Oekuse (www.mediaonetimor.co) – Lamentasaun agrikultur sira iha Aldeia Sakato, Suku Nipane, Sub Rejiaun Pante Makasar, RAEOA (Rejiaun Administrativa Espesiál Oekuse Ambenu) ne’ebé la simu aimoruk rega pesti han estraga plantasaun, SRAPPF (Sekretária Rejionál Agrikultura Pekuária Peskas no Floresta) RAEOA (Rejiuan Administrativa Espesiál Oe-cusse Ambenu), Filomena Sila, la simu pedidu eskrita to’o ohin loron.
“Kona-ba agrikultur sira iha Aldeia Sakato, Suku Nipane ne’ebé hatete sira presiza aimoruk rega pesti han estraga batar, to’o agora ami seidauk hetan pedidu eskrita husi sira”, Sekretaria SRAPPF RAEOA, Filomena Sila esplika kestaun ne’e ba Jornalista sira ne’ebé hala’o media tour durante loron tolu ba Oe-cusse hafoin organiza husi Asosiasaun Jornalista Timor-Lorosa’e, iha ninia knar fatin, Sesta, (24/01/2024).
Hatan pergunta Media ONE Timor kona-ba lamentasaun Xefi Suku Nipane, Pedro Eco la hetan resposta kona-ba aimoruk hodi rega mate pesti ne’ebé han estraga sira nia batar, Sekretaria Filomena esplika, Governu prontu atu ajuda bazeia ba pedidu ne’ebé hatama ba SRAPPF.
Katak Sekretária Filomena, durante ne’e SRAPPF sempre simu no atende kedas difikuldade ne’ebé komunidade sira hato’o liu hosi karta pedidu mai gabinete. Difikuldade tenki submeter ho eskrita. Inklui, difikuldade kona-ba pesti ne’ebé estraga komunidade nia plantasaun haree, batar no plantasaun sira seluk.
“Karta ne’ebé komunidade sira hakerek tenki mensiona hanesan, ezemplu; Ami komunidade ne’ebé hela iha bairu, aldeia no suku saida, tenki temi klaru. No karta pedidu ne’e tenki fó esplikasaun katak, ami (komunididade-red) presiza aimoruk rega mate pesti ne’ebé han estraga batar ka seluk tan”, hasara Sekretária Filomena hodi dehan, ida ne’e maka kontiudu husi karta pedidu ne’ebé tuir loloos hakerek husi komunidade hirak ne’ebé infrenta hela problema, hodi hato’o ba SRAPPF.
Sekretária Filomena esplika prosedur administrasaun nian katak, hafoin karta pedidu nian hetan rejistrasaun iha parte Gabinete SRAPPF, kontinua kedas ba Diretur Jerál SRAPPF maka sei hatutan ba Sekretária Filomena hodi hatun despaisu. Nune’e, pedidu kona-ba problema ne’ebé komunidade sira infrenta, kleur ka tarde SRAPPF sempre responde ba perkupasaun hirak ne’e.
Maibé, kona-ba pedidu husi Aldeia Sakato, Suku Nipane ne’ebé husu atu fornese aimoruk rega mate pesti estraga batar Sekretária Filomena dehan, Gabinete SRAPPF to’o agora la simu. Signifika, durante ne’e entre komunidade ho autoridade lokál laduun iha liña koordenasaun kona-ba servisu hamutuk ho Extensionista sira ne’ebé koloka ona iha Suku Nipane.
Tanba hatutan Sekretária Filomena, iha tiha ona esplikasaun ba autoridade lokál ho ninia komunidade sira atu hato’o problema hirak ne’ebé sira infrenta iha idak-idak nia hela fatin tenki ho pedidu eskrita. Nune’e sai hanesan baze legál ba fornesementu sasán sira. Inklui, aimoruk pesti nian.
Sekretária Filomena dehan, forenesementu aimoruk pesti ne’ebé atu fornese ba komunidade uza hela orsamentu Estadu nian. Nune’e, gastus hotu-hotu presiza relatoriu hodi hatama fila fali ba Estadu. Ne’e parte ida husi responsabilidade ba gastus orsamentu Estadu nian. Maibé, kuandu autoridade lokál ho komunidade sira maka ko’alia verbal de’it, sei la hetan atendementu.
“Tanba, ha’u bai-bain esplika ba komunidade sira ne’ebé ke bainhira ba vizita sira, ha’u sempre hatete, bainhira Ita boot sira infrenta problema labele ko’alia verbál. Tanba ami presiza Ita boot sira nia pedidu, nu’udar baze legál ida ba ami. Tanba aimoruk ne’ebé ami atu fornese ba Ita boot sira, ne’e Ita gasta hela osan estadu nian”, Sekretária Filomena dehan.
Aproveita oportunidade intervista ne’e, Sekretária Filomena esplika kona-ba Extensionista sira nia fungsaun. Katak, Extensionista iha RAEOA hamutuk nain 20. Maibé, kolokasaun ba kada suku 18 iha RAEOA, diferente. Ba suku ne’ebé boot Extensionista nain rua. Ba suku ne’ebé ki’ik nain ida de’it. Prezensa Extensionista iha suku, atu bele servisu hamutuk ho komunidade agrikultura sira.
