Díli (www.mediaonetimor.co) – Ajuda Timor-Leste hodi hakat ba iha viajen transformasaun enerjia verde, ba dezenvolvimentu ida ne’ebé sustentável liu, inkluzivu ba ema hotu, ho finansiamentu husi Governu Japaun maka UNDP (United Nations Development Programme-Inglesh) no Governu Timor-Leste (TL) lansa projetu transformasaun verde Pasífiku.
Haktuir komunikadu Imprensa ne’ebé Media ONE Timor simu hatete, lansamentu ba projetu transformasaun verde Pasífiku ba solarizasaun Institutu Nasionál Farmásia no Produtu Médiku (INFPM), uluk koñesidu ho naran SAMES ne’e hala’o iha loron, Tersa-feira, (24/09/2024) iha edifisiu SAMES.
Sei nafatin husi Komunikadu Imprensa UNDP nian ne’e esplika, projeitu ne’e lansa tiha ona iha tinan 2023 no sei kontinua to’o tinan 2025. Projetu transformativu ida ne’e ho objetivu atu ajuda TL hakat ba iha viajen transformasaun enerjia verde ba dezenvolvimentu ida ne’ebé sustentável liu, inkluzivu ba ema hotu, ho finansiamentu husi Governu Japaun.
Instalasaun painel solar iha INFPM hanesan parte ida husi output rua husi projetu ida ne’ebé implementa husi UNDP. No husi UNDP sei instala painél solár sira iha armajen médiku ida-ne’e, ne’ebé rai ai-moruk hotu-hotu antes fornese ba iha instalasaun saúde públika sira iha nasaun tomak.
Ho enerjia solár, armajen sei iha fornesimentu enerjia ne’ebé estável no kontínua, esensiál ba manutensaun ai-moruk, vasina, no fornesimentu saúde krítiku sira seluk iha temperatura ne’ebé adekuadu.
Solarizasaun sei la’ós de’it salvaguarda manutensaun ótimu ba ai-moruk no vasina krítiku sira, maibé sei mós hamenus kustu operasionál sira no hamenus INFPM nia carbon footprint, kontribui ba futuru ida ne’ebé verde no saudavel liu.
Tuir Adjunta Reprezentante Rezidente UNDP, Adeline Carrier liu husi komunikadu imprensa ne’e katak, importánsia husi transformasaun verde iha INFPM no TL, tanba ida-ne’e marka marku passu boot ida iha viajen ne’ebé nasaun ne’e hala’o ba futuru ida ne’ebé sustentável liu ba ema hotu.
“Iha tempu krusiál ida-ne’e iha-ne’ebé nasaun hasoru hela kestaun sira kona-ba mudansa klimátika ne’ebé maka’as, tantu iha nivel lokál no nasionál”, Adeline subliña hodi hatutan, “Ita iha ona pontu mudansa ida ne’ebé ita presiza utiliza fonte enerjia renovável sira, hamenus emisaun sira, no adota prátika sustentável sira.”
Katak Adeline, TL bele kontribui ba mitigasaun impaktu sira husi mudansa klimátika no harii futuru ida ne’ebé reziliente liu ba nia povu no komunidade sira. Projetu ne’e hanesan deklarasaun ida kona-ba kbiit parseria nian ba Governu TL, Governu Japaun no UNDP.
Eventu lansamentu ne’e hetan partisipasaun husi parte interesada prinsipál sira, inklui Embaixadora Japaun KIMURA Tetsuya, Adjunta Reprezentante Rezidente PNUD Timor-Leste Adeline Carrier, Ministru Obras Públikas Samuel Marçal, no Vise-Ministru ba Fortalesimentu Institusionál Saúde nian José dos Reis Magno. Serimonia ne’e hetan benvindu husi Diretór Ezekutivu INFPM Dr. Brígido Simão de Deus hodi hatudu esforsu kolaborativu ba promove asaun klimátika no sustentabilidade. (Asesu Youtube/Facebook https://www.facebook.com/Media1Timor Media ONE Timor)
Ita nia komentariu konaba post ne'e.