(Reportajen Asistente Editor Marcelino Tomae/Editora Suzana Cardoso)
DILI (Media ONE Timor) – Joventude tenke kria Unidade no amizade iha estranjeiru. Labele implementa fanatizmu ba idiealogia arte mersiais nian iha nasaun estranjeiru.
“Ha’u nia alin sira kuandu sai husi ita nia rai, ba Inglatera ka Europeia atu servisu. Tuir loloos sira tenke kria amizade. Labele lori fali arte mersiais para implementa iha ema nia rai.”
Kestaun ne’e hato’o husi Vise Prezidente Parlamentu Nasionál Luis Robertu ba Jornalista iha uma fukun Parlamentu Nasionál, Tersa, (26/07/2022) hodi hatutan, tenke hatudu lisan domin nain nu’udar sidadaun Timoroan, hodi ba buka moris hadia família no Nasaun Timor-Leste (TL).
Hanesan viral iha media sosiais iha loron Tersa, (26/07/2022) hateten, groupu arte marsiais sira baku no oho malu iha Inglatera tanba de’it uma Timoroan nian balun hetan tuda hosi Timoroan seluk hodi provoka ataka malu hodi balun hetan kanek.
Deputadu Luis Robertu hatete, Konstitusaun Repúblika Demokrátika Timor-Leste (KRDTL) fó liberdade ba ema hothotu. Sidadaun sé de’it atu buka servisu iha rai li’ur. Maibé importante mak tenke unidade no amizade nu’udar Timoroan iha ema nia rain.
Vise Prezidente ne’e haktuir, iha Europeia lahatene arte mersiais.Lahatene groupu A ka grupu B. Iha ne’ebá ema hothotu preokupa ho sira nia servisu hodi dezenvolve moris. Maibé Timoroan lori sira nia atetude fanatizmu idieloji arte marsiais tama to’o iha ne’ebá.
Katak Deputadu Luis, joven sira inklina aan iha arte marsiais oioin. Mak hanesan IKS, PSHT, 77, Korka no seluktan. Sira ba ema nia rai, tenki foti malu no tane malu nu’udar Timoroan. La’ós ba iha ne’ebá atu sona malu, oho malu to’o ran nakfakar.
Nu’udar reprezentante povu, Deputadu Luis husu ba joventude sira ne’ebé ba servisu iha rai li’ur tenke hadomi malu nu’udar maun alin. Nu’udar Timoroan. Labele lori fali lisan aat arte mersiais nian ba implementa hodi hala’o atividade krimi iha ema nia rai.
“Timor-Leste adapta lisan úniku, mak hadomi malu hanesan maun alin.
Labele lori fali diferensia arte mersiais hanesan KORKA, PHST, IKS, 77 no seluk-seluk tan hodi hatudu jagoan ba malu” Deputadu Luis hateten. (Asesu Youtube/Facebook https://www.facebook.com/Media1Timor Media ONE Timor)
https://www.youtube.com/channel/UCAD1AWdt3pCyd0vmPQN1RyQ
Ita nia komentariu konaba post ne'e.