(Reportájen Formandu Ceftec; Francisco Robinson, Justina Soares, Mario Mendonça, Jaime Ornai, Venancio da Costa)
Díli (Media ONE Timor) – Liman mihis toos iha balada brigada ambientál nia liman tutun, soi tiha lixu ba paraizu foun hodi hamaus visitante iha tasi ibun. Fraze valorizasaun ne’ebé serve ba kriatividade brigada ambientál hodi hafurak Sidade Díli liu husi resiklázen. Sira transforma lixu sai útil hodi kontribui ba polítika zero plástiku.
(Foto Formandu Ceftec)
Kria jardín matak, nu’udar atividade kriativu resiklázen hodi transforma lixu. Abut ba prodúsaun kadeira no meza ba paraizu iha jardín tasi-ibun mak lixu plastiku. “Brigada Ambientál hanesan grupu ida hamriik atu haree kona-ba oinsá hadomi ambiente. Hamoos fo’er ka lixu ne’ebé iha Díli barak tebes”, tenik feto foin sa’e ho energia forte, Genilda Soares do Rego ne’ebé nu’udar mós membru ativu iha groupu ne’e.
Sai matadalan ba públiku atu oinsá hadomi ambiente no so’e lixu iha nia fatin, nu’udar objetivu hodi hari’i Brigada Ambientál iha tinan 2019. Ho nia misaun furak; atu hamoos fo’er no kuidadu ambiente ho maneira halo resiklázen.
La ezizi duit metan ida. La sukat surat tahan proposta ida. Hamutuk foin Sa’e na’in 25 ne’ebé ezisti. Feto na’in 3de’it no mane mak na’in 22, grupu brigada ambientál ne’e halo servisu voluntáriu. Maske, dalaruma de’it maka CEIA (Centro Educação Informação e Ambiental) ne’ebé hamahon an iha Sekretaria Estadu Ambiente (SEA) ka parseiru hadomi ambiente, fó insentivu osan para apoiu transporte.
“Tanba servisu voluntáriu, membru barak ne’ebé inklina an, hahú tinan 2019, maioria la ativu ona”, katak Genilda do Rego ne’ebé foin tama iha Fulan Outobru tinan 2022 ne’ebé ativu liu kompara ho membro sira seluk.
Ho lia fuan midar Genilda konta, hahú husi Fulan Outubru 2022, prodús ona kadeira husi roda at mak halo ona resiklazen hamutuk 50, ne’ebé tau ona iha jardín matak sira iha tasi-ibun, Embaixada China nia oin. No fatin seluk tán.
Diretora Nasionál CEIA iha SEA, Arménia Machado Fernandes, via telefone, Kuarta, (22/3/2023) reforsa katak, brigada ambientál ne’e halo ona lansamentu ofisiál iha tinan 2020, envolve juventude na’in 150 iha Díli.
Diretora CEIA ne’e konta, CEIA mak oferese formasaun ba juventude sira ne’ebé hamahan aan iha brigada ambientál, para oinsá atu hadomi no kuidadu ambiente. Sira halo atividade fahe ba zona rua. Zona Costeira no Zona Montanha.
Katak Arménia, “Zona Costeira hala’o iha rai tetuk. Mak, estabelese kuadru avizu ba jardín matak sira. Halo limpeza iha tasi-ibun, rekolla akua no roda aat sira husi kompañia hodi halo resiklázen no transforma sai ba jardín.
“Zona Montanha, hala’o atividade iha foho. Halo konservasaun ba rai, para prevene dezastre naturál. Estabelese trasu Trava Kadalak hanesan jestaun rekursu bee husi kuda ai-oan, tau fatuk. No uza mós tua metan nia sanak hodi trava be’e atu la bele mosu inundasaun no erozaun. Bee-sae no rai-monu”, katak Diretora CEIA ne’e.
Nia esplika mós katak, atividade ne’e kontribui ba polítika zero-plástiku. La’os atu halakon lixu ka foer. Maibé atu oinsá redús lixu. Liu-liu lixu plástiku. Tanba plástiku nu’udar lixu la-orgániku, ne’ebé presiza tempu naruk atu dodok kompara ho lixu orgániku.
