“Obrigadu Maun Boot Xanana”, Mensajen Ikus Hosi Amu Maubere

(Reportajen Kontributor Media ONE Timor-Agostu Sarmentu)  

Dili (www.mediaonetimor.co) – Saudozu Padre Domingos da Silva Soares ne’ebé koñesidu ho naran bolu Amu Maubere ka Amu Du, antes termina ninia jornada moris iha mundu konsege husik hela lia menon ba  eis Komandante Falintil atuál Primieru Ministru  (PM) Kay Rala Xanana Gusmão.

“Ba fó hela ha’u-nia obrigadu ba Maun Boot Xanana,” sita Agostinho Letêncio de Deus iha diskursu hodi reprezenta família ninian iha ámbitu misa ba maktoban Saudozu Amu Maubere iha Catedral da Imaculada Conceição Dili, Segunda, (19/05/2025).

Lee Notísia Relevante: Veteranu Dudu Fila Hikas Ba Aman Maromak

Misa ba maktoban Suadozu Amu Maubere ne’e preside husi Arsebispu Arquidiocese Metropolitana Dili, Dom Virgílio Cardeal do Carmo da Silva, antes ba halo’ot iha simeteriu padre sira nian iha Maloa, Dili. Nu’udar concelebrante ba Missa ne’e, Bispo da Diocese de Maliana, Dom Norberto do Amaral, Bispo da Diocese de Baucau, Dom Leandro Maria Alves no Padre sira. Participa iha Missa refere, Presidente Repúblika, José Ramos Horta, Veteranus, Eis titulares, autoridade civil no militar, Ministru IX governu nian, Diácono, madre, frater no sarani atus ba atus.

Letêncio haktuir, liafuan “obrigadu” hanesan Amu Du ninia instrusaun no mensajen ikus nian ba Timor ne’e iha loron 07 Maiu, bainhira sei iha hela Malázia. Iha momentu-momentu ikus nian, Amu Du fó obrigadu no husu deskulpa ba familiares sira hotu no hameno hela atu hato’o ninia mensajen ikus ba Maun Boot Xanana.

Nia hatete liutan, Amu Du sempre kuda buat rua iha família. Maka hanesan, tenke hatene fó obrigadu no hatene husu deskulpa hodi rekoñese sala sira.

Parte família rekoñese sá maka Maun Boot Xanana halo ba Amu Du, parte família sente katak sura labele, no labele selu tan. Parte família rekoñese Papel Maun Boot Xanana nian hodi hodi delega Padre Domingos Maubere nu’udar enviadu espesiál hodi lidera enkontru sira timoroan nian iha diáspora.

Liga ho kondisaun ikus Amu Du nian, Prezidente Repúblika Jose Ramos Horta deside la partisipa serimónia inaugurasaun Papa Leão XIV iha Vatikanu-Roma. “Ha’u hakarak iha ne’e.  Ita hotu hamutuk fó omenajen, Boa viajen ida laiha regresu, viajen ida la fila ba Amu Domingos Maubere” afirma PR Horta.

PR Horta rasik koñese besik bainhira Amu Du ba iha Portugal hamutuk ho lider rezisténsia Timoroan sira halo konvensaun Peniche.

PR Horta Haktuir , “bainhira nia moras iha Malazia, haruka whatsap (mensajen) ba ha’u dala barak, la ko’alia kona-ba nia moras. Nia ko’alia ninia preokupasaun, ninia laran susar, kona ba edukasaun, saúde, povu nia moris no kiak sira nia moris”.

Nia hakat ona ba mundu seluk, husik ezemplu korajen, domin no integridade, la ta’uk podér, maibé ta’uk de’it maka podér espirituál. Amo Domingos Maubere ninia sakrifísiu ninia hanoin ninia lisaun sei hamutuk ho ita nafatin.

Estadu Kondekora Pe. Domingos da Silva Soares “Maubere” ho grau órden Nicolao Lobato ho títulu Postumu, durante selebrasaun misa fúnebre. Saudozu Padre Domingos da Silva Soares “Maubere” haloot iha fatin ikus lokaliza iha Semitériu ba Nai Lulik sira iha Ailok-Laran, Maloa.

Iha misa funebre, Kardeal Dom Virgílio do Carmo da Silva hateten Padre Domingos da Silva Soares hanesan padre ne’ebé domin na’in no hatudu dedikasaun estraordináriu iha vokasaun tomak durante sei moris.

Amu Du nia dedikasaun ne’e estraordináriu. Nia oferese ba igreja madre, padre no leigu lubuk ida, amu Du kari ona fini vokasaun nian iha ita-nia rain, nia sei tau matan nafatin ba ita iha lalehan.

“Obrigadu Amu Du, tan sai ona amu lulik vokasaun nian iha Timor, ita prepara foin-sa’e sira ba igreja no nasaun. Nia domin ba rai ne’e sasukat -laek, nia fo an tomak ba rai ida ne’e, nia kontribui maka’as ba luta auto determinasaun Timor-Leste nian” espresa Kardeal do Carmo.

Saudozu Amu Maubere termina nia jornada moris  hodi husik iis ba dala ikus iha oras tuku 07:10 dadeer iha loron 16 Maiu 2025 iha ICU-Hospitál Nasionál Guidu Valadares (HNGV). (Asesu Youtube-https://www.youtube.com/@Media1Timor/Facebook- https://www.facebook.com/Media1Timor/Iha moos Kursu Jornalizmu no Lian Inglesh)