Sekretária Filomena dehan, problema hirak ne’ebé komunidade sira hasoru tenki ko’alia ba Extensionista sira. Tenki servisu hamutuk. Inklui, halo karta proposta ba problema hirak ne’ebé agrikultur sira infrenta iha sira nia plantasaun.
Maibé atu tulun agrikultur RAEOA sira nia plantasaun, Sekretária Filomena esplika Governu rejiaun preve ona orsamentu iha tinan 2024 atu sosa fila fali adubu organiku ida ho naran AMO. Adubu organiku ne’ebé sosa husi nasaun Filipina ne’e sei uza iha kumesa hahú plantasaun to’o kolleta.
Hatan Jornalista kona-ba, nusa maka Governu la uza adubu organiku ne’ebé produs husi foin Sa’e Timoroan sira hanesan iha organizasaun Tilofe, ho lia fuan diplomasia Sekretária Filomena dehan, adubu organiku AMO ne’e halo tiha ona peskiza no tuir duni ho iklima iha Nasaun Timor-Leste nian.
“Iha tinan 2024 mos Ita preve osan atu sosa fila fali adubu organiku ida ho naran AMO. No mos halo ona lansamentu fila rai hodi implementa adubu organiku AMO ne’e. Adubu ne’e sei uza hahú husi primeiru to’o koilleta. Orsamentu ne’ebé preve hela ne’e sei sosa 27 saset”, Sekretária Filomena deklara.
Lamentasaun Xefe Suku Nipane
Antes ne’e Xefe Suku Nipane, Pedro Eco ba Jornalista ne’ebé hala’o hela media tour iha Oe-cusse esplika difikuldade hirak ne’ebé sira hasoru mak la hetan aimoruk rega mate pesti ne’ebé han estraga sira nia plantasaun batar.
“Difikuldade diferente entre rai foho ho rai tasi. Suku Nipane ne’ebé rai tasi, asesu ba merkadu Estrada di’ak loos. So ke ita nia komunidade nia tos maka bain-bain ular oan (pesti-red) estraga hotu. No parte agrikultur rejiaun nian nunka lori aimoruk mai para rega”, Pedro Eco lamenta hodi hatutan.
Nu’udar autoridade lokál fó hatene beik-beik ona ba agrikultur rejiaun Oe-cusse nian. Maibé, tanba buat hotu-hotu dehan aimoruk laiha de’it, ita atu ba buka iha ne’ebé tan. Iha Suku Nipane mos iha Extensionista. Maibé to’o agora nunka mais atu mai ajuda.
Kona-ba buka alternativa seluk hanesan uza aimoruk tradisionál hodi hamate pesti han estraga batar, katak Pedro Eco sira seidauk iha kuñesementu kona-ba alternativa ne’e. Maibé agrikultur no autoridade lokál hamutuk ho lia nain sira, kuandu akontese pesti han estraga batar maka sira halibur malu oho animal hodi halo lulik de’it.
Xefe Suku Nipane ne’e esplika, ular oan ne’ebé estraga plantasaun batar ne’e ho han batar ninia tahan. Maka, batar tahan ne’ebé falun batar ninia ai hodi produs batar isin labele hala’o ninia funsaun. Batar ne’e isin laiha ona. Nune’e aimoruk rega ular (pesti-red) ne’e importante ba agrikultur batar sira.
Ho Maibé atu sustenta komunidade nia moris hafoin plantasaun batar kuandu hetan estraga, Xefe Suku Nipani Pedro hatete, agrikultur maka depende ona ba hakiak animál. Hanesan; hakiak manu, bibi, fahi no animál sira seluktan hodi sustenta moris loron-loron nian.
Ho la konsege koilleta tos, oinsa komunidade sustenta ekonomia familia uma laran iha Sakato? “Ami tenki hakiak animál para bele fa’an iha merkadu. Tanba, iha tempu bai loron naruk aihan kumesa menus, hodi afeita ba laiha rendementu atu sustenta família nia nesesidade. Liu-liu atu atende oan sira nia eskola mos laduun iha. Maka, alternativa seluk tenki hakiak animál”, hatan Xefe Suku Nipane, Pedro Eco.
Suku Nipane hola parte Sub Rejiaun Pante Makasar iha Kapitál RAEOA. Pante Makasar iha suku sia. Maka hanesan; Suku Bobocasse, Costa (Pante Macassar), Cunha (Pante Macassar), Lalisuc, Lifau, Naimeco, Taiboco no Suku Nipane.
Iha parte leste Oe-cusse nian, Suku Nipane, Aldeia Sakato fronteira ho Suku Wini ne’ebé nu’udar parte costa norte husi Distritu Timur Tengah Utara (TTU), Kefamananu, Provinsia Nusa Tenggara Timur (NTT), Repúblika Indonézia nian.
No Suku Nipane iha uma kain 518, ho totál populasaun husi dadus temporariu, maizu menus 2.000-resin. Suku Nipane iha aldeia sia mak hanesan; Aosnak, Bausiu, Soin, Oebone, Fatuputi, Sacato (Sakato), Fatuke, Mopo no Meobola. Ho badinas husi komunidade iha Sakato sai referensia ba aldeia seluk iha Timor laran tomak, ne’ebé balun nia uma nakonu de’it ho duut as to’o uma kakuluk.(Asesu Youtube/Facebook https://www.facebook.com/Media1Timor Media ONE Timor)
Ita nia komentariu konaba post ne'e.