Lixu plástiku nia durasaun atu dodok kuaze tinan 100 ka 200. Bainhira dodok, nia substánsia kímika bele hamate hotu mikroba ne’ebé halo rai bokur. Karik soe ba tasi, mikroplástiku sira ikan han. No ita ba konsumu ikan ne’e, bele afeita fali ba ita nia saúde, esplika Diretora Arménia Fernandes.
Dirijente CEIA ne’e haktuir katak, grupu kriativu hirak ne’e kria iha tinan 2 liu bá, 2021. No hetan formasaun husi CEIA hodi estabelese jardín edukasaun ambientál. Iha orsamentu balun ba apoiu grupu trava kadalak. No apoiu mós husi UNDP (United Nation Development Program). CEIA mós apoiu insentivu ba membru grupu sira.
Insentivu ne’ebé mak CEIA apoiu ne’e atu rekupera osan transporte, depende ba natureza atividade. No husi UNDP suporta semi-voluntáriu, nune’e la tuir estandar SEFOPE nian. Brigada sira mós apoiu fó formasaun ba grupu ka juventude suku nian hodi kontinua atividade ne’e, dehan Diretóra Arménia Fernandes.
“Hanesan Juventude Hadomi Ambiente (JHA) hanesan ramu ida husi Brigada Ambientál hodi halo resiklázen ba roda aat no akua mamuk sai ba jardín matak hanesan obra iha tasi-ibun, Embaixada Japaun nia oin. No seluk mak besik iha Escola CANOSSA”, dehan Nélio de Jesus Nunes.
Nia konta motivu husi obra sira ne’e katak, di’ak liu halo lixu sai amigu. No transforma husi kriatividade sai fatin di’ak ba ema hodi deskansa ka halimar bá. Iha prosesu konstrusaun ba kada jardín hirak ne’e la’o durante semana rua nia laran, tenik Nélio Nunes, hanesan membru JHA.
Membru JHA ne’e hateten, jardín ne’e halo atu kontribui halo redusaun ba lixu plástiku. No fó fatin ba ema atu tur ka deskansa. Jardín ne’e mós fó oportunidade ba negosiante ki’ik sira fa’an sasan hodi hetan lukru uitoan.
Iha sorin seluk, Arniyanti Seran, hanesan negosiante ki’ik iha Kampung Alor ne’ebé fa’an sasan iha jardín matak iha Emabixada China nia oin katak, husi fatin ne’e kontribui ba sustenta sira nia uma-laran liu husi atividade fa’an sasan.
“Ami negosiante ne’ebé fa’an sasan iha fatin ne’e, ami mai ho inisiativa rasik fa’an sasan, ami mós la hetan lisensa ruma husi parte autoridade sira”, dehan Aniyanti Seran iha loron Segunda, 20/03/2023.
Fatin ne’e fó rendimentu ba sira ba sustentabilidade iha família nian. Atividade fa’an iha jardín ne’e loron ida bele hetan USD 20 bainhira vizitante barak. No bainhira vizitante natoon ka menus bele hetan USD 10. Vizitante barak liu iha findesemana duke iha loron babain ka loron útil sira, dehan negosiante ne’e.
Relasiona ho lixu ne’ebé impaktu husi sasan ne’ebé negosiante sira fa’an, Arniyanti Seran dehan, sira mak hamoos rasik atu bele garante fatin ne’e mós hodi atrai vizitante sira. No laiha kontrolu ruma husi parte relevante ruma ka informasaun ofisiál ida.
Tuir Genilda do Rego katak, Brigada Ambientál fó informasaun verbál de’it ba negosiante hirak ne’e hodi mantein fatin mós no soe lixu iha nia fatin. Nune’e mós Nélio de Jesus, nu’udar membru JHA, nafatin husu atu negosiante no vizitante sira atu hadomi jardín ne’e hodi garante nia utilidade iha tempu naruk.
CEIA ho Brigada Ambientál no grupu balun ne’ebé autór ba jardín hirak ne’e, entrega ona ba autoridade lokál sira mak halo kontrolu ba jardín ne’e. No husu atu bele garante nafatin nia kontinuidade, akresenta husi Diretora Nasionál CEIA, Arménia Machado Fernandes.PARABÉNS(Asesu Youtube/Facebook https://www.facebook.com/Media1Timor Media ONE Timor)
Ita nia komentariu konaba post ne'e.