MEDIAONETIMOR-Tanba hatene lolos ona informasaun klean liu tan konaba aktividade UNETL (Uniaun Nasional Eskuteiru Timor-Leste) iha rai laran nomós iha rai liur, Prezidente Repúblika (PR), Francisco Guterres Lú Olo konfirmadu sai Patronu.
“PR Lú Olo apresia ho aktividade UNETL ne’ebé laos deit atu hare ba joven sira, maibé prepara ki’ik-oan sira hosi tinan 6 to’o 25 para prepara sai futuru lideransa ne’ebé diak. Joven ne’ebé responsavel para atu mantein estabilidade no paz. Nune’e PR Lú Olo sei lao hamutuk ho UNETL ba oin.”
Liafuan hirak ne’e hato’o hosi Komisaria Internasional UNETL, Filomena Barros dos Reis ba jornalista hafoin remata enkontru ho PR Lu-Olo iha Palasiu Prezidensial, Sesta, (25/08/2017).
Prinsipiu 10 Lei UNETL
Tanba UNETL ne’e ba ema fiar hotu-hotu nain, maka eskuteiru ba ema hotu-hotu mak hanesan; relijiaun Katolika, Protestan, Budha, Muslimanu no ba ema sé deit bazei ba Prinsipiu 10 ninian;
- Eskuta nia ondra fo laran metin ba ema
- Eskuta ema lia los
- Eskuta oin midar
- Eskuta belun ho ema hotu-hotu no maun alin sira seluk
- Eskuta hatene respeita
- Eskuta hadomi balada no ai horis sira
- Eskuta hatene obedese
- Eskuta hatene haksolok no hamnasa iha susar laran
- Eskuta hatene han hemu sukat, hatene rai nia sasan no la halo a’at no la bo’ok ema seluk nia sasan
- Eskuta la hanoin, lahateten no la halo sala
Aliende ne’e katak Komisaria Filomena, ba PR Lú Olo informa prezensa UNETL iha Baku Azerbajan hodi simu ofisialmente sertifikadu no bandeira wozom hosi Biru Mundial. Nune’e, ofisialmente sai ona membru ba nian 175 para servisu hamutuk.
Hateten Filomena, UNETL sei hala’o servisu ho komunidade eskuteiru dezoforsu. Katak komunidade eskuteiru sira ne’ebe koalia lian Portugues iha CPLP (Komunidade Pais Lian Portugues) no nasaun sira seluk, TL sei liga hodi servisu hamutuk.
“Ba PR Lú Olo kunvida para loke akampamentu Kamioñerus Pioneirus (Akampiker) ne’ebé mak labarik sira hosi tinan 16-25 sei hala’o iha sentru nasional aktividade Metinaro iha loron 29 Agostu to’o 3 Setembru 2017,” tenik Filomena.(Reportájem Deonisio da Cruz)
Ita nia komentariu konaba post ne'e.