francisco Guterres Lú Olo iha Palasiu Presidensial, Kuarta, (20/09/2017).
Hanesan públika tiha ona iha Diariu Timor Post edisaun Kuarta, (20/09/2017) katak, nota PR, Francisco Guterres Lú Olo nia desizaun falun ho partidarizmu, Prezidente PN, Aniceto hatutan, konstituisaun RDTL fo dalan ba ema ida-idak atu rekere desizaun PR Lú Olo nian ne’e, konstitusional ka inkonstitusional.
Hatutan Prezidente PN, Aniceto, se-inkonstitusional bele halo rekere ba tribunal. Konaba komentarius iha mídia sosial (Medsos) ne’e ida-idak hasai nia interpretasaun. Maibé interpretasaun ikus iha tribunal maka sei desidi.
Aniceto hateten, iha PN konstituisaun fo dalan Um/Quinto deputadu bele halo petisaun rekere deklarasaun inkonstitusionalidade ba kualker aktu Lei Governu no Prezidente Repúblika.
Jurista TL preokupa katak PR Lú Olo kontra kompetensia Artigu 106, husu jornalista. “Ne’e mak hau dehan atu preokupa ka hato’o idea ne’e livre. Maibe laos jurista maka deside. No laos jurista maka hateten dehan ne’e inkonstitusional. Hau dehan tribunal maka tenki hateten. Tribunal maka tenki pronunsia,” Aniceto hateten ho intonasaun siak.
Katak Aniceto, kuandu iha pedidu ruma hosi parte ne’ebé iha kompetensia para atu rekere mos ba tribunal. Laos kualker ema ida bele ba halo prosesu tribunal. Sa tan atu hateten dehan ne’e inkonstitusional.
“Prontu ne’e komentarios, ideas no hanoin sira ne’e bele deit iha rai demokrasia. Hotu-hotu bele fo kritika,” tenik Aniceto.
Antis ne’e Prezidente PN Aniceto esplika konaba enkontru ho PR Lú Olo. Aniceto hateten, tanba estrutura meja Parlamentu Nasional (PN) ne’ebé maka atu halo Parlamentu funsiona ho organizasaun sira seluk kompleta ona maka lalaok funsionamentu uma fukun to’o agora lao ho diak.
“Tanba estrutura orgaun hanesan; meja parlamentu kompletu ona, komisõens espesializada idak-idak estabelese ona sira nia meja komisõens. Grupu nasionais, Uniaun Inter-Parlamentar no CPLP estabelese hotu ona maka parlamentu komesa funsiona ho diak,” dehan Aniceto.
Esplika Aniceto, tuir Konstituisaun PR iha kompetensia atu garante funsionamentu normal instituisõens demokratiku. Nune’e maka mai aprezenta lalaok funsionamentu PN ninian desde hahu iha loron 5 Setembru 2017 to’o agora.(Reportájem Deonisio da Cruz)
Ita nia komentariu konaba post ne'e.