MEDIAONETIMOR-Tanba partidu iha 21 kedas nune’e Premiadu nobel da paz, José Ramos Horta lafiar iha Elisaun Parlamentar (Elpar) tinan 2017 ne’e bele iha manan maioria absoluta.
Maske lafiar maibé hateten Ramos Horta ba jornalista hafoin tuir votasaun iha Sentru votasaun Metiaut, husu ba partidu ne’ebé manan absoluta atu hato’o parabéns ba timoroan hotu. Manan povu Timor-Leste (TL) maka manan. Fó liman ba partidu sira seluk hó tu’ur hamutuk deskute ba forma governu.
Katak Ramos Horta, partidu manan tenke hatudu sentidu ema matenek hó kria governu ida hakoak ema hotu. Nune’e, suzere atu tenki halo dialogu durante semana ida ka loron lima antes forma governu.
“La fiar que iha manan maioria absoluta. Mesmu iha maioria absoluta, maka ne’e favor fó liman ba partidu seluk tu’ur hamutuk halo dialogu. Hanesan uluk hau nu’udar prezidente iha tinan 2007 halo dialogu iha Dare. Iha tinan 2017ne’e PR, Lu-olo bele halo ida ne’e antes forma governu,” sujere Ramos Horta.
Esplika Ramos Horta, partidu manan Prezidenti Repúblika sei bolu halo konsulta ho deputadu sira iha bankada para haré, se mak ba Primeru Ministru (PM) para forma governu.
Aliende ne’e Ramos Horta mós husu ba povu, inklui militantes partidu sira para hatudu orgullu no hatudu sentidu demokrasia hodi simu deit rezultadu Elpar hó toleransia, kalma nomós hakmatek. Labele halo pawai hodi provoka malu.
Aproveita intervista ne’e, Ramos Horta mós fó parabéns ba PM, Rui Maria de Araújo ne’ebé lidera ona VI governu. Tanba, laos fasil PM Rui simu servisu ida ne’ebé iha dalan klaran. Kuandu klaran ona, iha balun diak no balun a’at. PM Rui hatudu ona nia kompetensia matenek nian hodi lidera VI governu ne’e to’o besik ona nia rohan.
Iha Elpar tinan 2017 ne’e aliende Ramos Horta, vota iha sentru votasaun Metiaut ne’e Eis PR, Taur Matan Ruak. Prezidente Partidu CNRT, Kay Rala Xanana Gusmão vota iha sentru votasaun Sede Suku Balibar. PR, Francisco Gueterres Lu-olo no Sekretariu Jeral Partidu Fretilin, Marí Bin Amude Alkatiri vota iha sentru votasaun Ensino Baziku, Farol.
Manan Maioria
Iha parte seluk hafoin remata vota Prezidente Partidu CNRT, Kay Rala Xanana Gusmão halo nia deklarasaun votus hodi dehan, Partidu CNRT sei manan maioria tanba durante ne’e kontribui ona ba dezemvolvimentu nasional.
“Hau fiar katak Partidu CNRT sei manan maioria. Tanba durante ne’e CNRT halo ona buat barak hodi bele kontribui ba dezemvolvimentu nasional,” tenik Xanana antes husik hela sentru votasaun sede Suku Balibar hodi sae kareta fila ba nia fatin.
Iha sentru votasaun Metiaut Prezidente Partidu PLP, Taur Matan Ruak hato’o nia deklarasaun votus hodi dehan, prontu atu simu rezultadu saida deit hosi desizaun timoroan sira nian iha Elpar 2017 ne’e.
“Hau senti kontenti. Tanba hau ho hau nia kaben tuir eleisaun hanesan sidadaun bai-bain. No ami sei simu rezultadu husi povu nia poder,” katak Taur Matan Ruak.(Reportájem Aderito Ximenes)
Ita nia komentariu konaba post ne'e.