(Reportájen Estajiada Media ONE Timor Francisca Ximenes)
Dili (www.mediaonetimor.co) – Governu Konstituisionál ba dala IX liu hosi Secretaria de Estado da Comunicação Social (Secoms) ne’ebé responsavel ba komunikasaun sosiál no relasaun ho mídia hato’o agradese ba mídia Timor-Leste (TL) liu hosi jornalista sira nia kooperasaun hodi halo kobertura durante vizita ofisial Primeiru Ministru (PM) Australia, Anthony Albanese.
“Lori Governu Konstituisionál da sia nia naran, Secoms hakarak hato’o agradese ba kooperasaun diak durante loron rua iha vizita ofisial Primeiru Ministru (PM) Australia, Anthony Albanese nian mai Timor-Leste ne’ebé mídia hotu-hotu kolabora hodi halo kobertura ho diak tebes”.
Lia fuan agradese ne’e hato’o husi Secoms, Expedito Loro Dias Ximenes iha reuniaun evaluasaun iha ámbitu vizita ofisiál PM Australia, Anthony Albanese mai TL ho mídia sira, ne’ebé hahú hosi loron 28 to’o loron 29 Janeiru 2026. Reuniaun ne’e hala’o iha sala reuniaun DNDM-Secoms, iha ínisiu semana fulan Fevereiru 2026.
Secoms Expedito esplika liutan, vizita ofisiál PM Australia Anthony Albanese la’o di’ak tebes. Agradese ba diretór, xefe redasaun, no editor mídia nasionál ho idak-idak nia jornalista, inklui jornalista korespondente hosi ajensia internasionais sira.
Maske, hatutan Secoms Expedito katak, durante vizita ofisiál PM Australia ne’e akontese faillansu menus kumpriendesaun ba étika servisu profesionalizmu nian hodi kria falla komunikasaun ho jornalista sira nia kobertura, maibé la fó impaktu boot ba kobertura vizita ofisiál ne’e.
Nune’e, Secoms Expedito sujere ba jornalista no jestor mídia sira atu komunika malu iha mídia breafing ne’ebé hala’o antes bainaka ofisiál atu mai TL. “Ba oin ne’e, labele halo buat ne’e sai rai moris fali”, Secoms Expedito hatete hodi husu ba jornalista sira tenki respeitu prinsipiu profesionalizmu sira iha jornalizmu nian.
Redasaun: Iha Kódigu Étika ba Jornalista iha Númeru 6. “Uza dalan legal no profisional hodi hetan informasuan no imajen sira, respeita kompromisu ne’ebé hakotu ona ho fonte informasaun (konfidensialidade, “off the record, embargo no seluk tan).
Maske iha faillansu nune’e, “Agradese nafatin ba xefe no dirijente mídia sira, jornalista sira, no ba hotu-hotu. Agradese ba ita nia servisu hamutuk ida ne’e”, Secoms Expedito dehan.
Hatete Secoms Expedito, iha futuru sei iha kooperasaun nafatin hanesan hala’o ona iha inisiu tinan 2026 ne’e. Iha vizita offisiál seluk ne’ebé sei hala’o iha futuru, antes ne’e sei halo mídia breafing. No vizita ofisiál ne’e remata, sei halo mos evaluasaun.
Iha oportunidade ne’e Secoms Expedito aprezenta mos kooperasaun prestasaun servisu mídia ho Governu Konstituisionál da IX ne’ebé hala’o ona dezde inisiu. Iha tinan 2026 sei kontinua kooperasaun prestasaun servisu ho; distribuisaun jornál sei lao nafatin. Programa governu rona, hare’e rasik, no advertoriál lao nafatin.
“Hanesan ita ko’alia hotu ona. Iha tinan 2026 ne’e, entre Secoms ho mídia sira la bazea ona ba kontratu. Maibé bazeia deit ba prestasaun servisu”, Secoms Expedito esplika hodi hakotu enkontru evaluasaun vizita ofisiál PM Australia ho mídia nian ne’e.(Asesu Youtube-https://www.youtube.com/@Media1Timor/Facebook- https://www.facebook.com/Media1Timor/Iha moos Kursu Jornalizmu no Lian Inglesh)
Ita nia komentariu konaba post ne'e.