(Reportajen Livia Sarmento/Editora Suzana Cardoso)
Dili (Media ONE Timor) – Promesa ne’ebé VIII Governu Konstituisionál promete iha kampaña eleisaun Prezidensiál Repúblika tinan ne’e realiza, hafoin Prezidente Repúblika (PR) José Ramos Horta promulga Dekretu Lei númeru 37/2022 kona-bá subsídiu anuál 200 USD ba ema vulnerável sira.
“Dekretu lei subsidiu anuál ba uma ka’in ha’u promulga tiha ona. No ha’u kontente Governu rona; sosiédade sivil. Rona hotu-hotu rona atu fó de’it ba família ne’ebé iha duni difikuldade menus $500, ha’u konkorda familia ne’ebé kiak menus $500 ita tenke buka ajuda.
Hateten PR Horta hodi responde Jornalista hafoin remata vizita Institutu Bambu iha Tibar, Kuarta, (16/11/2022). Xefe estadu esplika, razaun fó prioridade ba familia vulnerável sira tanba folin produtu no importasaun sa’e mak’as.
PR Horta apresia Governu hakarak rona ema hotu hodi fó de’it subsidiu fim do ano ne’e ba sira ne’ebé manan menus hosi 500 USD. Fundu ne’e, hotu-hotu konkorda atu fó ba sira ne’ebé presiza, iha loron natal no tinan foun nu’udar prezente.
Desizaun VIII Governu Konstitusionál hodi fahe osan 200 USD ba komunidade foti liu husi Konsellu Ministru iha loron Kuarta, (28/09/2022), aprova ona projetu Dekretu-Lei, numeru 37/2022, loron 25 Fulan Maiu, kona-ba fó subsídiu 200 USD ba uma ka’in sira iha fulan-Dezembru ka fim do ano ne’ebé aprezenta husi Vise-Primeira Ministra no Ministra Solidariedade Sosiál no Inkluzaun, Armanda Berta dos Santos. (Asesu Youtube/Facebook https://www.facebook.com/Media1Timor Media ONE Timor)
Ita nia komentariu konaba post ne'e.