Dili (www.mediaonetimor.co) – Introdús liután Díli ba públiku, liu-liu iha Indonéziu, maka artista Indonézia Nadia Vega vizita Palásiu Prezidensiál hodi hasoru malu ho Prezidente Repúblika (PR) José Ramos Horta. Iha vizita ne’e Nadia halo intrevista badak ho Xefe Estadu.
Artista Indonezia nia vizita ne’e hala’o iha loron 04 Juñu 2025, hodi promove kampaña turizmu ida ne’ebé ho objetivu atu introdús liután Díli ba públiku iha Indonéziu.
Nadia Vega reprezenta mídia Indonézia nian no hakarak hametin ligasaun entre Indonézia no Timor-Leste, hodi destaka fahe sira nia istória ba malu no enkoraja atu aumenta liu tan setór turizmu nian.
Remata entrevista ho PR Ramos Horta, Nadia Vega diretamete vizita mos salaun ASEAN iha Palásiu Prezidensiál. Vizita ba salaun ASEAN ne’e hodi halo reportajen espesiál ba Televizaun SCTV nian, iha programa SILET.
Nadia Vega kontente hare’e Timor-Leste nią preparasaun ba ASEAN. No fó bemvindu ba Timor-Leste hodi sai membru permanente ba ASEAN ne’ebé sei realiza iha simeira ASEAN ba dala 47, iha fulan Outubru tinan 2025.
Iha dadalia ho ekipa media Prezidénsia Nadia hatete, nia kontenti vizita mai Timor-Leste no fó kontribuisaun ba festivál Tasi Fest.
“Ha’u hakarak kontribui no promove kampaña turizmu kruzadu ida entre Timor-Leste no Indonézia. Foka introdús Dili ba turista Indonézia sira, enkuantu hatudu mós atrasaun Indonézia nian ba sira ne’ebé iha Dili”.
DJ Nadia Vega ne’ebé mak famozu iha Indonézia ne’e, hamutuk ho artista sira seluk mai iha Timor-Leste hodi atua iha Tasi Fest 2025 iha Dili ne’ebé sei realiza iha entre loron 05 to’o 07 fulan Juñu tinan 2025.
Prezensa artista hirak ne’e hodi fó kontribuisaun ba promosaun kultura, edukasaun ambientál, no kolaborasaun internasionál, liu hosi performansa musikál no projetu sosiál ne’ebé fó impaktu pozitivu ba komunidade sira.
Nadia Vega subliña, Timor-Leste no Indonézia iha ligasaun istóriku ne’ebé metin. Tanba ne’e, Nadia Vega espresa ninia interese iha atividade sira hanesan Tasi Fast hodi atrai vizitante Indonézia barak liután. Liu-liu bele mai haree biodiversiade oin-oin ne’ebé úniku no furak iha tasi okos, iha illa Timor-Leste nian. (Asesu Youtube–https://www.youtube.com/@Media1Timor/Facebook- https://www.facebook.com/Media1Timor/Iha moos Kursu Jornalizmu no Lian Inglesh)
Ita nia komentariu konaba post ne'e.