MJDAK Sei Aloka U$200,022.55 ba Transmisaun Jogu CPLP

(Reportajen Jornalista Estajiada  Melania Soares/Francisca Ximenes)

Dili (www.mediaonetimor.co) – Apoia transmisaun direta, deziminasaun informasaun no promosaun kona-ba jogu CPLP (Comunidade Países da Língua Portuguesa) ba dala-12 ne’ebé sei hala’o iha Timor-Leste (TL), Governu preve orsamentu hamutuk  U$200,022.55 sentavus ba média nasionál sira.

Orsamentu U$200,022.55 sentavus ne’e Governu preve ona iha tabela gastus ba jogu CPLP, ne’ebé aprezenta iha reuniaun interministeriál ba preparasaun jogu CPLP nian iha semana daruak fulan Marsu tinan 2025, iha salaun Sentru Konvensoens Dili (CCD-Sigla Portugues).

Haktuir Koordenador Jerál Jogu CPLP, atuál Sekretariu Estadu Arte no Kultura (SEAK), Jorge Soares Cristavão bainhira remata hala’o reniaun ho Prezidente Rádio Televizaun Timor-Leste, Empreza Públiku (RTTL,E.P), Elizeu Isaac Fernandes no ekipa tékniku Sekretáriu Estadu Komunikasaun Sosiál (Secoms-Sigla Portugues) nian katak, orsamentu ne’e sei aloka ba komunikasaun no publikasaun eventu CPLP nian.

“Reniaun ida ne’e atu ko’alia kona-ba preparasaun ba jogu CPLP. Liu-liu ba parte média nian atu oinsa halo broadcasting ka transmisaun hodi dezmina informasaun ba teritoriu laran no nasaun viziñu sira iha ASEAN. No moos nasaun CPLP nian”, SEAK Jorge dehan.

Katak SEAK Jorge, média estatál RTTL,E.P maka sei halo broadcasting, hafoin fahe ba média nasionál hodi bele hetan ninia konteúdu no output. Katak, hosi autput no  konteúdu ne’e maka média privadu sira sei utiliza ba idak-idak ninia plataforma hodi produs notísia.

SEAK Jorge esplika liutan, orsamentu U$200,022.55 sentavus ne’e Governu liu husi MJDAK  aloka ba komisaun organizadora jogu CPLP nian, hafoin intrega ba Secoms hodi jere ba média hirak ne’ebé sei halo kobertura durante jogu CPLP ba dala-12 nian iha Kapitál Dili.

Aliende ne’e hatutan SEAK Jorge, orsamentu hirak ne’ebé aloka ona ne’e bele uza  hodi fasilita tantu média konvensionál no media ho Plataforma dijitál no moos online sira hodi utiliza ba transmisaun durante eventu CPLP nian ho efektivu liutan.

“Maibé ba RTTL,E.P, Governu sei apoiu orsamentu ho montante U$50,000.00 ba broadcasting ka transmisaun nian. Nu’udar média estatál, RTTL,E.P iha responsabilidade tomak ba transmisaun, hahú husi jogus abertura to’o jogus nia finalidade no moos jogu paralympiku nian”, esplika SEAK Jorge hodi hatutan.

Jogu CPLP ba dala-12 ne’ebé TL sai uma na’in ne’e sei realiza hahú husi loron 17 to’o loron 27 fulan Jullu tinan 2025. Eventu ne’e sei partisipa husi atleta 706 ne’ebé sei kompete iha modalidade ualu maka hanesan; futebol, atletismo, xadrez, voleibol de praia, ténis, karaté, basquetebol no taekwondo.

Iha parte seluk Prezidente RTTL,E.P, Elizeu Isaac Fernandes hatete, atu fasilita transmisaun ho di’ak liutan iha jogus CPLP ne’e, RTTL,E.P sei halo kooperasaun ho nasaun sira seluk mak hanesan; Indonezia,  Singapura no moos Nasaun Japaun.

“Hamutuk ho nasaun tolu ne’e, ami sei halo akordu atu bele servisu hamutuk. Tamba ida ne’e maka presiza diskute ho komisaun organizadora jogus CPLP nian. No iha tempu besik,  sei iha karta pedidu hodi delega ba RTTL,E.P sai hanesan broadcasting, inklui servisu hamutuk ho média nasionál iha Timor-Leste ba kanalizasaun informasaun nian”, katak Elizeu.

Nasaun hirak ne’ebé sei partisipa iha jogus CPLP ne’e maka hanesan; Timor-Leste, Portugal, Brasil, Guiné-Bissau, Moçambique, Angola, Cabo Verde , Guiné Equatorial no São Tomé e Príncipe ne’ebé hamahon an iha CPLP. (Asesu Youtube–https://www.youtube.com/@Media1Timor/Facebook- https://www.facebook.com/Media1Timor/Iha moos Kursu Jornalizmu no Lian Inglesh)