(Reportajen Livia Sarmento/ Editora Suzana Cardoso)
Dili (Media ONE Timor) – Nu’udar rekoñesimentu ba diplomata ne’ebé mak remata ona nia missaun iha Timor-Leste (TL), Prezidente Repúblika (PR) José Ramos Horta kondekora Embaixadór Korea do Súl iha TL, Kim Jeong Ho.
“Ha’u hahú ne’e kedas iha primeiru mandatu. Tanba sira mai reprezenta sira nia rain. No sira ida-idak hothotu halo kompromísiu buka hametin relasaun ho Timor-Leste (TL). Entaun kuandu sira fila, nu’udar estadu no governu halo kondekorasaun ba sira-nia servisu. Nune’e sira sei lembra ida-ne’e.”
Assuntu ne’e hato’o husi Prezidente Republika Jose Ramos Horta ba Jornalista sira hafoin remata serimonia kondekora Embaixador Korea do Sul Kim Jeong Ho iha Palásiu Prezidensiál Nicolau Lobato, Dili, Sesta, (06/01/2023).
Prezidente Ramos Horta hatutan, diplomata sira-ne’e reprezenta sira-nia Xefe Estadu hodi hala’o missaun diplomátika. Presiza rekoñese servisu ne’ebé halo ona iha TL. Fó medalla méritu ne’ebé kria liu husi dekretu lei númeru 15/2009, hodi agradese militár, polísia no sivíl ne’ebé serbi nasaun bá reforsu ordem sosiál no asaun ne’ebé kontribui ba pás no estabilidade nasionál no mós simboliza gratidaun ba sidadaun ne’ebé dezempeña papél ativu, kruxiál iha dezenvolvimentu demokrásia TL.
“Embaixadór nia reprezenta nia nasaun nia estadu reprezenta Xefe-de-Estadu, ne’eduni ha’u uluk kedas nu’udar Ministru Negósiu Estranjeirus, Prezidente, ha’u nunka falta resessaun ruma ké embaixada ruma oferese, tanba ne’e hatudu amizade respeitu ba rai ne’e,” dehan Xefe Estadu.
Sorin seluk, Embaixadór Korea do súl iha TL, Kim Jeong Ho, agradese ba Prezidente Repúblika José Ramos-Horta ne’ebé mak atribui ona medalla méritu no rekoñesimentu ba nia servisu durante tinan rua ho balun.
“Ha’u agradese tebes ba na’i Prezidente Repúblika ne’ebé mak rekuñese ona ha’u nia prezensa durante fulan 26 iha ne’e, ba di’ak tomak ne’ebé mak exelénsia halo ba ha’u. Mezmu ké tinan rua ha’u la halo buat barak. Maibé, agradese tebes bele oferese medalla ida ne’e ba ha’u. Onra tebes. Ha’u dejeza nafatin prosperidade entre Timor-Leste no Korea ba futuru,” hatete Embaixadór Korea do súl ne’e.
Kim Jeong Ho deklara prontidaun governu Seul hodi apoia adezaun TL ba ASEAN. No apoiu iha área saida de’it mak presiza. Fízikamente nia husik hela TL. Maibé, nia fuan sei nafatin iha ba TL.
“Ha’u prontu atu sai embaixadór boavontade Korea hodi promove Timor-Leste iha Korea. Nune’e bele hametin liután lasu entre nasaun rua ne’e ba future”, deklara Kim Jeong Ho. Partisipa iha serimónia kondekorasaun ne’e kórpu diplomátiku sira.(Asesu Youtube/Facebook https://www.facebook.com/Media1Timor Media ONE Timor)
Ita nia komentariu konaba post ne'e.