(Reportajen Jornalista Baukau Tomas Reis/Asistente Editor Jacinto Caet)
BAUKAU (Média ONE Timor) – Públikasaun notísia hosi munisipiu importante ba progresu dezemvolvimentu, nune’e atribuisaun rai no uma ba edifisiu Tatoli, IP ne’ebé harii iha Munisipiu Baukau importante ba Jornalista destakadu sira atu utiliza hodi halo reportajén ne’ebé hanesan to’o área rural.
Esperansa ne’e hato’o hosi Ministru Asuntu Parlamentares no Komunikasaun Sosiál (MAPKOMS) Fransisco Martins da Costa Pereira Jerónimo, Prezidente Autoridade Munisípiu (PAM) Baukau Olivio Freitas no Prezidente Konsellu Diretivu Ajénsia Notísia Tatoli.IP, Manuel Pinto iha serimonia ofisiálmente loke plaka futuru edifisiu Ajénsia Noticiosa de Timor-Leste Instituisaun Públiku (Tatoli.Ip) iha Uatulete, Baukau, Kinta, (07/07/2022).
“Fatin ida ne’e ba futuru Tatoli para bele hala’o sira nia kna’ar iha Baukau ho kondisaun ne’ebé di’ak liutan. Liu-liu produsaun notísia sira ne’ebé relasiona ho dezenvolvimentu iha Baukau”, MAPKOMS Fransisco iha nia deskursu.
Uma no rai estadu ne’ebé atribui hosi MAPKOMS hamutuk ho PAM Baukau ba Tatoli,IP ne’e katak MAPKOMS Fransisco la’os de’it ba Jornalista Tatoli maibé Jornalista destakadu hosi Radio Televizaun Timor-Leste (RTTL),EP moos bele utiliza.
“Edifisiu ne’e la’os Jornalista hosi Tatoli.IP de’it maka utiliza. Maibé Jornalista destakadu hosi Rádio Televizaun Timor-Leste mós bele utiliza. Tanba orsamentu ba harii edifisiu Tatoli.IP nian mai hosi Orsamentu Jerál do Estadu 2022 nian”, katak MAPKOMS Fransisco.
Iha fatin hanesan PAM Baukau, Olivio Freitas hatutan mós husu ba média nasionál ne’ebé destaka ona nia Jornalista iha Munisípiu Baukau importante tebes hodi akompañia dezenvolvimentu nível munisípal.
“Tanba iha tempu badak Governu sei implementa lei poder lokál iha Munisípiu Baukau. Nune’e média importante tebes. Liliu kuandu poder lokál entrega ona, prezisa média iha dezenvolvimentu,” PAM Baukau Olivi hateten.
Lia fuan hanesan hato’o hosi Prezidente Konsellu Diretivu Ajénsia Notísia Tatoli.IP, Manuel Pinto hodi hato’o agradase ba POM Baukau no Diretór Servisu Diresaun Teras Propriedade Baukau tanba bele atribui ona fatin ba média Tatoli atu harii nia edifisiu iha Munisípiu Baukau.
Prezidente Tatoli,I.P ne’e nia esperansa atu ho prezensa jornalista barak liutan iha Munisipiu Baukau bele kontinua hatutan no habelar nafatin polítika Governu ba planu dezentralizasaun hodi hadia Timoroan nia moris.
“Ami orgullu ba ida ne’e, atu bele fó espasu ne’ebé natoon hodi ami nia funsionáriu servisu ho di’ak atu fasilita informasaun ba públiku, hosi área rurál ba nasionál no hosi nasionál tatoli mai iha área rurál,” akresenta Manuel.
Antes ne’e atribuisaun rai no uma ba Tatoli.IP halo ona iha Munisipiu; Vikeke, Kovalima, Oe-cusse no Bobonaro, atu nia Jornalista sira bele hala’o servisu di’ak liután hodi kobre informasaun iha baze.(Asesu Youtube/Facebook https://www.facebook.com/Media1Timor Media ONE Timor)
Ita nia komentariu konaba post ne'e.