MEDIAONETIMOR-Hafoin durante loron ha’at halo dialogu negosiasaun forma VII Governu Konstituisional hó Partidu CNRT, PLP, PD no Khunto, Sekretario Jeral Partidu Fretilin, Marí Bin Amude Alkatiri relata rezultadu ba Prezidente Repúblika (PR), Francisco Guteres Lú Olo.
“Relatoriu dialogu negosiasaun ne’e seidauk final. No PR Lú Olo husu atu kontinua halo dialogu to’o hetan rezultadu final,” haktuir Marí ba jornalista sira hafoin remata enkontru hó PR, Lú Olo iha Palasiu Presidensial, Segunda, (14/08/2017).
Marí esplika liutan, husi relatoriu ne’ebé relata ba PR Lú Olo apresia hó prosesu negosiasaun hosi Partidu vensedor Fretilin ba partidu liu bareira 4% sira seluk. No husu kontinua to’o hetan rezultadu final ba formasaun VII governu konstituisional.
Nomeia Primeiru Ministru
Aliende aprezenta relatoriu Negosiasaun forma VII governu, Marí mós hato’o ba PR Lú Olo ne’ebé nu’udar Prezidente Partidu Fretilin nian ne’e para bele hahu nomeia Primeiru Ministru depois Primeiru Ministru forma governu.
“Hato’o ba Presidente Repúblika (PR) Lú Olo bele hahu nomeia Primeiru Ministru. No depois Primeiru Ministru forma governu,” katak Sekjen Fretilin ne’e hodi lakohi temi sai naran semaka atu sai Primeiru Ministru.
Maibé tenik Marí, Primeiru Ministru tenki mai hosi partidu mais votadu hosi rezultadu eleisaun parlamentar tinan 2017 ne’e nian. “Kargu Primeiru Ministru, partidu vensedor mak sei hatudu Primeiru Ministru,” katak Marí.
Hatan konaba Fretilin sei hatudu kadeira Primeiru Ministru ba Prezidente PLP, Taur Matan Ruak maka sei tu’ur, Marí hatan hodi dehan, “Tanba ne’e kadeira laos para atu fahe. Maibé kadeira para ita atu halo servisu ba povu. Se balu politika hanoin fahe kadeira, entaun diak liu ba sosa kadeira sira iha Loja Audian.”
Konaba Fretilin sei hamutuk hó PLP no Khunto halo koaligasaun, Marí deklara, Partidu PLP hó Khunto iha vontade atu ko’opera ho partidu mais votadu.
Maibe esplika Marí, ko’operasaun PLP hó Khunto hó sistema insidensial parlamentar ka koligasaun ne’e se iha segundu dialogu para hodi halo konjuga buat rua ne’e. Ida koligasaun inklusaun no rua insidensia parlamentar.
“Ne’ebé konversasaun hó partidus politikus sira seidauk hotu. Sei kontinua halo konversasaun. Hau hakarak halo hotu to’o fim de semana ida ne’e bele apresenta relatoriu final. Ohin hau sei propoin karta ba segundu dialogu iha Kuarta Feira, (iha dia, 16 Agostu 2017),” dehan Marí.
Antes ne’e website Media One Timor fó sai ona katak, bazeia ba konfirmasaun jornalista iha sede PLP Metiaut, Sabadu, (12/08/2017), Prezidente PLP, Taur Matan Ruak hateten, prontu atu koalia hó Fretilin maske seidauk simu karta ofisial para atu konvida PLP ba servisu hamutuk forma VII Governu Konstituisional.
“Se deklarasaun ne’e tebes, hau agradese hanesan partidu ida foin mak mosu bele hetan ona konfiansa hosi partidu mais votadu para koalia hó ami. Ami disponivel.Tanba mensajen povu nian liu hosi fahe votus ba partidu hotu-hotu. Ida mesak labele, tenki buka malu. Entaun partidu mais votadu fiar ami hakarak koalia ho ami, disponibel ba koalia reprezenta ami nia eleitoradu ne’ebe fo votus ba Partidu PLP. Ami prontu,” katak Taur.
KHUNTO Prontu Ko’opera
Husi parté Khunto hafoin remata dialogu iha loron ikus nian hó Partidu Vensedor Fretilin, Konselheiru Superior Partidu KHUNTO, José dos Santos Naimori ba jornalista hateten, Partidu KHUNTO prontu atu ko’opera ho partidu se’e deit.
Tanba katak Naimori, hotu-hotu iha interese unidade nasional. Ne’eduni nu’udar lideransa, hotu-hotu tenki ko’pera malu. Signifika, povu presija lideransa sira tenki hamutuk. “Partidu Fretilin mak sei hola desijaun konaba atu forma VII Governu Konstitusional ida ne’ebé diak. Nune’e, Khunto prontu atu servi hó se’e deit. Khunto hakarak kria estabilidade ba nasaun. No tau interese liu ba povu nia moris diak,” deklara Naimori.(Reportájem Deonisio da Cruz)
Ita nia komentariu konaba post ne'e.