(Reportajen Formandu Hakerek Imprensa Ceftec Agostu dos Santos)
Dili (Media ONE Timor) – Tempu Quaresma ba Sarani katolika, tama ona ba semana datoluk. Nune’e, Sarani sira tenki hak’as an atu buka buat loos. Hamlaha no hamrook nafatin ba Maromak nia grasa.
“Husu ba sarani sira atu iha semana datoluk, iha tempu Quaresma ne’e, Sarani sira tenki hak’as an atu buka buat loos. Hamlaha no hamrok nafatin ba Maromak nia grasa. Maibé Ita tenki purifica an nafatin, liu hosi orasaun, penitensia no karidade.”
Hateten Diretor da Casa Formação Salesiana, Pe. João Roque iha ninia homilia bainhira prezidi Missa daruak iha tuku 07:30 dadeer, iha Igreja Paroquial Maria Auxiliadora Comoro. Missa ne’e hetan partisipasaun maximu hosi Sarani, relijiozu no relijioza sira. No anima liturjia hosi grupu ADMA.
Pe. João Roque esplika, hanesan feto Samaritana ne’ebé mak hetan purifição bainhira hasoru malu ho Jesus iha wé-matan. Nune’e mós iha tempu Quaresma ne’e Ita buka hasoru malu ho Maromak atu purifica mós Ita nia an molok tama ba semana Santa.
Katak Pe. João Roque, Ita presiza purifica an. Konverte hosi sala no fila fali ba Maromak. Tempu Quaresma ne’e ita presiza hakas an atu fila ba dalan loos. Buka hadame malu ho ema no Maromak. Ida ne’e maka Ita hotu tenki halo durante tempu Quaresma ne’e.
Aliende ne’e Pe. João Roque moos iha ninia homília ho durasaun tempu 13 minutus ne’e, husu atu sarani sira labele buka de’it riku soin mundu nian hodi haluha Maromak. Husu atu Sarani sira buka wé-matan moris nian, hodi hetan moris rohan la’ek.
“Ita nia moris presiza hamlaha no hamrok ba buat ne’ebé loos. No ida ne’ebé loos mak Maromak de’it. Maromak de’it mak fó bee matan moris rohan la’ek nian”, katak Pe. João Roque ne’ebé nu’udar mós Parku Comoro nian ne’e hodi hatutan.
Ita labele hamlaha no hamrok de’it ba osan. Ba buat mundu nian. Maibé Ita presisa buka Maromak iha Ita nia moris lor-loron nian. Liu hosi Sakramentu sira no rona Maromak nia lia fuan. Misa domingu bai-bain, iha Igreja Paroquiál Maria Auxiliadora Comoro hala’o dadeer dala haat. No lorokraik dala ida. (Asesu Youtube/Facebook https://www.facebook.com/Media1Timor Media ONE Timor)
Ita nia komentariu konaba post ne'e.