PM Xanana: “Investedores Husi Korea do Súl Hakarak Mai”

(Reportajen Jornalista Mariquita Freitas)

Dili (www.mediaonetimor.co) – Investedores husi Nasaun Korea hakarak mai halo investimentu boot iha Timor-Leste (TL). Investimentu ne’e sei hala’o, kuandu hetan ona oportunidade hosi TL rasik bazeia ba survei ne’ebé sei hala’o hodi hatene tipu investementu.

“Ha’u hasoru malu ho investedores husi Korea. Sira hakarak mai halo investementu boot iha Timor-Leste. Maibé ha’u konvida sira para mai haree uluk lai ita nia rain, hodi kuñese ho di’ak liutan. Rezultadu vizita ne’e maka foin sira bele halo investementu.”

Lia hirak ne’e hato’o hosi Primeiru Ministru (PM) Kay Rala Xanana Gusmão ba Jornalista sira, Tersa, (26/09/2023) iha salaun VIP aero portu Nicolao Lobato, Comoro Dili, hafoin remata partisipa abertura jogu Asian Games iha Nasaun Xina.

PM Xanana dehan, ninia partisipasaun iha abertura Asian Games 2023 ne’e, reprezenta Timor-Leste (TL) hodi Prezidente Repúblika José Ramos Horta. Tanba, PR Horta partisipa hela enkontru importante iha Nova Yorke.

Aliende partisipa iha Asia Games 2023 nian hatutan PM Xanana, nia moos halo sorumutu kortezia ho Prezidente Repúblika Xina, Ji Jimping. Durante sorumutu ne’e ko’alia kona-ba relasoens no kooperasaun ne’ebé bele hala’o iha tinan lima mai.

“Maibe kona-ba relasoens no kooperasaun ne’e la hasai buat ida konkretu. Tanba hasoru malù kortesia ne’e laos visita offisiál ninian. Hasoru malù kortesia ne’e moos hodi fó agradese ba apoiu diplomatiku Xina nian dezde funu até agora. Nasaun Xina hanesan ita nia amigu”, PM Xanana dehan.

Aliende ne’e PM Xanana haktuir, nia moos hasoru malù ho embaxaidares balun. Ho embaxaidores, sira ko’alia kona-ba oinsa atu halo investimentu iha TL. No husu TL atu loke odamatan ba investidores sira mai husi rai liur. Tanba sira mai atu husu dezenvolvementu no moos atu kria empregu.

Iha parte seluk PM Xanana moos hasoru malu ho Primeiru Ministru (PM) Koreia do Súl, Han Duck-Soo. Sorumutu ne’ebé realiza tanba husu husi PM Han Duck-Soo ba Embaxador TL iha Xina ne’e, hodi hametin kooperasaun bilaterál entre rai rua ne’e nian.

PM TL Kayrala Xanana Gusmão hasoru malu ho PM Korea do Súl hodi ko’alia kona-ba relasaun bilateral entre rai rua ne’e.

“Ha’u moos agradese teb-tebes ba nasaun Korea do Súl ba sira nia apoiou mai Timor-Leste. Sira halo ona buat barak. Ha’u mos agradese ba Korea do Súl bele lori ita nia joven sira barak teb-tebes ba iha ne’ebá hodi serbisu”, PM Xanana hatete.

Iha oportunidade hanesan katak PM Xanana, hasoru malù moos ho investedores husi Korea do Súl ne’ebé hakarak mai Timor-Leste. Maibé, husu ba investedores hirak ne’e atu mai hare ita nia rai lai.

PM Xanana halo esplikasaun kona-ba investimentu iha Timor-Leste hodi konvida investedores hosi Nasaun Korea do Súl ne’e mai halo uluk survei antes desidi halo investementu.

Tanba, tuir PM Xanana lakohi hanesan iha Nasaun Korea do Súl ne’ebé ninia prosesu investementu diferente teb-tebes hosi Nasaun TL. Aliende ne’e, lakohi moos iha investementu hanesan iha Nasaun Europeia, hirak ne’ebé investe tun sa’e de’it. Maka ha’u konvida sira para mai haree uluk lai.(Asesu Youtube/Facebook https://www.facebook.com/Media1Timor Media ONE Timor)