(Reportájen Asisten Editor Jacinto Caet)
Atauro (Media ONE Timor) — Hafoin suseisu iha Aldeia haat iha Munisipiu Lospalos, programa Saemaul Undong Ministeriu ne’ebé servisu hamutuk ho Ministeriu Administrasaun Estatal (MAE), haluan tan ninia liras mai aldeia sira iha Munisipu Ataúro.
“Parabens ba Munisípiu Ataúro ne’ebé ohin halo inagurasaun ba sentru ho naran programa movimentu hafoun aldeia. Naran ne’ebé simples. Ita bele bolu PMOHA”, hateten Diretór Jerál Ministeriu Administrasaun Estatál (MAE), Rosito Guterres ba Jornalista iha Suku Biqueli, Aldeia Pala, Sabadu (25/06).
Lee Notísia Relevante: Programa Saemaul Undong, Hasa’e Ekonomia Iha Aldeia
Tanba ne’e hatutan Rosito, komunidade konstrui ona sentru Turizmu Saemaul Undong iha Ataúro ne’e. Bainhira turista vizita fatin turizmu sira bele dezkansa. Programa ne’e Governu Timor-Leste halo koperasaun di’ak ho governu Korea.
Konstrusaun sentru turizmu Saemaul-Undong iha Munisípiu Atauro, Suku Biqueli, Aldeia Pala realiza, tuir Rosito tanba servisu hamutuk governu liuhusi MAE. Nune’e lori MAE nia naran governu fó parabéns ba komunidade sira.
Nia hatutan, programa ne’e hahú iha tinan 2016 to’o 2022, tanba kooperasaun di’ak no kontinua nafatin, programa ne’e hanaran Saemaul Undong (servisu hamutuk-gotong royong), tipu dezenvolvimentu ne’ebé Korea sira uza dezde tinan 1970 liubá.
Diretór ne’e esplika, programa ne’e hanesan movimentu ida, ba komunidade sira iha suku no aldeia atu harii infraestrutura bazika mais preoridade.“Tanba ne’e sira tenke iha sentru ida ba sira nia movimentu bele utiliza ida ne’e, depois sira hanoin fali infraestrutura sira seluk”, katak Rosito.
Nia konta, iha tinan kotuk hahú iha Munisípiu Aileu, aldeia rua. Tinan ne’e kontinua iha munisípiu Ataúro iha aldeia rua. Programa ne’e IIIV governu konstituisaun implementa ona ho komitmentu introdus programa ne’e nasionál nian.
Maske governu Korea mak inisiativa programa ne’e, maibé Rosito dehan, Timor-Leste iha dekretu lei propriu ida. Agora ba oin aldeia hotu-hotu tenke hetan programa ne’e, hahú Munisípiu Atauro ne’ebé sai hanesan pilotu ba programa Saemaul Undong daruak iha futuru.
Iha sorin seluk administradór Munisípiu Atauro, Domingos Soares nia parte agradese ba governu Korea ba programa Saemaul Undong, servisu hamutuk ho ministeriu administrasaun estatal hodi konstrui sentru ne’e ba komunidade sira.
“Agradese ba governu Korea ho inisiativa ne’ebe di’ak ba komunidade sira iha suku liuliu aldeia sira”, katak nia.
Entretantu prezidente komite Munisipiu Atauro, Ernestu Alves afirma, agradese ba Governu Timor-Leste ne’ebé koperasaun di’ak ho governu Korea apoiu finanseiru 20 mill USD halo konstrusaun ba sentru turizmu ida ne’e.
“Ami hetan apoiu husi governu Korea, koperasaun ho governu Timor-Leste. Ami hetan apoiu 20 mill atu halo sentru ida ne’e”, dehan nia.
Nia esplika, sentru ne’e hanesan fatin enkontru, workshop no treinamentu ho komunidade sira. No fahe formasaun ba peskador sira oinsa hadi’a komunidade sira nia moris. No moos fatin turizmu ba turista sira.
“Bainhira bainaka vizita fatin turizmu sira sei seluk taxa ba sentru ne’e no osan sira ne’e sei uza ba planu futuru nian. Hodi fornese ba ema kbiit laek sira”, dehan Ernestu. (Asesu Youtue/Facebook https://www.facebook.com/Media1Timor Media ONE Timor)
Ita nia komentariu konaba post ne'e.