MEDIAONETIMOR-Tama ba loron daruak parte segundu dialogu prosesu formasaun VII Governu Konstituisional entre Partidu Fretilin hó Partidu Khunto deskute ona konaba plataforma VII Governu Konstituisional.
Sekretáriu Jeral Partidu Fretilin, Mari Bin Amude Alkatiri lia tun ba jornalista hafoin remata deskute asuntu formasaun governu iha ótel Novo Turizmu, Kinta, (17/08/2017) hateten, Fretilin laos prontu deit halo koligasaun ho Partidu PLP no Khunto.
Maibé tenik Mari, hanesan uma kain ida koligasaun hó partidu rua ne’e sei iha tan odamatan ho jendela nakloke ba partidu sira seluk. Aliende ne’e Presidente Partidu CNRT ho Sekretariu Jeral Partidu Fretilin seidauk hasoru malu.
“Maibe, hau hó Kompadre Xanana hasoru malu tiha ona,” dehan Mari hodi hatutan hot-hotu apoiu katak partidu mais votadu mak tenke iha inisiativu atu halo servisu forma VII Governu. Maske todan, maibé ne’e povu nia desijaun fó ba Fretilin atu labele manan bo’ot para buka sira seluk hodi servisu hamutuk.
Tanba ne’e katak Mari, maske Partidu Demokratiku (PD) seidauk prontu atu koalia hodi haruka karta halo koligasaun ho Fretilin maibé iha Loron, Sesta, (18/08/2019) sei halo diálogu ho estrutura PD para atu rona hanoin kona-ba kontribuisaun iha Parlamentu Nasional hodi haburas demokrasia no garante estabilidade no pás.
Enkuantu hamutuk ho Khunto iha deskusaun haktuir Mari, hakotu ona koaligasaun hodi finaliza diskusaun plataforma governasaun hodi aprezenta ba Prezidente Repúblika ne’ebé hakarak hahu segunda simu ona mensajem nomeasaun Primeiru Ministru (PM) entre partidu 3 ne’ebé halo koaligasaun.
Nune’e maka iha serimonia tomada de pose Kuartu Lejislatura iha Parlamentu Nasional, Segunda, (21/08) sei anunsia governu koligasaun ne’ebé maka sei finaliza nia diskusaun plataforma governasaun iha Loron Dominggu, (20/08/2017).
“Depois Domingu, (20/08/2017) ami sei hakotu desizaun ba koligasaun hodi forma VII Governu Konstitusional ne’ebé Segunda, (21/08/2017) sei rona hamutuk iha Parlamentu Nasional,” hateten Konselheiru Superior Partidu Khunto, José Naimori.
Naimori dehan, Partidu Khunto konkorda halo koligasaun tanba hakarak alkansa militantes sira nia mehi ne’ebé durante ne’e hato’o ona iha kampaña Eleisaun Parlamentar tinan 2017.
Notas órariu;
- Fretilin la presiza ona hasoru malu hó CNRT tanba hasoru ona hó Kay Rala Xanana Gusmão (maibé interen Partidu CNRT nian, Kay Rala Xanana Gusmão presiza hasoru malu hó Francisco Kalbuady Lay).
- Sesta, (18/08/2017) Fretilin sei hasoru tan hó PD hodi husu apoiu ba haburas demokrasia no garante estabilidade no pás.
- Iha Loron Sabadu no Dominggu, (19-20/08/2017), Fretilin, PLP no Khunto tenki finaliza plataforma formasaun VII Governu no hili ona Primeiru-Ministru (PM).
- Entre Loron Sabadu no Dominggu ne’e mós, Partidu aliansa (Fretilin, PLP no Khunto) tenki aprezenta ona naran kandidatura PM ne’ebé sira hili ba Prezidente Repúblika hodi halo nomeasaun no hili mós membru governu (bazeia ba Konstituisiaun artigu 106).
KAPÍTULU II
FORMASAUN NO RESPONSABILIDADE
Artigu 106
(Nomeasaun)
- Primeiru-Ministru hili hosi partidu ida ne’ebé iha votu barakliu ka hosi aliansa partidu sira ne’ebé iha nia ema barak iha Parlamentu no iha nomeasaun hosi Prezidente-Repúblika, wainhira rona tiha partidu politiku sira ne’ebé iha reprezentante sira iha Parlamentu Nasional.
- Membru Governu siraseluk, Prezidente-Repúblika mak sei hili liu husi Xefe-Ministru nia proposta.
- Hanesan públika tiha ona katak hafoin anunsiu husi Tribunal Rekursu konaba rezultadu Eleisaun Parlamentar (iha 05/08/2017), liu tiha loron 15 (iha loron 20/08/2017) tenki estabelese Parlamentu. Nune’e, loron Segunda, (21/08/2017) sei hala’o serimonia tomada de pose Kuartu Lejislatura iha Parlamentu Nasional,
- Maibé ba estabelese governu nian liu tiha loron 30 hafoin anunsia Eleisaun Parlamentar husi Tribunal Rekursu katak, iha loron Sesta, (25/08/2017) tenki iha ona tomada de pose ba VII Membru Governu Konstituisional nian.(Reportájem Jose Samuel/Suzana Cardoso/Estajiada Nofiana da Costa)
Ita nia komentariu konaba post ne'e.