(Reportajen Media ONE Timor-Dilvia Moniz)
Dili (www.mediaonetimor.co) – Membru Polisia Nasionál Timor-Leste (PNTL) na’in ida hetan kanek grave, hafoin konfrontu entre Groupu Arte Marsiais (GAM), Ikatan Kera Sakti (IKS) ho Persaudaraan Setia Hati Terate (PSHT) ne’ebé akontese iha Beto tasi, Marinir, Suku Malinamuk, Dom Aleixo, Sabadu kalan, (23/03/2024).
“Motivasaun husi kazu ne’e mak, hahú husi joven sira mai husi bairu seluk iha Dili laran. Laos Komoro de’it. Hotu-hotu konsentra hotu iha membru IKS ne’ebé mate tanba moras ne’e nia uma. Remata tiha hakoi mate isin ne’e, Polisia rona is katak iha intensaun la di’ak tanba rona ona dehan sira atu ataka malu.”
Esplikasaun ne’e esplika husi Komandante Eskuadra Dom Aleixo, Inspektur Alexandre da Costa alias Alex Samurai ba Jornalista
liu husi konferensia imprensa ne’ebé hala’o iha Eskuadra Dom Aleixo, Dili, Segunda, (25/03/2024). Nia hatete, husi informasaun ne’ebé PNTL halibur ne’e nota ona iha remata hakoi mate isin sira kumesa provoka malu.
Katak Alex Samurai, husi provoka malu ne’e maka hamosu konfrontu entre IKS no PSHT. Sira halo asaun hodi tuda malu. Halo mós asaun hodi tuda komunidade sira nia uma ne’ebe mak hela besik dalan. Asaun brutalizmu ne’e, rejulta uma ida hetan tuda to’o rahun total. No akontese mós ofensas integridade fizika agravadu ba komunidade balun.
Aliende ne’e katak Alex Samurai, membru ajenti siguransa estadu, membru PNTL na’in ida kona tuda husi konfrontu entre groupu rua ne’e, hodi rezulta kanek grave. Membru GAM hirak ne’e mos uza armas branka. Hanesan rama ambon ne’ebé mak belit mós iha vitima na’in ida nia ulun.
“Aliende vitima mai halo ona keixa no Polisia nia akompaña iha terenu maka husi akontesementu ne’e Polisia konsege kaptura direita iha lokal krime sira na’in ualu. Sira na’in ualu ne’e haloona prosesu investigasaun iha eskuadra Polisia Dom Aleixo, Dili no entrega ona ba sela detensaun munisipiu Dili nian hodi kompleta horas 72, antes aprezenta ba iha tribunal”, Alex Samurai dehan.
Husi kazu ne’e maka katak Alex Samurai, nu’udar seguransa estadu nian nafatin apela ba komunidade sira katak kuandu mate isin sira ne’ebé involve Arte Marsiais, favor tenki iha liña kordenasaun ho autoridade lokál no mós ba iha autoridade seguransa hodi bele iha liña koordenasaun hodi tau matan ba seguransa ba mate isin refere.
“Kazu hirak hanesan ne’e, la’os deit siguransa sira nia responsabilidade. Maibé presija mos povu hotu nia responsabilidade. Tanba seguransa ne’e loloos husi ita nia an rasik. Sai husi familia uma laran ida atu sai ba liur oinsa atu asigura ita nia an. La presija husu ba estadu atu ba estadu hodi akompañia nafatin”, Alex Samurai hatete. (Asesu Youtube/Facebook https://www.facebook.com/Media1Timor Media ONE Timor)
Ita nia komentariu konaba post ne'e.